សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១ ខែកក្កដា ឆ្នាំ២០២៦ (ម៉ោងនៅសហរដ្ឋអាមេរិក) បានធ្វើដំណើរជាលើកដំបូងតាមយន្តហោះ Air Force One ម៉ូដែល Boeing 747-8 ដែលទើបតែបានកែច្នៃរៀបចំឡើងវិញ ដោយយន្តហោះដ៏ប្រណីតតម្លៃ ៤០០ លានដុល្លារអាមេរិក១គ្រឿងនេះ គឺជាអំណោយពីរដ្ឋាភិបាលប្រទេសកាតា។ នេះបើតាមប្រភពពី The Guardian និង ABC News បានចេញផ្សាយ។
លោកប្រធានាធីបតី ត្រាំ ឡើងជិះយន្តហោះថ្មីនេះ ធ្វើដំណើរទៅកាន់រដ្ឋដាកូតាភាគខាងជើង (North Dakota) និងលើកសរសើរមិនដាច់ពីមាត់ថា នេះប្រហែលជាយន្តហោះពាណិជ្ជកម្មដ៏អស្ចារ្យបំផុតមិនធ្លាប់មានពីមុនមកក្នុងប្រវត្តិសាស្ត្រ។ លោកបានប្រាប់អ្នកយកព័ត៌មានមុនពេលឡើងយន្តហោះ នៅមូលដ្ឋានទ័ពអាកាស Joint Base Andrews ដូច្នេះថា «ខ្ញុំបានសួរក្រុមហ៊ុន Boeing ថា តើ១គ្រឿងណាល្អបំផុត? ពួកគេបាននិយាយថា នេះគឺជាយន្តហោះដ៏ល្អបំផុតដែលមិនធ្លាប់មានពីមុនមក»។
ជាមួយគ្នានោះដែរ អ្នកស្រី Mary Bruce ប្រធានផ្នែកឆ្លើយឆ្លងព័ត៌មានប្រចាំសេតវិមានរបស់ទូរទស្សន៍ ABC News ដែលបានធ្វើដំណើរជាមួយលោក ត្រាំ ក្នុងដំណើរទស្សនកិច្ចនេះ បានសួរលោកអំពីការប្រើប្រាស់ថវិកាអ្នកបង់ពន្ធ ដើម្បីកែច្នៃយន្តហោះដ៏ប្រណីតនេះ ដែលវាទំនងជាត្រូវប្រើប្រាស់ដោយលោកតែម្នាក់ឯងនោះ។ លោក ត្រាំ បានឆ្លើយវិញថា «វាចំណាយអស់តិចតួចណាស់ បើធៀបនឹងអ្វីដែលយើងត្រូវចំណាយ ប្រសិនបើយើងធ្វើតាមរបៀបផ្សេង»។
លោកប្រធានាធិបតី ត្រាំ បានដាក់បង្ហាញយន្តហោះ១គ្រឿងនេះ កាលពីខែមុន ដើម្បីជំនួសយន្តហោះ Boeing 747-2 ដែលដឹកប្រធានាធិបតីសហរដ្ឋអាមេរិកអស់រយៈពេលជាង៣ទសវត្សរ៍មកហើយ ដែលត្រូវបានដាក់ឱ្យចូលនិវត្តន៍។ ទោះជាយ៉ាងណាក៏ដោយ យន្តហោះ Boeing 747-8 ដែលជាកាដូនេះ ត្រូវបានរំពឹងថានឹងបន្តបម្រើប្រធានាធិបតីសហរដ្ឋអាមេរិក រហូតដល់កងទ័ពអាកាសទទួលបានយន្តហោះប្រធានាធិបតី Boeing ស៊េរីថ្មី នៅក្នុងរយៈពេល២ឆ្នាំខាងមុខ។
គួរបញ្ជាក់ថា ការលេចឡើងវត្តមានអំណោយដ៏ចម្រូងចម្រាស កាលពីឆ្នាំមុន បានបង្កឱ្យផ្ទុះការរិះគន់យ៉ាងខ្លាំងពីគណបក្សទាំង ២ ប្រជាធិបតេយ្យ និងសាធារណរដ្ឋ ប្រឆាំងនឹងលោក ត្រាំ ហើយថែមទាំងបង្កើនការភ័យខ្លាចកាន់តែខ្លាំងឡើង ជុំវិញបញ្ហាទំនាស់ផលប្រយោជន៍។ ប៉ុន្តែសេតវិមានបានច្រានចោលម្តងហើយម្តងទៀតចំពោះការចោទប្រកាន់ពីបទពុករលួយ ដោយទទូចថា ការបរិច្ចាគបែបនេះ គឺអនុលោមតាមច្បាប់ទាំងស្រុង៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ