មន្ទីរសាធារណការនិងដឹកជញ្ជូនខេត្តកំពង់ឆ្នាំងនិងរដ្ឋបាលស្រុកទឹកកំពង់ត្រឡាច ចុះរុះរើសាប ខឿនបេតុង និងដែកលើផ្លូវជាតិលេខ ៥ សម្រាប់ចេញ-ចូលលំនៅដ្ឋាន
- កំពង់ឆ្នាំង
ខេត្តកំពង់ឆ្នាំង ៖ សាបបេតុង ដុំប៉េតុង និងដែក ដែលប្រជាពលរដ្ឋរស់នៅដងផ្លូវជាតិលេខ 5 ធ្វើជាឧបករណ៍សម្រាប់ឡើង ម៉ូតូនិង រថយន្ត ឆ្លងពីផ្លូវជាតិចូលលំនៅដ្ឋាន ធ្វើឡើងខុសបច្ចេកទេស អាចបង្កឲ្យមានគ្រោះថ្នាក់ចរាចរណ៍កើតឡើង ជាយថាហេតុ ត្រូវបានមន្ទីរសាធារណការនិងដឹកជញ្ជូនខេត្តកំពង់ឆ្នាំង សហការជាមួយរដ្ឋបាលស្រុកកំពង់ត្រឡាច ធ្វើការរុះរើចេញហើយនៅថ្ងៃទី 2 ខែកក្កដា ឆ្នាំ 2026 នេះ ។
លោក ឆាយ លាភា ប្រធានមន្ទីរសាធារណការនិងដឹកជញ្ជូនខេត្តកំពង់ឆ្នាំងបានឲ្យដឹងថា លើកំណាត់ផ្លូវជាតិលេខ 5 ត្រង់ចំណុចទីរួមស្រុកកំពង់ត្រឡាច មានប្រជាពលរដ្ឋនាំគ្នា ដាក់បេតុង ខ្លះទៀតចាក់បេតុងតែម្ដងលើផ្លូវជាតិ និងខ្លះទៀតដាក់ដែក សម្រាប់ធ្វើជាស្ពានឆ្លងចូលលំនៅដ្ឋាន គឺខុសលក្ខណៈបច្ចេកទេស ដែលនឹងបង្កឲ្យមានគ្រោះថ្នាក់ចរាចរណ៍កើតឡើងជាយថាហេតុ ។លើសពីនេះ ធ្វើឱ្យបាត់បង់សោភណ្ឌភាព ផ្លូវជាតិដ៏ស្រស់ស្អាត ធ្វើឲ្យមានភាពអាណាធិបតេយ្យ ត្រូវបានរុះរើចេញហើយ ដោយខាងមន្ទីរសាធារណការមានលោក ឈួរ ច័ន្ទឬទ្ធី អនុប្រធានមន្ទីរសាធារណៈការដែលដឹកជញ្ជូនខេត្តកំពង់ឆ្នាំង បានដឹកនាំក្រុមការងារ សហការជាមួយរដ្ឋបាលស្រុកកំពង់ត្រឡាច ដឹកនាំដោយ លោក កើត ម៉ាត់ អភិបាលរងស្រុក ដឹកនាំក្រុមការងារនិងសមត្ថកិច្ច ចុះរើសរើចេញទាំងសងខាងផ្លូវជាតិលេខ 5 ចេញហើយ។
លោកប្រធានមន្ទីរសាធារណៈការនិងដឹកជញ្ជូនខេត្តកំពង់ឆ្នាំងបានបញ្ជាក់ទៀតថា នៅមានការធ្វើបែបនេះតាមបណ្ដាទីប្រជុំជនផ្សេងទៀតដូចជា ផ្សារព្រៃខ្មែរ ស្រុករលាប្អៀរ ផ្សារពន្លៃ ស្រុកបរិបូរណ៍ ជាដើម ប៉ុន្តែទាំងនោះគឺមានតិចតួចតែប៉ុណ្ណោះមិនដូចស្រុកកំពង់ត្រឡាច មានបរិមាណច្រើនលើសលប់ ដែលងាយនឹងគ្រោះថ្នាក់ចរាចរណ៍ ធ្វើឱ្យបាត់បង់សម្រាប់ធ្នាប់ និងសោភ័ណ្ឌភាព ។ជាកិច្ចបន្ត លោកសំណូមពរឲ្យអាជ្ញាធរទាំងអស់ចូលរួមទប់ស្កាត់ ការធ្វើបែបនេះជាបន្តទៀត ព្រោះបើពឹងតែលើមន្ត្រីជំនាញ មិនងាយនោះទេ ម្យ៉ាងវិញទៀតក៏សូមសំណូមពរបងប្អូនប្រជាពលរដ្ឋនៅតាមដងផ្លូវ ទី ប្រជុំជនសូមកុំដាក់ដុំបេតុង ចាក់សាបបេតុង និងដាក់ដែក លើដងផ្លូវជាតិបែបនេះគ្រោះថ្នាក់ខ្លាំងណាស់៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ