ខេត្តព្រៃវែង ៖ ដើម្បីលើកកម្ពស់សន្តិសុខ សណ្តាប់ធ្នាប់សង្គម និងបង្កើនភាពកក់ក្តៅជូនប្រជាពលរដ្ឋក្នុងមូលដ្ឋាន អធិការដ្ឋាននគរបាលស្រុកបាភ្នំ បាននិងកំពុងបន្តជម្រុញ ក៏ដូចជាពង្រឹងការអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» យ៉ាងសកម្ម និងមានប្រសិទ្ធភាពខ្ពស់ ។
លោក មុំ សារុំ អធិការនគរបាលស្រុកបាភ្នំ បានលើកឡើងថា អធិការដ្ឋាននគរបាលស្រុកបាភ្នំ បានផ្តោតសំខាន់លើការលុបបំបាត់ល្បែងស៊ីសងខុសច្បាប់ បញ្ហាគ្រឿងញៀន និងការកាត់បន្ថយបទល្មើសព្រហ្មទណ្ឌនានា ដូចជា ចោរកម្ម លួច ឆក់ ប្លន់ ជាដើម ។
លោកអធិការបានបន្តថា តាមរយៈការខិតខំប្រឹងប្រែងអនុវត្តគោលនយោបាយ ភូមិ-ឃុំមានសុវត្ថិភាព ប៉ុន្មានឆ្នាំចុងក្រោយនេះឃើញថា ចំនួននៃបទល្មើស បានថយចុះច្រើនបើប្រៀបធៀបទៅនឹងឆ្នាំមុនៗ ទាំងបទល្មើសព្រហ្មទណ្ឌ បញ្ហាគ្រឿងញៀន និងបញ្ហាក្មេងទំនើង ។
ទោះជាយ៉ាងនេះក្តី លោកអធិការនគរបាលស្រុកបាភ្នំ នៅតែខិតខំពង្រឹងកម្លាំងនគរបាលស្រុក និងនគរបាលប៉ុស្តិ៍រដ្ឋបាល ដោយចុះល្បាតទាំងថ្ងៃទាំងយប់ និងជាប្រចាំ នៅតាមចំណុចប្រឈម និងភូមិសាស្ត្រស្មុគស្មាញនានា ដើម្បីការពារ និងរក្សាសុខសុវត្ថិភាពជូនប្រជាពលរដ្ឋនៅក្នុងមូលដ្ឋាន។
ជាមួយគ្នានោះ ក៏បានធ្វើការណែនាំ និងអប់រំប្រជាពលរដ្ឋក្នុងស្រុកបាភ្នំ ឲ្យយល់ដឹងពីច្បាប់ និងចូលរួមបង្ការ ទប់ស្កាត់បទល្មើស នៅក្នុងសហគមន៍របស់ខ្លួនផងដែរ ៕
ចែករំលែកព័តមាននេះ