ទីក្រុងឡុង៖ ថ្ងៃនេះ តម្លៃប្រេងឆៅនៅនឹងល្អ មានន័យថាមិនហក់ឡើងខ្លាំងពេកទេ បន្ទាប់ពីអ៊ីរ៉ង់ និងអាមេរិកឯកភាពគ្នាថានឹងបិទបញ្ចប់អរិភាពនៅឈូងសមុទ្រពែក្ស និងបន្ទាប់ពីគេសង្កេតឃើញថាបណ្ដាប្រទេសផលិតប្រេងធំៗនៅតំបន់ឈូងសមុទ្រនៅតែនាំចេញប្រេងឆៅ និងហ្គាសទៅកាន់ទីផ្សារពិភពលោកដូចធម្មតា។ ប្រទេសទាំង២ក៏ឯកភាពគ្នាផងដែរថានឹងបើកការចរចាឡើងវិញនៅក្នុងបញ្ហាច្រកសមុទ្រហ័រម៉ូស។ ដូចនេះ ធ្វើឱ្យគេមានសង្ឃឹមថាកិច្ចព្រមព្រៀងដ៏ផុយស្រួយអាចនឹងមានជីវិតរស់នៅជាបន្តទៀត។
ប្រេងឆៅតាមហាងឆេងទ្វីបអឺរ៉ុប (Brent) ឡើងថ្លៃត្រឹមតែ៤សេនប៉ុណ្ណោះក្នុងមួយបារ៉ែល។ ពោលគឺលក់ចេញថ្លៃ៧២,០៣ដុល្លារ។ ចំណែកប្រេងឆៅតាមហាងឆេងនៅអាមេរិក (West Texas) ឡើងថ្លៃ៤៤សែន លក់ចេញ៦៩,៦៧ដុល្លារក្នុងមួយបារ៉ែល។ អ្នកវិភាគយល់ថានៅតែមានហានិភ័យសម្រាប់ទីផ្សារប្រេងឆៅពិភពលោក។ ទោះជាបែបនេះក្ដី គេចង់ផ្ដោតសំខាន់ទៅលើការធ្វើឱ្យមានលំហូរផ្គត់ផ្គង់ប្រេងឆៅដើម្បីឱ្យមានតុល្យភាពនៅលើទីផ្សារពិភពលោក។
គំនិតសុទិដ្ឋិនិយមនេះមានលក្ខណៈច្បោលៗ ហើយច្បាស់ណាស់ថានឹងបន្សល់ទុកនូវហានិភ័យមិនតិចនោះទេប្រសិនបើការព្យា យាមបង្កើនបរិមាណផ្គត់ផ្គង់ប្រេងឆៅឱ្យដូចដើមវិញបែរជាមានដំណើរការយឺតយ៉ាវ។ ប្រេងឆៅតាមហាងឆេងនៅអឺរ៉ុបធ្លាក់ថ្លៃ១០,៦%កាលពីសប្ដាហ៍មុន។ នេះជាការធ្លាក់ចុះជាលើកទីបីបន្ទាប់ពីកប៉ាល់ធំៗចាប់ផ្ដើមដឹកប្រេងចេញពីច្រកហ័រម៉ូសនៅក្នុងបរិមាណច្រើនបំផុតចាប់តាំងពីសង្គ្រាមអ៊ីរ៉ង់ផ្ទុះឡើង។
បណ្ដាប្រទេសផលិតប្រេងនៅតំបន់ឈូងសមុទ្រពែក្សនៅតែបន្តដឹកប្រេង និងហ្គាសចេញដូចធម្មតាទោះបីមានការវាយប្រហារកាលពីពេលថ្មីៗនេះនៅច្រកសមុទ្រហ័រម៉ូស និងទោះបីអ៊ីរ៉ង់ និងអាមេរិកចាប់ផ្ដើមវាយប្រហារគ្នាកាលពីសប្ដាហ៍មុនយ៉ាងណាក្ដី។ ក្រុមហ៊ុនផលិតប្រេងខ្នាតយក្សរបស់អារ៉ាប៊ីសាអូឌីតចាប់ផ្ដើមនាំចេញប្រេងឆៅពីដេប៉ូរបស់ខ្លួននៅរ៉ាស់ថានូរ៉ា (Ras Tanura) ស្ថិតនៅខាងលិចច្រកហ័រម៉ូស។ ការដឹកជញ្ជូននៅតែបន្តដូចធម្មតាទោះបីមានហេតុការណ៍ធ្លាក់ឧទ្ធម្ភាគចក្រមួយគ្រឿងរបស់ក្រុមហ៊ុនខាងលើនេះកាលពីថ្ងៃអាទិត្យ បណ្ដាលឱ្យស្លាប់មនុស្ស១៤នាក់។ មូលហេតុនៃការធ្លាក់នេះមិនទាន់ដឹងនៅឡើយទេ៕ ប្រភព៖ Channel News Asia
ចែករំលែកព័តមាននេះ