យោងតាមការចុះផ្សាយរបស់សារព័ត៌មាន CNN បានឱ្យដឹងថា កីឡាករបាល់ទាត់ជនជាតិអាហ្សង់ទីនម្នាក់ ដែលលេងឱ្យក្រុមលីគលំដាប់ទីពីរក្នុងប្រទេសវេណេស៊ុយអេឡា បានបាត់បង់ប្រពន្ធ និងកូនប្រុស-ស្រីពីរនាក់ បន្ទាប់ពីគ្រោះរញ្ជួយដីដ៏ខ្លាំងក្លាមួយបានវាយប្រហារ​កាលពីសប្តាហ៍មុន ។ នេះជាករណីគ្រោះរញ្ជួយដីដ៏អាក្រក់បំផុតក្នុងប្រទេសនេះ ក្នុងរយៈពេលជាងមួយសតវត្សរ៍ ។

​លោក Lucas Trejo អាយុ៣៨ឆ្នាំ ជាកីឡាកររបស់ក្លិប Club Sport Marítimo La Guaira បានចំណាយពេលជិត៣ថ្ងៃចុងក្រោយនេះ ដើម្បីកាយរុក​រកតាមគំនរបាក់បែក ទាំងក្តីសង្ឃឹមថា នឹងរកឃើញភរិយារបស់លោក គឺអ្នកស្រី Yanina រួមទាំងកូនៗរបស់ពួកគេគឺ Aarón និង Ainhoa។

លោក Ricardo Ardiles ដែលជាបងថ្លៃរបស់លោក Trejo បានប្រាប់ CNN Español កាលពីថ្ងៃសុក្រថា៖ «គាត់មានអារម្មណ៍ក្តុកក្តួល និងរំជួលចិត្តយ៉ាងខ្លាំង។ ផ្ទះមាត់សមុទ្ររបស់គ្រួសារគាត់នៅតំបន់ La Guaira ដែលជាចំណុចរងគ្រោះខ្លាំងជាងគេ គឺត្រូវបានបំផ្លិចបំផ្លាញគ្មានសល់អ្វីទាល់តែសោះ»។

​នៅពេលកើតហេតុ គូប្រកួត និងរូបលោកកំពុងស្ថិតនៅក្នុងជំរំហ្វឹកហាត់របស់ក្រុម ក្នុងទីក្រុង Caracas (រដ្ឋធានី)។ ភ្លាមៗនោះ លោកបានប្រញាប់ប្រញាល់ធ្វើដំណើរទៅកាន់ផ្ទះរបស់លោកនៅតំបន់ La Guaira ដែលមានចម្ងាយប្រហែល​១៨​ម៉ាយ (ប្រហែ​ល ២៩ គីឡូម៉ែត្រ) ភាគខាងជើងរដ្ឋធានី។

លោក Ardiles បានរៀបរាប់ថា៖ «អ្វីដែលគាត់បានឃើញ គឺជាទិដ្ឋភាពដ៏គួរឱ្យរន្ធត់បំផុត ។ អគារដែលធ្លាប់មានពីមុន បានក្លាយជាគំនរផេះផង់។ យើងគ្រាន់តែសង្ឃឹមថា ពួកគាត់មិនបានស្ថិតនៅក្នុងផ្ទះនៅពេលនោះទេ»។

សូមបញ្ជាក់ថា អាជ្ញាធរបានប្រកាសកាលពីថ្ងៃអាទិត្យថា មនុស្សជាង​១,៤០០នាក់បានស្លាប់ និងរាប់ពាន់នាក់ផ្សេងទៀតកំពុងបាត់ខ្លួន នៅក្នុងគ្រោះមហន្តរាយទូទាំងប្រទេសវេណេស៊ុយអេឡានេះ ។