ឧបករណ៍នេសាទខុសច្បាប់ជាច្រើន លួចប្រើប្រាស់ នារដូវបិទនេសាទ ត្រូវបានក្រុមការងារចម្រុះចុះបង្ក្រាប កា.ប់បំផ្លាញចោល និងលែងកូនត្រីចូលបឹងទន្លេសាបវិញជាង ៥០គីឡូ
- សៀមរាប
ខេត្តសៀមរាប ៖ កាលពីថ្ងៃទី២៩ ខែមិថុនា ឆ្នាំ ២០២៦ នេះ លោក ហាយ យង់ អភិបាលរងក្រុង តំណាង លោក នួន ពុទ្ធារ៉ាអភិបាល នៃគណៈអភិបាលក្រុងសៀមរាប បានដឹកនាំក្រុម ការងារចម្រុះ និងសហគមន៍ នេសាទចុង ឃ្នៀស សហការជាមួយ ក្រុមអន្តរាគមន៍ថ្នាក់ជាតិ ចុះទប់ស្កាត់ និងបង្ក្រាបបទល្មើសជល ផលបឹងទន្លេសាបប្រចាំស្នាក់ការកំពង់ភ្លុកអធិការដ្ឋានរដ្ឋបាលជលផលខាងជើងបឹង ទន្លេសាប ផ្នែករដ្ឋបាលជលផល ចុង ឃ្នៀស និងសង្កាត់រដ្ឋបាលជលផលភ្នំក្រោម និងកម្លាំងកងទ័ព ចំណុះយោធភូមិភាគទី៤ និងយោធភូមិភាគទី៥ សរុបចំនួន ២៤ នាក់ បានប្រើប្រាស់កាណូតចំនួន០៥គ្រឿងចេញ ប្រត្តិបត្តការណ៍ ល្បាតត្រួតពិនិត្យ នឹងបង្ក្រាបបទល្មើសនេសាទ ចាប់ពីចំណុចមាត់ពាមចុង ឃ្នៀស រហូតដល់ចំណុច ជ្រោយពពាយ អូរប្រតប់ ស្ថិតក្នុង សង្កាត់ចុងឃ្នៀស ក្រុង/ខេត្តសៀមរាប ។
លោក ហាយ យង់ អភិបាលរងក្រុង បានមានប្រសាសន៍ ប្រាប់ភ្នាក់ងារកោះសន្តិភាពយើង នៅវេលាម៉ោង ៩និង៣០ នាទី ព្រឹកថ្ងៃទី១ ខែកក្កដា ឆ្នាំ២០២៦នេះថា ការចុះប្រតិបត្តិការបង្ក្រាបបទល្មើសនេសាទ ចាប់ពីចំណុចមាត់ពាមចុងឃ្នៀស រហូតដល់ចំណុច ជ្រោយពពាយ អូរប្រតប់ ស្ថិតក្នុងសង្កាត់ចុងនឃ្នៀស ក្រុងសៀមរាប ខេត្តសៀមរាបនេះ បានធ្វើការដកហូត និងរុះរើ ឧបករណ៍នេសាទខុសច្បាប់ ដូចជា ឧបករណ៍ របាំងស្បៃមុងចំនួន ៧៥ ខ្សែ ប្រវែង៣៧៥០ ម៉ែត្រ ក្បាលលូស្បៃមុងចំនួន ៧៥ គ្រឿង បង្គោលចំរឹងចំនួន៦៥០ ដើម និង លបប្រើស១០០ ឬលបកន្ទុយកណ្តុរ ចំនួន ០៩ គ្រឿង ព្រមទាំងបានលែងកូនត្រីចំរុះចូលក្នុងបឹងធម្មជាតិវិញ បានចំនួនប្រមាណ ៥០គីឡូក្រាមផងដែរ។ ចំពោះ ម្ចាស់ បទល្មើស បានគេចខ្លួនបាត់ ខណៈ កម្លាំង យើង ចុះទៅដល់ ប្រហែលមានអ្នករាយការណ៍ប្រាប់មុន។
លោក បញ្ជាក់ថា សូមដល់បងប្អូន ប្រជានេសាទជ្រាបថា យោងតាមសេចក្ដីជូនដំណឹង របស់អគ្គនាយកដ្ឋានជលផល ដែលចេញវផ្សាយកាលពីថ្ងៃទី២១ ខែឧសភា ឆ្នាំ២០២៦ កន្លងទៅ បានណែនាំឱ្យសាធារណជន និងអ្នកនេសាទទាំងអស់ ចូលរួមសហការ អនុវត្ត ដើម្បីថែរក្សាការពារធនធានជលផល ឱ្យបានគង់វង្ស ចាប់ពីថ្ងៃទី១ ខែមិថុនា ដល់ថ្ងៃទី៣០ ខែកញ្ញា ឆ្នាំ២០២៦ ហាមធ្វើនេសាទទ្រង់ ទ្រាយធំ ក្នុងតំបន់គ្រប់គ្រងដោយជល ផលទឹកសាប ជាពិសេសនៅតាមបណ្ដាខេត្ត ជុំវិញបឹងទន្លេរសាប ក្នុងនោះក៏មាន ខេត្តសៀមរាប យើងផងដែរដើម្បីរក្សាទុក ឱ្យត្រីពងកូន នៅ ក្នុងរដូវវស្សា ខាងមុខនេះ ដោយក្នុងរយៈ ពេលបិទនេសាទនេះ អ្នកនេសាទទាំង អស់ ត្រូវប្រើតែឧបករណ៍នេសាទខ្នាតតូច ស្របនតាម បទប្បញ្ញត្តិច្បាប់ ស្តីពីជលផល នៃព្រះរាជាណាចក្រកម្ពុជា ផងដែរ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ