សហរដ្ឋអាមេរិក ៖ ជាការត្រៀមខ្លួនក្នុងការទាត់បាល់ប៉េណាល់ទីកាត់សេចក្តីព្រឹត្តិការណ៍ World Cup ឆ្នាំ ២០២៦ ក្រុមជម្រើសជាតិសហរដ្ឋអាមេរិកក្នុងនាមសហម្ចាស់ផ្ទះបានប្រើប្រាស់បច្ចេកវិទ្យារលកសញ្ញាខួរក្បាល ដើម្បីបង្កើនកម្រិតផ្ដោតអារម្មណ៍កីឡាករឱ្យបានល្អបំផុត។ ដ្បិតការធ្លាក់របស់ក្រុមខ្លាំងអាល្លឺម៉ង់ និងហូឡង់ ត្រឹមវគ្គ ៣២ ក្រុមចុងក្រោយ ដោយការទាត់ប៉េណាល់ទីកាត់សេចក្តី គឺជាមេរៀនដ៏ភ្ញាក់ផ្អើលមួយ សម្រាប់ដទៃទៀត ដែលកំពុងបន្តប្រកួតប្រជែង។ នេះបើតាមប្រភពពី The New York Times និង Znews ចេញផ្សាយនៅថ្ងៃទី១ ខែកក្កដា ឆ្នាំ២០២៦។
តាមរយៈកិច្ចសហការជាមួយក្រុមហ៊ុនអាល្លឺម៉ង់ Neuro11 ក្រុមការងារគ្រូបង្វឹករបស់ម្ចាស់ផ្ទះអាមេរិក បានបំពាក់ឧបករណ៍ចាប់សញ្ញា (Sensor) កម្រិតខ្ពស់ដល់កីឡាករទាំងអស់ ដើម្បីតាមដានសកម្មភាពប្រព័ន្ធប្រសាទ អំឡុងពេលហ្វឹកហាត់។ ទិន្នន័យនេះអនុញ្ញាតឱ្យអ្នកជំនាញវាស់វែងពីកម្រិតនៃការផ្ដោតអារម្មណ៍ ផ្អែកលើវិទ្យាសាស្ត្រ ដោយកំណត់បានស្ថានភាពផ្លូវចិត្តដ៏ល្អបំផុត និងជ្រុងនៃការទាត់បាល់ដែលសមស្របបំផុតសម្រាប់កីឡាករម្នាក់ៗ នៅលើចំណុចប៉េណាល់ទី។
កីឡាករត្រូវបានបំពាក់ឧបករណ៍ចាប់សញ្ញាលើក្បាល និងឧបករណ៍បញ្ជូនសញ្ញានៅលើពោះ ដើម្បីកត់ត្រាសកម្មភាពនៅក្នុងផ្នែកបញ្ជាចលនា និងខួរក្បាលផ្នែកខាងមុខ។យោងតាមការសិក្សា នៅពេលដែលកីឡាករមានអារម្មណ៍ភ័យ ឬបារម្ភខ្លាំងពីការទាត់នោះ ខួរក្បាលផ្នែកខាងមុខ នឹងដំណើរការខ្លាំងជាងមុន ដែលនាំឱ្យមានហានិភ័យខ្ពស់ក្នុងការទាត់ខុសគោលដៅ។ ផ្ទុយទៅវិញ ការរក្សាបានកម្រិតផ្ដោតអារម្មណ៍ថេរ នឹងនរ ជួយឱ្យកីឡាករឈានដល់ស្ថានភាពមួយហៅថា ស្ថានភាពធ្វើអ្វីមួយបានល្អបំផុត ដែលអាចជម្រុះចោលរាល់សម្ពាធទាំងឡាយ ពីសំឡេងហ៊ោកញ្ជ្រៀវរបស់ទស្សនិកជន ឬការឌឺដងពីអ្នកចាំទី។
ការរៀបចំនេះបានក្លាយជាការងារដ៏សំខាន់បំផុត មុនពេលការប្រកួតក្នុងវគ្គ៣២ក្រុមចុងក្រោយរបស់សហរដ្ឋអាមេរិកទល់នឹងបូស្នី នៅម៉ោង៧ព្រឹកថ្ងៃទី២ ខែកក្កដា (ម៉ោងនៅកម្ពុជា) ដោយកីឡាករអាមេរិកត្រូវប្រឈមមុខជាមួយអ្នកចាំទី Nikola Vasilj ដែលមានប្រវត្តិសង្គ្រោះបាល់ប៉េណាល់ទីយ៉ាងល្អ រហូតដល់ទៅ ៣៧,២%។
ដោយសារតែការប្រើប្រាស់ទិន្នន័យវិទ្យាសាស្ត្រជំនួសឱ្យការស្មានតាមអារម្មណ៍ អាមេរិកសង្ឃឹមថានឹងអាចជៀសផុតពីការធ្លាក់ចេញពីការប្រកួតទាំងព្រឹកព្រលឹម ដូចជាអាល្លឺម៉ង់ និងហូឡង់ ដែលទើបតែហាលអាវ បន្ទាប់ពីចាញ់ការទាត់ប៉េណាល់ទីកាត់សេចក្តីយ៉ាងតានតឹង។
នាពេលបច្ចុប្បន្ន ព័ត៌មានលម្អិតផ្នែកបច្ចេកវិទ្យាកម្រិតខ្ពស់ និងស៊ីជម្រៅ ត្រូវបានរក្សាទុកជាការសម្ងាត់ ដើម្បីការពារផលប្រយោជន៍ និងអត្ថប្រយោជន៍ក្នុងការប្រកួតប្រជែងរបស់ក្រុមម្ចាស់ផ្ទះ នៅក្នុងព្រឹត្តិការណ៍ប្រកួតឆ្នាំនេះ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ