​
សុខភាព៖ យោងតាមការចុះផ្សាយពីប្រភពបរទេស ការសិក្សាទ្រង់ទ្រាយធំលើមនុស្សជាង ១៦០,០០០ នាក់បានបង្ហាញថា ការដុសធ្មេញឱ្យបានទៀងទាត់យ៉ាងហោចណាស់ ៣ ដងក្នុងមួយថ្ងៃ មិនត្រឹមតែជួយការពារជំងឺពុកធ្មេញប៉ុណ្ណោះទេ ប៉ុន្តែថែមទាំងអាចកាត់បន្ថយហានិភ័យនៃជំងឺគាំងបេះដូងនិងខ្សោយបេះដូងបានយ៉ាងមានប្រសិទ្ធភាព។

អនាម័យមាត់ធ្មេញមិនល្អបណ្ដាលឱ្យបាក់តេរីកើនឡើងនិងបង្កជាជំងឺរលាកអញ្ចាញធ្មេញដែលអនុញ្ញាតឱ្យបាក់តេរីជ្រាបចូលទៅក្នុងចរន្តឈាមនិងបង្កឱ្យមានការរលាករ៉ាំរ៉ៃពាសពេញរាងកាយ។ ស្ថានភាពរលាកនេះគឺជាកត្តាជំរុញឱ្យសរសៃឈាមនិងបេះដូងងាយរងគ្រោះ។

ទោះបីជាមិនទាន់ចាត់ទុកជាថ្នាំព្យាបាលបេះដូងផ្ទាល់ក៏ដោយ ក៏ការថែទាំមាត់ធ្មេញគឺជាការវិនិយោគសុខភាពដ៏មានតម្លៃបំផុត។ អ្នកជំនាញណែនាំឱ្យដុសធ្មេញយ៉ាងតិច ២ ដងក្នុងមួយថ្ងៃ ប្រើប្រាស់សរសៃអំបោះសម្អាតធ្មេញ និងពិនិត្យសុខភាពមាត់ធ្មេញជាប្រចាំដើម្បីការពារបញ្ហាសុខភាពទូទៅ៕