រដ្ឋធានីការ៉ាកាស ៖ គ្រោះរញ្ជួយដីដ៏ខ្លាំងក្លាផ្ទួនគ្នា បានវាយប្រហារប្រទេសវ៉េណេស៊ុយអេឡា កាលពីរសៀលថ្ងៃទី២៤ ខែមិថុនា ឆ្នាំ២០២៦ (ម៉ោងនៅក្នុងស្រុក) ដោយបានសម្លាប់មនុស្សយ៉ាងហោចណាស់ ៣២ នាក់ និងរបួសជាង ៧០០ នាក់ទៀត បន្ទាប់ពីអគាររាប់សិបខ្នងបានបាក់រលំ ស្ថិតនៅផ្នែកខាងក្នុង និងជុំវិញរដ្ឋធានីការ៉ាកាស (Caracas)។ នេះបើតាមប្រភពពី Reuters បានចេញផ្សាយ។
យោងតាមទីភ្នាក់ងារភូគព្ភសាស្ត្រសហរដ្ឋអាមេរិក (USGS) បានឱ្យដឹងថា គ្រោះរញ្ជួយដីកម្រិត ៧,២ រ៉ិចទ័រ បានកើតឡើងនៅចម្ងាយប្រហែល ១៦០ គីឡូម៉ែត្រ ភាគខាងលិចទីក្រុងការ៉ាកាស ហើយបន្ទាប់មកមិនដល់មួយនាទីស្រួលបួលផង ក៏មានការរញ្ជួយកម្រិត ៧,៥ រ៉ិចទ័រ មួយទៀតបានកើតឡើងបន្ត។
USGS ដោយប្រើប្រាស់គំរូព្យាករណ៍ដើម្បីប៉ាន់ស្មានចំនួនអ្នកស្លាប់ បានឱ្យដឹងថា ចំនួនអ្នកបាត់បង់ជីវិតអាចនឹងកើនឡើងដល់រាប់ពាន់នាក់ ជាមួយឱកាស ៤៤% ដែលចំនួនអ្នកបាត់បង់ជីវិតអាចមានលើសពី ១០ ០០០ នាក់ និងឱកាស ៣០% ដែលអាចមានលើសពី ១០០ ០០០ នាក់។
សកម្មភាពក្នុងវីដេអូបានបង្ហាញពីក្រុមការងារសង្គ្រោះបន្ទាន់ កំពុងតែប្រជ្រៀតគ្នាយ៉ាងលំបាកនៅគំនរបាក់បែករាបស្មើនៃបណ្តាអគារដែលបានដួលរលំ ដើម្បីស្វែងរកអ្នកជាប់គាំងនៅខាងក្នុង។ ចំណែកអ្នករស់រានមានជីវិតស្ថិតក្នុងស្ថានភាពវង្វេងបាត់បង់ស្មារតីជាច្រើននាក់ ត្រូវបានដឹកចេញទៅសង្គ្រោះនៅមន្ទីរពេទ្យ។ ដ្បិតពលរដ្ឋជាច្រើននាក់បានស្ថិតនៅក្នុងផ្ទះ នៅពេលដែលការរញ្ជួយដីបានវាយប្រហារអំឡុងពេលរសៀល ក្នុងថ្ងៃឈប់សម្រាកបុណ្យជាតិ។
ប្រធានាធិបតីស្តីទីនៃប្រទេសវេណេស៊ុយអេឡា លោកស្រី Delcy Rodríguez បានថ្លែងថា តួលេខអ្នករងគ្រោះដំបូង មិនទាន់រាប់បញ្ចូលអ្នករងគ្រោះមកពីរដ្ឋ La Guaira ដែលជាទីតាំងរងគ្រោះធ្ងន់ធ្ងរបំផុតនោះទេ ដែលរដ្ឋនេះស្ថិតនៅជិតទីក្រុង ការ៉ាកាស ។ លោកស្រីបានថ្លែងក្នុងការបង្ហាញខ្លួនតាមកញ្ចក់ទូរទស្សន៍រដ្ឋ មុនម៉ោង ១ រំលងអធ្រាត្រម៉ោងក្នុងស្រុកថា អគាររាប់សិបខ្នងបានដួលរលំ ហើយបច្ចុប្បន្នក្រុមជំនាញកំពុងអនុវត្តកិច្ចប្រឹងប្រែងជួយសង្គ្រោះយ៉ាងខ្លាំងក្លាបំផុត ដើម្បីសង្គ្រោះជីវិតមនុស្សឱ្យបានច្រើន៕
ចែករំលែកព័តមាននេះ