របកគំហើញថ្មី! រកឃើញភស្តុតាងថ្មគោលកំណត់ព្រំដីសម័យអង្គរនៅខេត្តឧត្តរមានជ័យ
- ឧត្តរមានជ័យ
ខេត្តឧត្តរមានជ័យ ៖ ការសិក្សាស្រាវជ្រាវរបស់ក្រុមអ្នកស្រាវជ្រាវនៃរាជបណ្ឌិត្យសភាកម្ពុជា បានរកឃើញភស្តុតាងថ្មគោលកំណត់ព្រំដី ក្នុងសម័យអង្គរ មួយចំនួននៅក្នុងស្រុកអន្លង់វែង ខេត្តឧត្តរមានជ័យ ។ នេះបើយោងតាមលោកបណ្ឌិត ផុន កសិកា ប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គម នៃរាជបណ្ឌិត្យសភាកម្ពុជា បានប្រកាសនាថ្ងៃទី១៦ ខែមិថុនានេះ ។
ការរកឃើញសិលាចារឹកថ្មីមួយនៅប្រាសាទអូរស្វាយ ស្រុកត្រពាំងប្រាសាទ ខេត្តឧត្តរមានជ័យ បានផ្តល់ព័ត៌មានសំខាន់អំពីការកំណត់ព្រំប្រទល់ដីធ្លីក្នុងសម័យអង្គរ ។
ខ្លឹមសារសិលាចារឹកបង្ហាញថា បុព្វបុរសខ្មែរបានកំណត់ព្រំដីសម្រាប់ទេវឋាន ឬប្រាសាទ ដោយប្រើសញ្ញាសម្គាល់ព្រំប្រទល់ផ្សេងៗ ដែលក្នុងនោះថ្មគោល ធ្វើពីថ្មភក់ អាចជាផ្នែកមួយនៃប្រព័ន្ធកំណត់ព្រំដីនោះ ។ ទោះជាយ៉ាងណា ទំនាក់ទំនងរវាងថ្មគោលដែលបានរកឃើញ និងការកំណត់ព្រំដីដែលមានរៀបរាប់ក្នុងសិលាចារឹក នៅត្រូវការការសិក្សា និងការផ្ទៀងផ្ទាត់បន្ថែម តាមរយៈភស្តុតាងបុរាណវត្ថុ និងសិលាចារឹក ។
ខាងក្រោមនេះ គឺជាភស្តុតាងមួយចំនួននៃការរកឃើញថ្មគោល នៅក្នុងស្រុកអន្លង់វែង ខេត្តឧត្តរមានជ័យ៖
-រូបលេខ១,២ និង៣ : ថ្មគោលក្នុងបរិវេណផ្ទះរបស់ប្រជាពលរដ្ឋរស់នៅក្នុងភូមិថ្នល់បំបែក (១០៥) ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
-រូបលេខ៤ និង៥ : ថ្មគោលទួលប្រាសាទ ស្ថិតក្នុងភូមិទួលប្រាសាទ ឃុំត្រពាំងតាវ ស្រុកអន្លង់វែង ខេត្តឧត្តរជ័យ មានចំណុចនិយាមការ (X: 396453, Y: 1574937) ។
-រូបលេខ៦ និង៧ : ថ្មគោលស្ថិតក្នុងភូមិអូរស្រម៉ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ មានចំណុចនិយាមការ (X: 387785, Y: 1578005)។
-រូបលេខ៨, ៩ និង១០ : ថ្មគោលក្បែរទួលប្រាសាទអូរស្រម៉ ស្ថិតក្នុងភូមិអូរស្រម៉ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ មានចំណុចនិយាមការ (X: 389642, Y: 1575389)៕
ចែករំលែកព័តមាននេះ