សម្តេចព្រះឧត្តមវង្សា គូ សុភាព សមាជិកលេខាធិការដ្ឋានគណៈសង្ឃនាយកបានមានថេរដីកាថា ការកាត់ឆុងតាមពុទ្ធសាសនា មិនលំបាកនៅក្នុងការធ្វើពិធីអីស្មុគស្មាញច្រើនឡើយ ។
មានថេរដីកាហើយចែកចាយនៅលើបណ្តាញសង្គម សម្តេចព្រះឧត្តមវង្សា បានបន្តទៀតថា វិធីកាត់ឆុងនៅក្នុងពុទ្ធសាសានាងាយណាស់ គឺធ្វើបុណ្យឲ្យច្រើន ហើយកុំសូវយកពាក្យអ្នកថា ឆ្នាំនេះឆុងយកមកគិត ពីព្រោះការមមៃបែបនេះធ្វើឲ្យស្មុគ និងស្ត្រេសទៅវិញទៅ ។
សម្តេចព្រះឧត្តមវង្សា បានមានថេរដីកាបន្តទៀតថា ការដែលយកសំដីមកគិតនាំឲ្យយើងមមៃរឿងនោះ ហើយ នាំឲ្យយើងកើតទុក្ខ ។ សម្តេចព្រះឧត្តមវង្សាបានបញ្ជាក់ថា «កុំយកពាក្យនោះមកគិត គឺត្រូវប្រឹងធ្វើបុណ្យ សុំសីល អីទៅ» ។
សម្តេចព្រះឧត្តមវង្សា បានមានថេរដីកាបន្តថា «ធ្វើបុណ្យកាត់ឆុង អត់ពិបាកទេ ធ្វើពិធីអីច្រើនស្មុគស្មាញទេ គឺធ្វើតែបុណ្យទៅ ហើយការធ្វើបុណ្យនោះ គឺរាប់តាំងពីចិញ្ចឹមឪ ចិញ្ចឹមម៉ែ ថ្វាយបង្គុំព្រះ ចែកទាន ដាក់បាត្រលោក ផ្សាយមេត្តាជាដើម ។ សម្តេចព្រះឧត្តមវង្សា បានមានថេរដីកាបន្តថា កម្លាំងបុណ្យជាភាពត្រជាក់ត្រជុំ អាចកាត់ភាពក្តៅចង្រៃឧបទ្រុបចេញបាន ។
សម្តេចព្រះឧត្តមវង្សា បានបានមានថេរដីកាបន្តថា ចង់បានអាយុវែង គួរទទួលទាន សម្រាកឲ្យត្រឹមត្រូវ ចិញ្ចឹមឪពុកម្តាយ ហើយចិត្តគំនិតកុំសូវមួម៉ៅសៅហ្មង អត់ធ្វើកម្មពៀរជាមួយនឹងអ្នកណា នោះនឹងអាយុ វែងហើយ ។ សម្តេចព្រះឧត្តមវង្សាបានបន្តថា យើងត្រូវរៀនធ្វើបុណ្យ ធ្វើបុណ្យតិចៗ ហើយសន្សំទុក ៕
ចែករំលែកព័តមាននេះ