យោងតាមការចុះផ្សាយរបស់សារព័ត៌មាន BBC News ដែលដកស្រង់ចេញពីទស្សនាវដ្តីសមាគមវេជ្ជសាស្ត្រកាណាដា (Canadian Medical Association Journal) បានរាយការណ៍ថា កុមារាម្នាក់បានបាត់បង់ជីវិត បន្ទាប់ពីត្រូវបានសត្វប្រចៀវមួយក្បាលខាំចំច្រមុះ និងមាត់។

​ហេតុការណ៍ដ៏ខ្លោចផ្សានេះ បានកើតឡើងនៅក្នុងឆ្នាំ២០២៤ អំឡុងពេលដែលក្មេងប្រុសរូបនោះ(មិនត្រូវបានបញ្ចេញឈ្មោះ)ទៅលេងផ្ទះលម្ហែកាយមួយកន្លែងនៅក្នុងខេត្ត Ontario ជាមួយក្រុមគ្រួសារ ។

នៅពេលកើតហេតុ ក្មេងប្រុសរូបនេះ បានវាសសត្វប្រចៀវចេញពីមុខរបស់គាត់ បន្ទាប់មកឪពុករបស់គាត់បានចាប់វាដាក់ក្នុងឆ្នាំងមួយ រួចយកទៅលែងនៅខាងក្រៅផ្ទះវិញ។

ដោយសារតែមិនឃើញមានស្នាមរបួសច្បាស់ៗលើស្បែក និងគិតថា ប្រចៀវនោះមិនមានឥរិយាបថប្លែក ទើបឪពុកម្តាយមិនបាននាំកូនទៅទទួលការចាក់វ៉ាក់សាំង ឬព្យាបាលភ្លាមៗឡើយ ។ ១៩ ថ្ងៃក្រោយមក ក្មេងប្រុសចាប់ផ្តើមមានអារម្មណ៍ស្ពឹក និងហើមនៅលើផ្ទៃមុខ ។

គ្រូពេទ្យដំបូងឡើយបានយល់ច្រឡំថា គាត់មានជំងឺខ្វិនសាច់ដុំមុខមួយចំហៀង (Bell’s palsy) និងជំងឺឆ្លងមេរោគក្នុងមាត់ ទើបចេញត្រឹមថ្នាំប្រឆាំងមេរោគធម្មតាឱ្យលេប។

​ស្ថានភាពជំងឺបានវិវត្តទៅរកភាពធ្ងន់ធ្ងរយ៉ាងលឿន ។  ក្មេងប្រុសរូបនេះ មានអាការៈគ្រុនក្តៅខ្លាំងរហូតដល់​៣៩°C និងមានការពិបាក​លេបទឹកមាត់ វង្វេងវង្វាន់ និងមើលឃើញព្រាលៗ ។

ដោយសារតែស្ថានភាពកាន់តែដុនដាបខ្លាំង គាត់ត្រូវបានគ្រូពេទ្យសង្គ្រោះបន្ទាន់ដោយការដាក់បំពង់ជំនួយដង្ហើម និងបញ្ជូនទៅកាន់បន្ទប់ថែទាំកុមារកម្រិតធ្ងន់ (ICU) ប៉ុន្តែជាអកុសល វាយឺតពេលទៅហើយក្នុងការសង្គ្រោះជីវិតរបស់គាត់។

​ករណីនេះ គឺជាសារដាស់តឿនមួយផងដែរថា រាល់ការប៉ះពាល់ ឬរងការខាំពីសត្វព្រៃ ជាពិសេសសត្វប្រចៀវ ទោះមិនមានរបួសមើលឃើញនឹងភ្នែកក៏ដោយ ត្រូវតែប្រញាប់ទៅជួបគ្រូពេទ្យដើម្បីចាក់វ៉ាក់សាំងការពារជំងឺឆ្កែឆ្កួតជាបន្ទាន់ ព្រោះជំងឺនេះ បើលេចចេញរោគសញ្ញាហើយ គឺមិនអាចព្យាបាលបានឡើយ ។