ខេត្តកំពង់ឆ្នាំង ៖ ​ព្រះសង្ឃ និងគ្រហស្ត​៥​អង្គ/នា​ក់បាន​រង​របួសធ្ងន់​និង​ស្រាល ក្នុង​ហេតុការណ៍​គ្រោះថ្នាក់​ចរាចរណ៍​មួយ​បាន​កើតឡើង​នៅ​វេលា​ម៉ោង ៥ និង ៥០ នាទី​ព្រឹក ថ្ងៃ​ទី ២៨ ខែមិថុនា ឆ្នាំ ២០២៦ នៅ​តាម​បណ្ដោយ​ផ្លូវជាតិ​លេខ ៥​ចន្លោះ​គីឡូម៉ែត្រ​លេខ ៦៩​និង​លេខ ៧០ ស្ថិត​នៅ​ចំណុច​ភូមិ​គោក​ស្ដៅ ឃុំ​ទឹក​ហូត ស្រុក​រលាប្អៀរ គ្រា​ដែល​រថយន្ត ម៉ាក់​Honda CR-V បើកបរ​ដោយ​ព្រះសង្ឃ ក្នុង​ល្បឿន​លឿន​បុក​រះ​ម៉ូតូ​និង​ត្រាក់ទ័រ​ក្នុង​ទិស​ដៅ​ស្របគ្នា​។

យោង​តាម​របាយការណ៍​បឋម​របស់​មន្ត្រី​នគរបាល​នៅ​កន្លែង​កើតហេតុ​បាន​ឲ្យ​ដឹង​ថា មុន​ពេល​កើតហេតុ មាន​រថយន្តមួយគ្រឿង​​ម៉ាកHonda CR-V មួយ​គ្រឿង ពណ៌​ទឹកប្រាក់ ពាក់​ស្លាក​លេខ ភ្នំពេញ 2J-8024 បើកបរ​ដោយ ព្រះសង្ឃ ​ព្រះនាម ផ្លុ​ង សឿ​ន អាយុ​៤២​ឆ្នាំ គង់នៅ​វត្ត​ឧត្តម​ស្រះ​រំដេង ផ្សិត​ក្នុង​ឃុំ​តា​លោ ស្រុក​តា​លោ​សែន​ជ័យ​ខេត្តពោធិ៍សាត់ រួម​ដំណើរ​ដោយ​ព្រះសង្ឃ​មួយ​អង្គ​ទៀត ក្នុង​ដំណើរ​ពី​ជើង​ទៅ​ត្បូង ក្នុង​ល្បឿន​លឿន លុះ​មក​ដល់​ចំណុច​កើតហេតុ បាន​បុក​ជាមួយនឹង​ម៉ូតូ​មួយ​គ្រឿង ពីក្រោយ ​ម៉ាក ហុងដា ធុន​​សេ​125 ពាក់​ស្លាក​លេខ​ភ្នំពេញ 1 FU.9973 បើកបរ​ដោយ​ឈ្មោះ ជា រ​ដ្ឋា ភេទ​ប្រុស​អាយុ 22 ឆ្នាំ​រស់នៅ​ភូមិ​ទឹក​ហូត​ឃុំ​ទឹក​ហូត​ស្រុក​រលាប្អៀរ មាន​ឌុ​ប​មនុស្ស​២​នាក់ ក្នុង​ដំណើរ​ស្រប​ទៅ​គ្នា បណ្ដាល​ឱ្យ​ម៉ូតូ​ធ្លាក់​ប្រឡាយ​គ្មាន​ទឹក ក្រោយ​បុក​ម៉ូតូ រថយន្ត​បើកបរ​ដោយ​ព្រះសង្ឃ បាន​ជ្រុល​ទៅ​បុក​និង​ត្រាក់ទ័រ​មួយ​គ្រឿង​ទៀត ដែល​បើកបរ​ដោយ ឈ្មោះ សេង ឡា​ត់ ភេទ​ប្រុស​អាយុ ២៥ ឆ្នាំ រស់នៅ​ភូមិ​គោក​បន្ទាយ​ឃុំ​គោក​បន្ទាយ​ស្រុក​រលាប្អៀរ ។​ក្នុង​ហេតុការណ៍​នោះ​បណ្ដាល​ឲ្យ មនុស្ស​៥​នាក់ ក្នុង​នោះ ព្រះសង្ឃ ២ អង្គ​បាន រង​របួសធ្ងន់​និង​ស្រាល ហើយ​ត្រូវ​បាន​ដឹក​ទៅ​សង្គ្រោះ​នៅ​មន្ទីរពេទ្យ ខេត្តកំពង់ឆ្នាំង ។​ដោយឡែក​មធ្យោបាយ​ធ្វើ​ដំណើរ​ទាំង​៣​គ្រឿង ត្រូវ​បាន​សមត្ថកិច្ច​នគរបាល​ទូក​យក​ទៅ​រក្សា​ទុក​ដើម្បី​រង់ចាំ​ការ​ដោះស្រាយ​តាម​និ​តិ​វិធី​។

អ្វី​ដែល អ្នកចូលរួម​ជួយ​សង្គ្រោះ​បឋម ក៏​ដូច​ជា​អ្នក​ចោមរោម​មើល​បាន ចាប់អារម្មណ៍​នោះ គឺ​បានឃើញ​នៅ​ក្នុង​រថយន្ត​ដែល​បើកបរ​ដោយ​ព្រះសង្ឃ មាន​កំប៉ុង​ស្រា​បៀរ​ជា​ច្រើន​កំប៉ុង ក្នុង​នោះ​មួយ​កំប៉ុង​នៅ​ជិត​ដៃចង្កូត​រថយន្ត​ ៕