សង្គ្រាមអ៊ុយក្រែន ៖ រុស្សុីដែលជាប្រទេសតែងនាំចេញប្រេងឆៅដ៏ច្រើន ពេលនេះ បែរជាកំពុងជួបប្រទះវិបត្តិខ្វះប្រេងឥន្ធនៈប្រើមកពីការវាយប្រហារខ្លាំងក្លារបស់អ៊ុយក្រែង លើបណ្ដារោងចក្រចម្រាញ់ប្រេងកាត និងឧស្ម័នធំៗរបស់ខ្លួន។
ការវាយប្រហាររបស់អ៊ុយក្រែនកំពុងតែបន្តចាប់តាំងពីច្រើនខែមកហើយ បណ្ដាលឲ្យឆេះបណ្ដារោងចក្រចម្រាញ់ប្រេងកាត និងបណ្ដាលឲ្យស្ទះដល់ការផ្គត់ផ្គង់ប្រេងឥន្ធនៈនៅទូទាំងប្រទេស។ តាមស្ថានីយចាក់ប្រេងទាំងឡាយក្នុងប្រទេសរថយន្តបានបន្តកន្ទុយគ្នាយ៉ាងវែងរង់ចាំចាក់ប្រេង ដោយពលរដ្ឋមានការមិនសប្បាយចិត្ត និងពោរពេញដោយការព្រួយបារម្ភ។
ក្នុងតំបន់ជាច្រើនរបស់ប្រទេស មានការបង្កើតកម្រិតប្រេងដែលត្រូវចាក់ ដោយតាមដងផ្លូវគេឃើញខ្សែរថយន្តយ៉ាងវែងបន្តកន្ទុយគ្នាចាំចាក់ប្រេង តាមស្ថានីយចាក់ប្រេងនានា។ ការរង់ចាំកន្លែងខ្លះ ត្រូវចំណាយពេលដល់ច្រើនម៉ោង។ តាមបណ្ដាញសង្កមគេបានផ្សាយវីដេអូបង្ហាញពីម្ចាស់យានយន្តរអ៊ួពីការរង់ចាំបន្តកន្ទុយគ្នាដ៏វែង ហើយក៏មានការឈ្លោះគ្នាព្រោះពេលដល់វេនរបស់ខ្លួនប្រេងត្រូវអស់ពីស្ថានីយ ខណៈតម្លៃប្រេងក៏ឡើងថ្លៃ។
ចំពោះស្ថានភាពបែបនេះប្រធានាធិបតីរុស្ស៊ី លោកវ្ល៉ាឌីមៀរពូទីន បានទទួលស្គាល់ ដោយលើកឡើងថា ការវាយប្រហារសំដៅបណ្ដាទីតាំងប្រេងរបស់យើង បង្កើតបញ្ហាដោយចៀសមិនផុតនិងថា នាពេលបច្ចុប្បន្នយើងសង្កេតឃើញពីការខ្វះប្រេងមួយចំនួន ។ ប៉ុន្តែលោកអះអាងថា ការខ្វះប្រេងនឹងមិនដល់ថ្នាក់អាក្រក់ខ្លាំងពេកនោះឡើយ។
ការខ្វះប្រេងសាំង និងប្រេងម៉ាស៊ូតកំពុងគំរាមកំហែងដល់ផ្នែកកសិកម្មរបស់រុស្សុី។ តាមអ្នកទទួលខុសត្រូវរុស្សុីម្នាក់ថា ជិត១ភាគ៣នៃសមត្ថភាពចម្រាញ់ប្រេងកាតរបស់រុស្សុីត្រូវបានបញ្ឈប់។ ការខ្វះប្រេងកើតមាន ក្នុងពេលសំខាន់សម្រាប់សេដ្ឋកិច្ចរុស្សុីព្រោះពេលនេះជារដូវកសិកម្មដែលកំពុងតែសកម្ម។ ដំណាក់កាលនេះមានសេចក្ដីត្រូវការប្រេងម៉ាស៊ូតច្រើនបំផុត។
រុស្សុីកំពុងរកដំណោះស្រាយលើការខ្វះប្រេងនេះ ដោយបើតាមទីភ្នាក់ងារព័តមានរ៉យទ័រថា រុស្សុីត្រៀមនាំចូលប្រេងឥន្ធនៈយ៉ាងតិច៤០.០០០តោនក្នុងមួយខែ។ សេចក្ដីត្រូវការប្រេងឥន្ធនៈមានខ្ពស់បំផុតក្នុងរដូវក្ដៅនេះ។ រុស្សុីនាំចូលរួចហើយប្រេងពីប្រទេសបេឡារុស ហើយកិច្ចព្រមព្រៀងមួយត្រូវបានរកឃើញជាមួយកាហ្សាក់ស្ថាន។ ប៉ុន្តែក្រៅពីបណ្ដាប្រទេសជាប់ជិតខាង រុស្សុីក៏នឹងចាប់ផ្ដើមដែរនាំចូលប្រេងឥន្ធនៈពីឥណ្ឌា ។
ឥណ្ឌាជាអ្នកនាំប្រេងឆៅរុស្សុីចូលច្រើនបំផុត ហើយរុស្សុីត្រូវការទិញប្រេងរបស់ខ្លួនឡើងវិញក្រោយការចម្រាញ់។ ដូច្នេះឥណ្ឌានឹងជាអ្នកចំណេញព្រោះនាំចូលប្រេងឆៅរុស្សុីក្នុងតម្លៃថោក ហើយលក់ប្រេងចម្រាញ់ឲ្យវិញក្នុងតម្លៃថ្លៃ។ រុស្ស៊ីគ្មានជម្រើសព្រោះការជួសជុលឬស្ដារឡើងវិញបណ្ដារោងចក្រចម្រាញ់ប្រេងកាតរបស់ខ្លួនរងការបំផ្លាញដោយអ៊ុយក្រែន ត្រូវការប្រើពេលយូរ មកពីហេតុផលជាច្រើន ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ