រាជធានីភ្នំពេញ ៖ ប្ដីប្រពន្ធ១គូ បានឈ្លោះទាស់គ្នាផ្ដើមចេញពីរឿងប្រចណ្ឌ ដោយស្ត្រីជាប្រពន្ធ បានចោទថា ប្ដីមានស្រីថ្មីក្បត់ចិត្តនាង រួចនាងក៏បានចាកចេញទៅជួលបន្ទប់ផ្សេងមួយទៀត ស្នាក់នៅបែកពីប្ដី ដោយបានឲ្យប្ដីស្នាក់នៅបន្ទប់ជួលមួយកន្លែង ស្ថិតនៅម្ដុំផ្សារអូរដឹម សង្កាត់ចោមចៅទី៣ ខណ្ឌពោធិ៍សែនជ័យ ម្នាក់ឯង រយៈពេល២ខែមកហើយ។ ដោយឡែកកាលពី៤ថ្ងៃមុន អ្នកទាំង២ ក៏បានព្រមព្រៀង លែងលះគ្នាក្រៅប្រព័ន្ធច្បាប់ ស្រាប់តែនៅវេលាម៉ោងប្រមាណជាង៥ល្ងាចថ្ងៃទី២៤ ខែមិថុនា ឆ្នាំ២០២៦ ក៏ប្រទះឃើញបុរសជាប្ដីស្លាប់ នៅក្នុងបន្ទប់ជួលខាងលើ បាត់ទៅហើយ ។
បុរសជាប្ដីឈ្មោះ មុំ សារ៉េត អាយុ៣៥ឆ្នាំ មុខរបរកម្មកររោងចក្រ មានស្រុកកំណើតនៅស្រុកកងមាស ខេត្តកំពង់ចាម និងស្នាក់នៅក្នុងបន្ទប់ជួល កើតហេតុខាងលើ។ ចំណែកប្រពន្ធឈ្មោះ ចាន់ រី អាយុ៤០ឆ្នាំ មុខរបរកម្មការនីរោងចក្រ អតីតជាស្រីមេម៉ាយកូន៣នាក់ (ស្រី១ប្រុស២នាក់) ស្នាក់នៅបន្ទប់ជួល ក្នុងភូមិកើតហេតុនោះដែរ។ អ្នកទាំង២នាក់នេះ បានរៀបការជាមួយគ្នាជាប្ដីប្រពន្ធរយៈពេល៥ឆ្នាំ កន្លងមកហើយ ប៉ុន្តែអត់មានកូនជាមួយគ្នានោះទេ ។
ប្រជាការពារមួយរូប បានប្រាប់ឲ្យដឹងថា នៅវេលាម៉ោងខាងលើ អ្នកដែលស្នាក់នៅក្នុងបន្ទប់ជួលក្បែរបន្ទប់កើតហេតុនោះ បានធំក្លិនស្អុយចម្លែក ចេញពីក្នុងបន្ទប់ខាងលើ ក៏បានប្រាប់ដល់ម្ចាស់ផ្ទះជួលឲ្យទៅជួយមើល។ មុនដំបូង ម្ចាស់ផ្ទះជួលស្មានថាជាក្លិនសពសត្វកណ្ដុរទេ ប៉ុន្តែពេលទៅដល់បានឃើញសត្វរុយហើរចេញពីក្នុងបន្ទប់នោះ ហើយដោយមានការសង្ស័យ ម្ចាស់ផ្ទះជួល ក៏បានរាយការណ៍ទៅកាន់លោកមេភូមិអូរដឹម ឲ្យទៅជួយមើល ហើយលោកមេភូមិ ក៏បានរាយការណ៍បន្តទៅកាន់នគរបាលប៉ុស្តិ៍ចោមចៅទី៣ ។
ប្រជាការពារដដែល បានប្រាប់ឲ្យដឹងបន្តទៀតថា ក្រោយទទួលបានដំណឹងនោះភ្លាម កម្លាំងប៉ុស្តិ៍នគរបាលរដ្ឋបាលចោមចៅទី៣ ក៏បានចុះទៅកាន់កន្លែងកើតហេតុ ហើយបានសម្រេចចិត្ត គាស់បង្អួចបន្ទប់នោះមើល ស្រាប់តែឃើញបុរសនោះដេកស្លាប់ហើមស្អុយបាត់ទៅហើយ។ ជំហានដំបូង នគរបាលបានឃើញសពដេកផ្ងារ ហើយនៅជាប់ខ្លួនសពមានខ្សែភ្លើង និងព្រីភ្លើងព្រមទាំងស្មា និងដៃខាងស្ដាំសពគងសង្កត់លើខ្សែកង្ហារ ដែលដោយដោយជាប់ព្រីភ្លើងនោះផងដែរ ប៉ុន្តែពុំទាន់ដឹងថា បុរសនោះស្លាប់ដោយការធ្វើអត្តឃាត ឬក៏ជាករណីឆក់ខ្សែភ្លើងនៅឡើយទេ ហើយនគរបាលប៉ុស្តិ៍ចោមចៅទី៣ បានរាយការណ៍ជូននគរបាលការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ចុះធ្វើកោសល្យវិច័យ ។
ដោយឡែកស្ត្រីជាប្រពន្ធ បាននិយាយថា នាងនិងប្ដីបានរស់នៅបែកគ្នារយៈពេល២ខែមកហើយ ដោយសារតែប្ដីនាងមានស្រីថ្មីក្បត់ចិត្តនាង ពេលនោះ ប្ដីបានស្នាក់នៅក្នុងបន្ទប់ជួលកើតហតុ ចំណែកនាងបានទៅជួលបន្ទប់ផ្សេងមួយទៀតស្នាក់នៅក្នុងភូមិនោះដែរ។ រហូតមកដល់ថ្ងៃទី២០ ខែមិថុនា ឆ្នាំ២០២៦ គឺ៤ថ្ងៃមុន នាងនិងប្ដី ក៏បានយល់ព្រមលែងលះគ្នា ក្រៅប្រព័ន្ធតុលាការ គឺបន្ទាប់ពីទៅរកសួរយោបល់លោកមេភូមិរួច ក៏ធ្វើក្រដាស់លែងលះតែ២នាក់ប្ដីប្រពន្ធតែម្ដង ។
ស្ត្រីរូបនោះ បានបញ្ជាក់ថា គាត់ជាអតីតស្រីមេម៉ាយ កូន៣នាក់ ហើយបានរៀបការជាមួយបុរសខាងលើ ជាប្ដីប្រពន្ធរស់នៅរួមសុខរួមទុក្ខជាមួយគ្នារយៈពេល៥ឆ្នាំមកហើយ។ ប៉ុន្តែអត់មានកូនជាមួយគ្នានោះទេ ពេលនេះ នាងនិងគាត់បានលែងលះគ្នាហើយ ដូច្នេះគាត់និងប្រគល់សពឲ្យទៅក្រុមគ្រួសារខាងប្ដីយកទៅធ្វើបុណ្យចុះ ៕
ចែករំលែកព័តមាននេះ