១ថ្ងៃ! ដេញថ្លៃគម្រោងផ្លូវនិងដាក់សូឡា២ឃុំ ជាង៥០០លានរៀល ក្រុមហ៊ុនចូលរួមដេញថ្លៃប្រកួតប្រជែងចុះច្រើន
- កំពង់ចាម
ខេត្តកំពង់ចាម: ការដេញថ្លៃផ្លូវបេតុងផ្លូវក្រាលគ្រួសក្រហម ភ្លើងសូឡាបំភ្លឺតាមផ្លូវសាធារណៈដែលមានទឹកប្រាក់សរុបជាង៥០០លានរៀល ត្រូវបានដាក់ដេញថ្លៃជាសាធារណៈធ្វើឡើងនៅសាលាឃុំស្ដើងជ័យនិងសាលាឃុំស្រម៉ស្រុកជើងព្រៃ។ដោយបានធ្វើឡើងពេញមួយថ្ងៃទី១៧មិថុនា ឆ្នាំ២០២៦ ចំពោះការដេញថ្លៃគេសង្កេតឃើញក្រុមហ៊ុនបានដេញប្រកួតប្រជែងយកឈ្នះចាញ់មានការចុះច្រើន នេះគឺជាការដេញដោយតម្លាភាព សម្រាប់គុណភាពគឺអាជ្ញាធរធ្វើយ៉ាងណាឱ្យក្រុមហ៊ុនស្ថាបនាតាមស្តង់ដារបច្ចេកទេស។
លោកឯម សារុំ មេឃុំត្រពាំងគរ មានប្រសាសន៍ឲ្យដឹងថា: សម្រាប់ដងផ្លូវជាតិលេខ៦ ក្នុងភូមិសាស្ត្រខេត្តកំពង់ធំគឺបានដាក់បំភ្លឺ នៅពេលយប់តាមដងផ្លូវជាតិមកដល់ព្រំប្រទល់ខេត្តកំពង់ចាម។ដោយមើលឃើញបែបនេះត្រូវបានថ្នាក់លើឱ្យអាជ្ញាធរមូលដ្ឋានដាក់អំពូលសូឡាបំភ្លឺតាមដងផ្លូវក្នុងភូមិសាស្ត្រតាមបណ្ដោយផ្លូវជាតិលេខ៦បន្តមកដល់រង្វង់មូលស្គន់ ស្រុកជើងព្រៃ។ក្នុងនោះឃុំរបស់លោកត្រូវបានដាក់ដេញថ្លៃអំពូលសូឡា៥០ដើមដែលមានតម្លៃ៥០ លានរៀល តែក្រុមហ៊ុនមកដាក់សំណើបានតែមួយ ដូច្នេះត្រូវលើកពេលដេញថ្លៃទាល់តែគ្រប់ចំនួន៣ក្រុមហ៊ុនទើបយកជាការបាន។
ចំពោះលទ្ធផលដែលបានដេញថ្លៃនៅសាលាឃុំស្ដើងជ័យនាព្រឹកថ្ងៃទី១៧ មិថុនា ក្នុងនោះមានប្រភេទផ្លូវបេតុងប្រវែង៣២៥ម៉ែត្រ តម្លៃដាក់ឲ្យដេញថ្លៃជាង១៨៣លានរៀល ក្នុងនោះមាន៤ ក្រុមហ៊ុនបានចូលរួមដេញថ្លៃដោយបានទៅលើក្រុមហ៊ុនខ្វាត់ ឈុនឡេង តម្លៃជាង៦៤លានរៀល គឺមានការចុះច្រើនលើសពី៦០%។
អំពូលសូឡា៥២កន្លែងតម្លៃដាក់ដេញថ្លៃជាង៤៩លានរៀល ដោយដេញបានលើក្រុមហ៊ុនផាត់ សុផល តម្លៃជាង៣៦លានរៀល។
ឃុំសំពងជ័យ អំពូលសូឡាចំនួន១០២ កន្លែងតម្លៃដាក់ដេញថ្លៃជាង៩៩លានរៀល ដោយដេញបានលើក្រុមហ៊ុនផាត់សុផល ក្នុងតម្លៃជាង៦១លានរៀល។
ចំពោះការដេញថ្លៃនៅសាលាឃុំស្រម៉នារសៀលថ្ងៃទី១៧មិថុនា ក្នុងនោះរួមមាន ៖
១.ភ្លើងសូឡាបំភ្លឺតាមដងផ្លូវ២១កន្លែងក្នុងឃុំសុទិប តម្លៃដាក់ឲ្យដេញថ្លៃជាង១៩លានរៀល ដោយដេញថ្លៃបានលើក្រុមហ៊ុនផាត់ សុផលក្នុងតម្លៃជាង១៤លានរៀល។
២.ភ្លើងសូឡាបំភ្លឺផ្លូវសាធារណៈ៥២ កន្លែងតម្លៃដាក់ដេញថ្លៃជាង៤៩លានរៀលមាន៣ក្រុមហ៊ុនចូលរួមបានលើក្រុមហ៊ុនផាត់ សុផល តម្លៃជាង៣៦លានរៀល។
៣.ផ្លូវត្រាលគ្រួសក្រហមប្រវែង១៤៥០ ម៉ែត្រតម្លៃដាក់ឲ្យដេញថ្លៃជាង៨៤ លានរៀលមាន៣ក្រុមហ៊ុនចូលរួមដេញថ្លៃបានលើក្រុមហ៊ុនស្រុង ស្រឿន តម្លៃជាង ២៨លានរៀល។
សូមបញ្ជាក់ថា សកម្មភាពការដេញថ្លៃនៅឃុំស្ដើងជ័យនិងឃុំស្រម៉ស្រុកជើងព្រៃពេញមួយថ្ងៃទី១៧ មិថុនា ឆ្នាំ២០២៦គឺក្រុមហ៊ុនដែលបានមកចូលរួមមានការគោរពវិន័យបានល្អជាមួយនោះក៏មានកម្លាំងអាវុធហត្ថនិងនគរបាលយាមដើម្បីពង្រឹងសណ្ដាប់ធ្នាប់ ដើម្បីបញ្ជៀសសកម្មភាពចាប់ទាញបង្កភាពរញ៉េរញ៉ៃ៕
ចែករំលែកព័តមាននេះ