ប្រទេសវ៉េណេស៊ុយអេឡា ៖ ទារកទើបនឹងកើតបាន១៨ថ្ងៃអាយុមហាថ្លៃម្នាក់ ត្រូវបានជួយសង្គ្រោះចេញពីគំនរអគារបាក់បែកមួយ ក្រោយជាប់គាំងអស់រយៈពេល៣២ម៉ោង បន្ទាប់ពីគ្រោះរញ្ជួយ២លើកផ្ទួនគ្នា បានវាយប្រហារ និងបំផ្លិចបំផ្លាញទីក្រុងឆ្នេរសមុទ្រមួយរបស់ប្រទេសវ៉េណេស៊ុយអេឡា កាលពីថ្ងៃទី២៤ ខែមិថុនា ឆ្នាំ២០២៦។
វីដេអូដែលត្រូវបានចែករំលែកនៅលើបណ្តាញសង្គម កាលពីថ្ងៃទី ២៦ ខែមិថុនា (ម៉ោងនៅក្នុងស្រុក) បានបង្ហាញឱ្យឃើញពីក្រុមអ្នកជួយសង្គ្រោះ កំពុងតែបំពេញការងារយ៉ាងដុតដៃដុតជើងក្រោមពន្លឺភ្លើងហ្វាពីលើគំនរបាក់បែក និងបាននាំទារកនោះចេញមកក្រៅ ចំពេលមានការទះដៃអបអរសាទរយ៉ាងខ្លាំង កាលពីយប់ជ្រៅថ្ងៃទី២៦ ខែមិថុនា នៅក្នុងទីក្រុង La Guaira ដែលជាទីក្រុងរងគ្រោះធ្ងន់ធ្ងរបំផុត ស្ថិតនៅឯភាគខាងជើងរដ្ឋធានីការ៉ាកាស (Caracas)។
វីដេអូដដែលនោះបានបង្ហាញក្រុមជួយសង្គ្រោះបានហុចទារកដែលរុំក្នុងភួយនោះបន្តគ្នាពីមនុស្សម្នាក់ទៅមនុស្សម្នាក់យ៉ាងប្រុងប្រយ័ត្នជាទីបំផុត មុនពេលជូតសម្អាតខ្លួនទារកនោះថ្នមៗដោយប្រើក្រដាសជូតមាត់។ យោងតាមគណនីអ្នកប្រើប្រាស់បណ្តាញសង្គមម្នាក់ឈ្មោះ Andreina Quintero ដែលជាអ្នកបង្ហោះវីដេអូនោះ បានឱ្យដឹងថា ទារកនោះមានអាយុទើបតែ១៨ថ្ងៃប៉ុណ្ណោះ ហើយមិនមានរងរបួសអ្វីទាំងអស់ ក្រោយជាប់គាំងនៅក្រោមគំនរបាក់បែកអស់រយៈពេល៣២ម៉ោង។ ចំណែកឯម្តាយរបស់ទារកនោះ ត្រូវបានជួយសង្គ្រោះចេញមកក្រៅផងដែរ ក្រោយពេលទារកត្រូវបានសង្គ្រោះចេញមកក្រៅបាន១ម៉ោង។
នៅក្នុងវីដេអូបន្តបន្ទាប់មួយទៀតថ្ងៃដដែលនោះ ម្ចាស់គណនីដដែលនោះ បានបង្ហាញពីទិដ្ឋភាពស្ត្រីជាម្តាយកំពុងសម្រាកនៅលើគ្រែពេទ្យ ដោយមានបុគ្គលិកសុខាភិបាលម្នាក់បានប្រាប់នាងថា ទារកមិនមានរងរបួសអ្វីនោះទេ ហើយគ្រូពេទ្យរូបនោះក៏បានសន្និដ្ឋានដែរថា ស្ត្រីជាម្តាយបានជួយសង្គ្រោះជីវិតកូន ដោយការយករាងកាយរបស់ខ្លួន ឬវត្ថុផ្សេងទៀតមកបាំងគ្របពីលើកូន។
បើតាមរបាយការណ៍ចុងក្រោយBIសារព័ត៌មាន CNN និង The Guardian បានបង្ហាញថា ចំនួនអ្នកស្លាប់ដោយគ្រោះរញ្ជួយដីផ្ទួនគ្នា នៅក្នុងប្រទេសវ៉េណេស៊ុយអេឡាបានកើនឡើងដល់ជាង ១ ៤០០ នាក់ហើយ។ ក្រុមអ្នកជួយសង្គ្រោះកំពុងបន្តស្វែងរកអ្នករស់រានមានជីវិត បន្ទាប់ពីគ្រោះរញ្ជួយដីកម្រិត ៧,២ និង ៧,៥ រ៉ិចទ័រ បានវាយប្រហារបន្តបន្ទាប់គ្នាក្នុងពេលមិនដល់តែ១នាទី កាលពីល្ងាចថ្ងៃទី២៤ មិថុនា កន្លងទៅ ដោយបានបំផ្លាញអគារជាច្រើនឱ្យរាបដល់ដីនៅភាគខាងជើងប្រទេស។ លើសពីនេះ យ៉ាងហោចណាស់មានមនុស្សចំនួន ៦៨ ៩០០ នាក់ ត្រូវបានក្រុមគ្រួសាររាយការណ៍ថា បាត់ខ្លួន៕ ប្រភព ៖ AFP
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ