តេជោលីគរដូវកាលទី៣ រកឃើញក្រុមខ្លាំងចំនួន៤ឡើងទៅកាន់វគ្គពាក់កណ្ដាលផ្ដាច់ព្រ័ត្រ
- ភ្នំពេញ
រាជធានីភ្នំពេញ ៖ ព្រឹត្តិការណ៍បាល់ទះដ៏ធំប្រចាំប្រទេស «តេជោលីគ» រដូវកាលទី៣ ឆ្នាំ២០២៦ បានរកឃើញក្រុមខ្លាំងទាំង៤រួចរាល់ហើយដើម្បីឡើងទៅកាន់វគ្គពាក់កណ្ដាលផ្ដាច់ព្រ័ត្រ បន្ទាប់ពីឆ្លងកាត់ការប្រកួតយ៉ាងស្វិតស្វាញ និងកក្រើកបំផុតកាលពីថ្ងៃទី២៧ និង២៨ ខែមិថុនា ឆ្នាំ២០២៦ ។
ពានរង្វាន់កីឡាបាល់ទះ តេជោលីគរដូវកាលទី៣ បានធ្វើការប្រកួតយ៉ាងជក់ចិត្តនៅវិមានពហុកីឡដ្ឋានជាតិអូឡាំពិកដោយមានការចូលរួមពីបណ្តាក្លិបធំៗ និងមានការដោះដូរកីឡាករទាំងជាតិ និងអន្តរជាតិដើម្បីបង្កើនសមត្ថភាពក្រុម។
ឆ្លងកាត់ការប្រកួតជម្រុះតាមដំណាក់កាលជុំទី១ និងជុំទី២ យ៉ាងតានតឹង រូបមន្តប្រកួតបានតម្រូវឱ្យយកតែក្រុមកំពូលតារាងចំនួន៤គត់ ដែលមានពិន្ទុខ្ពស់ជាងគេ ដើម្បីទទួលបានកៅអីមាសឡើងទៅប្រជែងគ្នានៅវគ្គពាក់កណ្តាលផ្តាច់ព្រ័ត្រ។
យោងតាមទម្រង់លេង និងលទ្ធផលបច្ចេកទេស ក្លិបបាល់ទះលំដាប់កំពូលដែលបានបង្ហាញភាពលេចធ្លោ និងដណ្តើមបានកៅអីវគ្គ Top 4 រួមមាន៖
១-សមាគមបាល់ទះវិសាខា ជាក្រុមខ្លាំងដែលមានសមត្ថភាពខ្ពស់ និងរក្សាទម្រង់លេងបានយ៉ាងល្អដោយលេង៥ប្រកួតឈ្នះទាំង៥ប្រកួតមាន១៤ពិន្ទុ។
២-ក្លិបបាល់ទះបញ្ជាការដ្ឋានអង្គរក្សជាក្រុមការពារតំណែងជើងឯកដែលពោរពេញដោយបទពិសោធន៍ និងកីឡាករឆ្នើមៗ ដោយលេង៥ប្រកួត ឈ្នះ៤ ចាញ់១ មាន១២ពិន្ទុ។
៣-ក្រុមកីឡាបាល់ទះស្នងការដ្ឋាននគរបាលខេត្តស្វាយរៀង ជាក្រុមដែលមានយុទ្ធសាស្ត្រលេងយ៉ាងស្វិតស្វាញដោយលេងបាន៥ប្រកួតឈ្នះ៣ ចាញ់២ មាន៩ពិន្ទុ និង
៤- ក្រុមកីឡាបាល់ទះស្នងការដ្ឋាននគរបាលរាជធានីភ្នំពេញ ជាក្រុមដែលបានតស៊ូយ៉ាងខ្លាំងក្លារហូតដណ្តើមបានកៅអីឱកាសចុងក្រោយដោយលេង៥ប្រកួតឈ្នះ២ ចាញ់៣ មាន៦ពិន្ទុ។
ចំណែកឯក្រុមកម្រិតក្រោម ដូចជាក្រសួងមហាផ្ទៃ, ស្នងការដ្ឋាននគរបាលខេត្តកោះកុង,ស្នងការដ្ឋាននគរបាលខេត្តព្រះសីហនុ និងក្រុមកងពលធំអន្តរាគមន៍លេខ៣ ត្រូវខកខានឱកាស និងធ្លាក់ចេញពីការប្រកួតត្រឹមវគ្គនេះ។
សម្រាប់ការប្រកួតវគ្គពាក់កណ្ដាលផ្ដាច់ព្រ័ត្រដ៏ជក់ចិត្តនេះ នឹងត្រូវធ្វើឡើងតាមរូបមន្តខ្វែងដោយផ្អែកលើចំណាត់ថ្នាក់ពិន្ទុ ។ ក្រុមចំណាត់ថ្នាក់លេខ១ (វិសាខា) ត្រូវជួបប្រកួតជាមួយក្រុមចំណាត់ថ្នាក់លេខ៤(ស្នងការដ្ឋាននគរបាលរាជធានីភ្នំពេញ) និងក្រុមចំណាត់ថ្នាក់លេខ ២ (បញ្ជាការដ្ឋានអង្គរក្ស) ត្រូវជួបប្រកួតជាមួយក្រុមចំណាត់ថ្នាក់លេខ៣(ស្នងការដ្ឋានខេត្តស្វាយ
រៀង)។ យោងតាមការរៀបចំរបស់គណៈកម្មការ ការប្រកួតវគ្គពាក់កណ្ដាលផ្ដាច់ព្រ័ត្រគ្រោងធ្វើឡើងនៅថ្ងៃទី១ ខែកក្កដា ឆ្នាំ២០២៦ ។
ក្រុមដែលទទួលបានជ័យជម្នះនៅក្នុងជំនួបទាំងពីរនេះ នឹងត្រូវឡើងទៅប្រកួតគ្នាដណ្តើមពានរង្វាន់ជើងឯកដ៏អស្ចារ្យប្រចាំរដូវកាលទី៣ នេះ ខណៈក្រុមចាញ់ត្រូវប្រកួតគ្នាដណ្តើមយកចំណាត់ថ្នាក់លេខ៣ ។ ការប្រកួតនេះ មិនត្រឹមតែដើម្បីកិត្តិយស និងពានរង្វាន់នោះទេ ប៉ុន្តែក៏មានការកើនឡើងនូវប្រាក់រង្វាន់លើសពី ១០០ លានរៀលផងដែរ ដែលធ្វើឱ្យការប្រកួតកាន់តែមានភាពទាក់ទាញ និងកក្រើកខ្លាំងសម្រាប់អ្នកគាំទ្របាល់ទះទូទាំងប្រទេស ៕
ចែករំលែកព័តមាននេះ