ខេត្តព្រះសីហនុ ៖ មិនមែនជារឿងគ្រោះថ្នាក់ថ្មីនោះទេ តែជាគ្រោះថ្នាក់ដែលបានកើតឡើងជាបន្តបន្ទាប់ កាលពីថ្ងៃទី៣ ដើមខែមិថុនានេះ រថយន្តកុងទីន័រ បានបុកក្បាលនាគពុះទ្រូងផ្លូវនេះម្តងរួចមកហើយ នៅផ្លូវជាតិលេខ៤ ចំណុចមុខវិទ្យាល័យ ហ៊ុន សែន វាលរេញ។ លុះមកដល់វេលាម៉ោង០៨និង២៥នាទីយប់ ថ្ងៃទី២០ ខែមិថុនា ឆ្នាំ២០២៦នេះ មានរថយន្តកុងទីន័រមួយគ្រឿងទៀត បើកបរក្នុងទិសដៅពីភ្នំពេញ បានបុកក្បាលនាគពុះទ្រូងផ្លូវនោះចំពេញទំហឹង បណ្តាលឱ្យបាក់បែកខ្ចាត់ខ្ចាយពេញផ្លូវ រីឯរថយន្តរងការខូចខាតយ៉ាងខ្លាំង ។
តាមប្រភពពីសមត្ថកិច្ចបានឱ្យដឹងថា នៅថ្ងៃទី២០ ខែមិថុនា ឆ្នាំ២០២៦ វេលាម៉ោង ០៨និង២៥ នាទីយប់ លើដងផ្លូវជាតិលេខ៤ ចន្លោះគីឡូម៉ែត្រលេខ១៧៩-១៨០ ស្ថិតក្នុងភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើងបង្កដោយខ្លួនឯង។ គ្រោះថ្នាក់នេះ បង្កឡើងដោយរថយន្ដ ០១គ្រឿង ម៉ាក SCANIA ពណ៌ស ពាក់ផ្លាកលេខ ភ្នំពេញ 3F-8669 និងសណ្តោងសឺរ៉ឺម៉ក ពាក់ស្លាកលេខ ព្រះសីហនុ 4A-1017 ធ្វើដំណើរក្នុងទិសដៅពីរាជធានីភ្នំពេញ ឆ្ពោះទៅខេត្តព្រះសីហនុ បើកបរដោយឈ្មោះ សូត ថា ភេទប្រុស អាយុ ៤៧ឆ្នាំ មានទីលំនៅភូមិតាសែន ឃុំសូទេព ស្រុកជើងព្រៃ ខេត្តកំពង់ចាម ។
សមត្ថកិច្ចបានបន្តថា លុះធ្វើដំណើរមកដល់ចំណុចខាងលើ ខណៈអាកាសធាតុកំពុងមានភ្លៀងធ្លាក់ រថយន្តក៏បានបុកទ្រូងផ្លូវតែម្តង។ ករណីគ្រោះថ្នាក់ចរាចរណ៍ខាងលើនេះ មិនបណ្ដាលឱ្យមានមនុស្សរងរបួសឡើយ ។
បច្ចុប្បន្ន វត្ថុតាង (រថយន្ដ) ត្រូវបានយកទៅរក្សាទុកជាបណ្ដោះអាសន្ននៅអធិការដ្ឋាននគរបាលស្រុកព្រៃនប់ ចំណែកឯអ្នកបើកបររថយន្ដ ត្រូវបានសមត្ថកិច្ចនាំខ្លួនមកសួរនាំ ។
សូមបញ្ជាក់ថា នៅចំណុចរង្វង់មូលសួនច្បារវាលរេញ មានទ្រូងផ្លូវ ៣ជ្រុង (ផ្លូវជាតិលេខ៤ ពីរកន្លែង និងផ្លូវជាតិលេខ៣ មួយកន្លែង) ហើយទាំង៣កន្លែងនេះ កន្លងមកតែងតែធ្លាប់កើតមានករណីគ្រោះថ្នាក់ រថយន្តបុកជាហូរហែ ទាំងកម្រិតធ្ងន់និងស្រាល។ នៅចំណុចក្បាលនាគពុះទ្រូងផ្លូវទាំង ៣កន្លែងនោះ ខាងមន្ត្រីជំនាញបានបំពាក់ភ្លើងសញ្ញាសូឡាភ្លឹបភ្លែតផងដែរ ប៉ុន្តែការបំពាក់ភ្លើងនេះ ត្រូវបានមជ្ឈដ្ឋានមួយចំនួនយល់ឃើញថា មានពន្លឺខ្សោយពេក។ ដូចនេះ គួរតែតម្លើងភ្លើងឱ្យមានពន្លឺខ្លាំងជាងនេះ ទើបអាចជួយកាត់បន្ថយគ្រោះថ្នាក់ចរាចរណ៍បានច្រើន ជាពិសេសនៅពេលមានភ្លៀងធ្លាក់ខ្លាំង ៕
ចែករំលែកព័តមាននេះ