មិនមែនកាណូតចម្លងខូចទេ គឺម្ចាស់កំពង់ដររកស៊ីខាត
- កំពង់ចាម
ខេត្តកំពង់ចាម ៖ កំពង់ដរស្វាយស្រណោះ-ព្រែកពោធិ៍ ដែលមានទីតាំងស្ថិតនៅភូមិស្វាយស្រណោះទី១ ឃុំរកាអា ស្រុកកងមាស ក្រោយពីបានផ្អាកធ្វើអាជីវកម្មរយៈពេលមួយខែដោយម្ចាស់ប្រាប់ថាជួសជុលកាណូត។នៅទីបំផុតបានដឹងការពិតហើយមកដល់ពេលនេះនៅតែមិនឆ្លងដដែលព្រោះតែចំណាយពេលឆ្លងម្ដងៗយូរពេកចូលខ្យល់។
លោកយី កុណា ប្រធានការិយាល័យទ្រព្យរដ្ឋនៃមន្ទីរហិរញ្ញវត្ថុខេត្តបានប្រាប់ឲ្យដឹងនាល្ងាចថ្ងៃទី៣០មិថុនា ឆ្នាំ ២០២៦ថា: ជាធម្មតាក្នុងរយៈពេលមួយឆ្នាំម្ដងគឺមន្ត្រីជំនាញរបស់មន្ទីរចុះទៅត្រួតពិនិត្យទីតាំងវិនិយោគកំពង់ដរ (ស្វាយស្រណោះ-ព្រែកពោធិ៍) ។ មកដល់ពេលនេះគឺម្ចាស់បានដាក់ពាក្យសុំឈប់ធ្វើអាជីវកម្មបន្តទៀតហើយ ដោយសារតែកត្តាដីកោះនៅកណ្ដាលទន្លេមេគង្គ បានដុះលយវែងហើយត្រូវប្រើពេលយូរក្នុងការឆ្លង។
លោកជា ម៉ាប់ ម្ចាស់វិនិយោគកំពង់ដរ(ស្វាយស្រណោះ-ព្រែកពោធិ៍) បានប្រាប់តាមទូរសព្ទឱ្យដឹងថា រូបលោកបានដាក់ពាក្យសុំឈប់ធ្វើអាជីវកម្មនៅទីនេះរយៈពេលមួយខែមកហើយ ដោយសារតែសព្វថ្ងៃកោះនៅកណ្ដាលទន្លេបានដុះកន្ទុយលយទៅដល់ទុរី ក្នុងពេលដែលបើកឆ្លងកាត់ទទឹងទន្លេម្ដងៗ ត្រូវប្រើពេលយ៉ាងហោចណាស់កន្លះម៉ោង។ ដែលពីមុនមកគ្រាដែលកោះមិនទាន់ដុះគឺប្រើពេលប្រមាណ១០នាទីនិងត្រូវដឹកអ្នកដំណើរឆ្លងពីស្វាយស្រណោះមកដល់ព្រែកពោធិ៍ ហើយ ។ ពេលដែលកំពង់ដរនេះមិនមានកាណូតឆ្លងគឺបងប្អូនប្រជាពលរដ្ឋមិនរង់ចាំយូរដូចមុនទៀតទេ ។ ដោយពួកគាត់ត្រូវធ្វើដំណើរទៅឆ្លងនៅថ្លុកជ្រៅ ចាក់ទៅមាន់ដប់ស្រុកស្រីសន្ធរ ប្រើពេលប្រមាណ៥នាទីនិងដល់។ មួយវិញទៀតបានរកទីតាំងផ្សេងទៀតដើម្បីរៀបចំកំពង់ដរ តែមិនមានលក្ខណៈអំណោយផលដោយសារច្រាំងទន្លេបាក់បន្តបន្ទាប់រាល់ឆ្នាំហើយថែមទាំងមានចំណោតខ្លាំងទៀតផង។
គួររំលឹកថា ពីមុនមកកំពង់ដរស្វាយស្រណោះ-ព្រែកពោធិ៍នេះ ត្រូវបានអាក់ខានមិនមានកាណូតឆ្លងមួយខែ។
ចំណែកម្ចាស់អាជីវកម្មវិញគឺលោកជា ម៉ាប់ បានធ្លាប់អះអាងថា ពេលណាកាណូតជួសជុលរួចរាល់ហើយនិងត្រូវដាក់ដំណើរការធ្វើអាជីវកម្មឡើងវិញ។ឥឡូវដឹងការពិតហើយគឺម្ចាស់វិនិយោគសម្រេចសុំលុបចោលធ្វើអាជីវកម្មនៅតំបន់នេះ ដោយសារតែកត្តាធម្មជាតិគឺកោះនៅកណ្ដាលទន្លេដុះវែងហើយពេលឆ្លងត្រូវចាយពេលយូរធ្វើឱ្យម្ចាស់ចូលខ្យល់(ខាតលុយ) ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ