ទីក្រុងសេអ៊ូល ៖ លោក Hong Myung-bo អតីតគ្រូបង្វឹកក្រុមបាល់ទាត់ជម្រើសជាតិកូរ៉េខាងត្បូង បានក្លាយជាមនុស្សគេស្អប់បំផុតក្នុងប្រទេសកំណើត បន្ទាប់ពីក្រុមរបស់លោកធ្លាក់ចេញពីព្រឹត្តិការណ៍ World Cup ឆ្នាំ២០២៦ ហើយសូម្បីតែប្រធានាធិបតីប្រទេសនេះ ក៏បានរិះគន់ការដឹកនាំរបស់លោកជាសាធារណៈ និងបញ្ជាឱ្យមានការស៊ើបអង្កេតក្រុមភ្លាមៗផងដែរ។ នេះបើតាមប្រភពពីកាសែត The Sun, CNA និងប្រភពផ្សេងទៀត បានចេញផ្សាយ។
ការធ្លាក់ចេញពី World Cup ឆ្នាំ ២០២៦ ត្រឹមវគ្គចែកពូល បានបង្កឱ្យមានរលកកំហឹងយ៉ាងខ្លាំងទូទាំងប្រទេសកូរ៉េខាងត្បូង ដែលឈានទៅដល់ការលាលែងពីតំណែងរបស់លោក Hong ជាគ្រូបង្វឹកក្រុមជម្រើសជាតិ បន្ទាប់ពីការរិះគន់ជាសាធារណៈយ៉ាងចាស់ដៃពីប្រធានាធិបតីកូរ៉េខាងត្បូង លោក Lee Jae Myung។
ប្រធានាធិបតីកូរ៉េខាងត្បូងបានសរសេរនៅលើបណ្តាញសង្គមដូច្នេះថា «នៅពេលដែលមនុស្សគ្មានសមត្ថភាពត្រូវបានជ្រើសរើសជាអ្នកដឹកនាំ លទ្ធផលគឺច្បាស់ណាស់ដូចថ្ងៃនេះអញ្ចឹង»។ មិនតែប៉ុណ្ណោះ លោកបានអំពាវនាវឱ្យមានការស៊ើបអង្កេតស៊ីជម្រៅបន្ទាន់មួយ ដឹកនាំដោយក្រសួងវប្បធម៌ កីឡា និងទេសចរណ៍ លើការចំណាយថវិកាជាតិ និងការគ្រប់គ្រងរបស់សមាគមកីឡាបាល់ទាត់ជាតិផងដែរ។
ក្រៅអំពីការរិះគន់ពីមេដឹកនាំកំពូលប្រទេស លោក Hong ក៏រងការរិះគន់យ៉ាងចាស់ដៃពីអ្នកគាំទ្រ តាំងពីការសម្រេចចិត្តដាក់ប្រធានក្រុម Son Heung-min ឱ្យអង្គុយកៅអីបម្រុងក្នុងវគ្គទី១ ពេលប្រកួតជាមួយអាហ្វ្រិកខាងត្បូង។ លើសពីនេះទៀត ប៉ុស្តិ៍ទូរទស្សន៍ជាតិ KBS ថែមទាំងបិទបាំងមុខ (Blur) លោក Hong អំឡុងពេលរាយការណ៍ព័ត៌មានអំពីការធ្លាក់ចេញក្រុមជម្រើសជាតិផងដែរ។
កាន់តែខ្លាំងថែមទៀតនោះ រូបភាពជាច្រើនត្រូវបានចែករំលែកនៅលើបណ្តាញសង្គម បង្ហាញពីហាងលក់ដូរ និងផ្សារទំនើបមួយចំនួនក្នុងប្រទេសកូរ៉េខាងត្បូង បានបិទផ្លាកបដិសេធមិនឱ្យលោក Hong ចូលក្នុងហាងរបស់ពួកគេឡើយ។ ទន្ទឹមនឹងនេះ ក៏មានការគំរាមកំហែងដល់សុវត្ថិភាពផ្ទាល់ខ្លួន រហូតដល់មានការដាក់ពង្រាយកម្លាំងប៉ូលិសការពារនៅព្រលានយន្តហោះពេលក្រុមត្រឡប់មកមាតុភូមិវិញថែមទៀតផង។
គួរបញ្ជាក់ថា កាលពីថ្ងៃទី២៨ ខែមិថុនា ឆ្នាំ២០២៦ កន្លងទៅ លោក Hong Myung-bo បានប្រកាសលាលែងពីតំណែង ដោយទទួលខុសត្រូវទាំងស្រុងចំពោះការបរាជ័យដ៏ធំធេងមួយនេះ។ លោកបានថ្លែងដូច្នេះថា «វាមិនមែនជាការសម្រេចចិត្តដ៏ងាយស្រួលនោះទេសម្រាប់ខ្ញុំក្នុងការទទួលយកតួនាទីនេះ ប៉ុន្តែនៅពេលខ្ញុំបានទទួលយកហើយ ខ្ញុំមិនបានគិតពីអ្វីផ្សេងក្រៅពីការទទួលខុសត្រូវរហូតដល់នាទីចុងក្រោយនោះទេ»។
នៅក្នុងនាមជាអតីតខ្សែការពារធ្លាប់លេងឱ្យជម្រើសជាតិកូរ៉េខាងត្បូងចំនួន ១៣៦ ប្រកួតនោះ លោក Hong បានកាន់តំណែងដ៏សំខាន់នេះ តាំងពីឆ្នាំ ២០២៤ ហើយលោកបាននិយាយថា លោកសុំទទួលយកការទទួលខុសត្រូវទាំងស្រុង ចំពោះយុទ្ធនាការ World Cup ដែលមិនទទួលបានជោគជ័យនេះផងដែរ៕
ចែករំលែកព័តមាននេះ