ក្រសួងធនធានទឹក និងឧតុនិយម បានប្រកាសកាលពីថ្ងៃទី២០ ខែមិថុនា ឆ្នាំ២០២៦ថា សម្ពាធទាបដែលកើតមាននៅលើមហាសមុទ្រប៉ាស៊ីហ្វិកខាងលិចបានវិវត្តទៅជាព្យុះទី៧ ឈ្មោះ មេខឡា ហើយបើទោះបីជាកម្ពុជា មិនស្ថិតនៅគន្លងរបស់វាមែន តែឥទ្ធិពលវាមានខ្លះជាពិសេស គឺនៅមាត់សមុទ្រ ។
ប្រភពដដែលបានអះអាងថា ព្យុះនេះ វាមានឥទ្ធិពលលើរបបខ្យល់មូសុងនិរតី ដែលបក់លើឈូងសមុទ្របេងហ្គាល សមុទ្រ អាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើព្រះរាជាណាចក្រកម្ពុជា ហើយនៅក្នុងស្ថានភាពនេះ ធាតុអាកាស ចាប់ពីថ្ងៃទី២១ ដល់ថ្ងៃទី២៦ ខែមិថុនា អាចមានភ្លៀងផ្គរ រន្ទះ ខ្យល់កន្ត្រាក់ដល់៤០ភាគរយ ។
ប្រភពដដែលបានអះអាងថា តំបន់មាត់សមុទ្រដូចជាខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី៤០% ខណៈដែលរលកសមុទ្របោកបក់ខ្លាំងដែលមានកម្ពស់អាចដល់១,៧៥ម៉ែត្រ ។ សម្រាប់តំបន់វាលទំនាបដូចជា នៅខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្រប ដណ្តប់លើផ្ទៃដី ៣០% ។ តំបន់ខ្ពង់រាបដូចជានៅ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ជាមួយខ្យល់កន្ត្រាក់ និងផ្គររន្ទះគ្របដណ្តប់លើផ្ទៃដី ២០%។
យោងលើការព្យាករខាងលើ ក្រសួងបានជូនដំណឹងឲ្យពលរដ្ឋ មេត្តាប្រុងប្រយ័ត្នខ្ពស់ចំពោះបាតុភូត ភ្លៀង ផ្គររន្ទះ និងខ្យល់កន្ត្រាក់ ជាពិសេសបងប្អូនដែលធ្វើដំណើរតាមផ្លូវគោគនិងផ្លូវទឹក ៕
ចែករំលែកព័តមាននេះ