ប្រទេសកូរ៉េខាងជើង ៖ មេដឹកនាំកូរ៉េខាងជើង លោកគីម ជុងអ៊ុន អះអាងថា កងទ័ពលោកកំពុងតែបំពាក់ឲ្យកងម៉ារីនអាវុធនុយក្លេអ៊ែរ ។ នេះបើតាមសេចក្ដីរាយការណ៍កាលពីថ្ងៃទី២៤ មិថុនា របស់សារព័ត៌មានរដ្ឋកូរ៉េខាងជើង ដែលអះអាងទៀតថា ប្រទេសនេះ ចង់កសាងបណ្ដានាវាយោធាមានចំណុះ១០.០០០តោន។
លោកគីម ជុងអ៊ុន បានលើកពីរឿងនោះ កាលពីថ្ងៃទី២៣ មិថុនា នៅក្រុងណាមប៉ូ ក្នុងពិធីដាក់ឲ្យប្រើប្រាស់នាវាឈ្មោះCHOE HYON ជានាវាមួយក្នុងចំណោមនាវាចម្បាំង២គ្រឿងចំណុះ៥០០០តោន ដែលដាក់បញ្ចូលទឹកកាលពីឆ្នាំទៅមិញ ។ នេះបើតាមទីភ្នាក់ងារព័ត៌មានកូរ៉េខាងជើងKCNA ។ ក្នុងពិធីនោះ មេដឹកនាំកូរ៉េខាងជើងលើកឡើងថា កម្មវិធីនេះ ដែលសំដៅបំពាក់អាវុធនុយក្លេអ៊ែរដល់កងម៉ារីន កំពុងដំណើរការដោយមិនងាកថយចេញពីការគ្រោងទុកឡើយ។
លោកគីម ជុងអ៊ុន បន្តថា បន្ទាប់ពីនាវា CHOE HYON យើងនឹងដាក់ឲ្យប្រើប្រាស់ក្នុងពេលឆាប់ៗ នាវាពិឃាតឈ្មោះKANG KON ។ បន្តបន្ទាប់មកទៀត យើងនឹងបញ្ចេញបណ្ដានាវាចម្បាំងយុទ្ធសាស្ត្រចំណុះ១០.០០០តោន ៕
ចែករំលែកព័តមាននេះ