ខេត្តស្ទឹងត្រែង កំណត់យក «ភូមិភ្នំធាតុ» ជាភូមិគំរូដំបូងគេ ដែលលុបបំបាត់ផ្លូវដី និងផ្លូវគ្រួសក្រហមបាន ១០០%
- ស្ទឹងត្រែង
ខេត្តស្ទឹងត្រែង៖ រដ្ឋបាលក្រុងស្ទឹងត្រែង បានសម្រេចកំណត់យក «ភូមិភ្នំធាតុ» ស្ថិតក្នុងសង្កាត់ស្ទឹងត្រែង ធ្វើជាភូមិគំរូដំបូងគេបង្អស់ ក្នុងការលុបបំបាត់ផ្លូវដី និងផ្លូវគ្រួសក្រហមទាំងស្រុងដោយជំនួសមកវិញនូវបណ្តាញ ផ្លូវបេតុង និង កៅស៊ូ ក្នុងលបំណងលើកកម្ពស់ សោភ័ណភាពបរិស្ថាន។
លោក លី មីណា អភិបាលក្រុងស្ទឹងត្រែង បានគូសបញ្ជាក់ថា គម្រោងស្ថាបនាផ្លូវបេតុង និងផ្លូវកៅស៊ូនៅក្នុងភូមិសាស្ត្រភូមិភ្នំធាតុនេះ ត្រូវបានអនុវត្តដោយប្រើប្រាស់កញ្ចប់ថវិកាមូលនិធិសង្កាត់ ក្រុង និងខេត្តហើយបច្ចុប្បន្នត្រូវបានសាងសង់រួចរាល់ជាស្ថាពរ ១០០% ហើយ។
លោកអភិបាលក្រុងបានមានប្រសាសន៍សង្កត់ធ្ងន់ថា៖ផ្អែកលើគោលការណ៍ដឹកនាំរបស់លោក អភិបាលខេត្តស្ទឹងត្រែង យើងបានកំណត់យកភូមិភ្នំធាតុនេះធ្វើជាភូមិស្បែកខៀវនិងផ្លូវបេតុង។មកទល់ពេលនេះយើងសម្រេចបាន ១០០% ក្នុងការបញ្ចប់ផ្លូវដី និងផ្លូវ គ្រួសក្រហមនៅក្នុងភូមិទាំងមូល ។
ជាមួយគ្នានេះ លោក លី មីណា ក៏បានអំពាវនាវដល់បងប្អូនប្រជាពលរដ្ឋ ដែលរស់នៅតាមបណ្តោយផ្លូវនីមួយៗចូលរួមរៀបចំសោភ័ណភាពនិងថែរក្សាអនាម័យបរិស្ថាននៅមុខផ្ទះរៀងៗខ្លួនដើម្បីរួមគ្នាបោះជំហានទៅជាភូមិគំរូដ៏ពិតប្រាកដមួយ។
ការផ្លាស់ប្តូរមុខមាត់ថ្មីនេះ បានបង្កើតជាក្តីត្រេកអរយ៉ាងខ្លាំងពីសំណាក់ប្រជាពលរដ្ឋមូលដ្ឋាន។លោកស្រីសោភា អាជីវករលក់ដូរចំណីអាហារនៅក្នុងភូមិភ្នំធាតុ បានសម្តែងការគាំទ្រយ៉ាងពេញទំហឹងចំពោះយន្តការអភិវឌ្ឍន៍នេះ។ លោកស្រីបានរំឮកពីការលំបាកកាលពីមុនថា ពេលរដូវវស្សាមកដល់ ផ្លូវដីតែងតែដក់ទឹក បែកភក់ ដែលបង្កការលំបាកខ្លាំងដល់ការធ្វើដំណើរ ជាពិ
សេសកូនចៅត្រូវទៅសាលារៀន ប៉ុន្តែបច្ចុប្បន្នមានផ្លូវបេតុងខ្វាត់ខ្វែងដល់មុខផ្ទះ ដែលធ្វើឱ្យការរស់នៅមានភាពស៊ីវិល័យជាងមុន។
ស្របគ្នានេះដែរ លោក ឈរ ឡេងហុង មេភូមិភ្នំធាតុ បានលើកឡើងថា ហេដ្ឋារចនាសម្ព័ន្ធផ្លូវថ្នល់ដ៏ល្អស្អាតនេះ គឺជាភស្តុតាងសហការ និងការយកចិត្តទុកដាក់ខ្ពស់ពីសំណាក់អាជ្ញាធរខេត្តនិងក្រុងក្នុងការលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋ។ លោកមេភូមិបានកត់សម្គាល់ថា ក្រោយពេលផ្លូវស្អាត ភូមិភ្នំធាតុទទួលបានការទាក់ទាញភ្ញៀវធ្វើដំណើរឆ្លងកាត់និងមកកម្សា
ន្ត កាន់តែច្រើន ដែលជួយឱ្យអាជីវករលក់ដូរដាច់ និងរកចំណូលបានកាន់តែប្រសើរឡើង។
សូមបញ្ជាក់ថា ក្រៅពីការសម្រេចបាននូវបណ្តាញផ្លូវខ្វាត់ខ្វែងគ្មានផ្លូវដី រដ្ឋបាលក្រុងស្ទឹងត្រែង ក៏កំពុងបន្តជំរុញឱ្យភូមិភ្នំធាតុ ក្លាយជាគំរូឈានមុខគេលើផ្នែក «បរិស្ថានស្អាត» ផងដែរ ដោយទាមទារឱ្យមានការចូលរួមយ៉ាងសកម្មពីប្រជាពលរដ្ឋ ក្នុងការគ្រប់គ្រងកាកសំណល់ និងថែរក្សាភាពបៃតងតាមដងផ្លូវ ដើម្បីលើកកម្ពស់មុខមាត់ខេត្តស្ទឹងត្រែងទាំងមូល៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ