ខេត្តព្រៃវែង ៖ នៅព្រឹកថ្ងៃទី១៦ មិថុនានេះ មន្ត្រីជំនាញ(ក.ប.ប)ខេត្តព្រៃវែង រកឃើញសិប្បកម្មមួយកន្លែងឈ្មោះ កប តារា ទីតាំងនៅភូមិ១ ឃុំព្រែកខ្សាយ(ខ) ផលិតនិងចែកចាយប្រហិតសាច់គោ ប្រហិតប៉ាត់តេ មិនបានអនុលោមតាមស្តង់ដារបច្ចេកទេស ដោយសម្បកវិចខ្ចប់គ្មានបញ្ជាក់ពីអាសយដ្ឋាន គ្មានកាលបរិច្ឆេទ និងគ្មានដាក់បង្ហាញនៅប្រភេទគ្រឿងផ្សំ ឲ្យបានច្បាស់លាស់ ហើយទីតាំងទាំងមូល ក៏គ្មានអនាម័យថែម ទៀតផង ។
លោក អ៊ុត សុភាព ប្រធាន ក.ប.ប សាខាខេត្តព្រៃវែង បានបញ្ជាក់ថា ក្រោយពិនិត្យឃើញបែបនេះ រូបលោកបានធ្វើការណែនាំដល់ម្ចាស់សិប្បកម្ម កប តារា ឱ្យធ្វើការកែតម្រូវឡើងវិញ ដោយនៅលើសម្បកវិចខ្ចប់ ត្រូវបញ្ជាក់ពីទីតាំងអាសយដ្ឋាន និងកាលបរិច្ឆេទឲ្យបានច្បាស់លាស់ ហើយត្រូវសម្អាតទីតាំងឲ្យមានអនាម័យស្អាតឡើងវិញ ផងដែរ។ ក្នុងករណីបើពិនិត្យលើកក្រោយ ឃើញពុំមានការកែប្រែទេ លោកនឹងចាត់វិធានការផ្លូវច្បាប់ ដោយធ្វើការបិទអាជីវកម្មតែម្ដង ៕
ចែករំលែកព័តមាននេះ