កម្ពុជាធ្វើម្ចាស់ផ្ទះការប្រកួតកីឡាវ៉ូវីណាមជើងឯកអាស៊ីលើកទី៦ និងកីឡាឃីកបុកស៊ីង លើកទី២ ឆ្នាំ២០២៦
- ភ្នំពេញ
រាជធានីភ្នំពេញ ៖ កម្ពុជាត្រៀមធ្វើម្ចាស់ផ្ទះការប្រកួតកីឡាវូវីណាមជើងឯកអាស៊ីលើកទី៦និងការប្រកួតកីឡាឃីកបុកសីងលើកទី២នា ចុងខែវិច្ឆិការ ឆ្នាំ២០២៦ ។ នេះបើតាមការឱ្យដឹងនៅក្នុងកិច្ចប្រជុំមួយដែលបានធ្វើឡើងនៅក្នុងមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃទី១៥ ខែមិថុនា ។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានផ្ដាំផ្ញើរទៅដល់ថ្នាក់ដឹកនាំក្រោមឱវាទ ត្រូវត្រៀមលក្ខណៈឱ្យបានគ្រប់ជ្រុងជ្រោយ ដើម្បីមុខមាត់ប្រទេសជាតិ ព្រោះថា វាជាព្រឹត្តិការណ៍ប្រកួតកម្រិតអាស៊ីដែលមានបណ្ដាប្រទេសជាច្រើននៅលើពិភពលោកចូលរួម។ ម្យ៉ាងវិញទៀត យើងក៏ចង់បង្ហាញឱ្យពិភពលោកបានដឹងយ៉ាងច្បាស់ថាកម្ពុជា ជាប្រទេសមានសុខសន្តិភាព សុវត្ថិភាព និងរីកចម្រើន។
ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា បានលើកឡើងថា ថ្នាក់ដឹកនាំក្រសួងអប់រំ បានប្រជុំកំណត់គោលការណ៍ឧបត្ថម្ភជូនក្រុមកីឡាករជម្រើសជាតិ ក្រុមកីឡាករថ្នាល គ្រូបង្វឹក គ្រូជំនួយ និងអនុរក្ស ដែលបានជ្រើសរើសសម្រាប់ប្រមូលផ្តុំហាត់ហ្វឹកហ្វឺនប្រចាំឆ្នាំ និងកំណត់ប្រាក់រង្វាន់ជ័យលាភីជូនកីឡាករជម្រើសជាតិ និងកីឡាករថ្នាល ដែលបានចូលរួមប្រកួតជាលក្ខណៈអន្តរជាតិផ្លូវការនៅក្នុងនិងក្រៅប្រទេស ដើម្បីធានាការប្រមូលផ្តុំហាត់ហ្វឹកហ្វឺនក្រុមកីឡាករជម្រើសជាតិ ក្រុមកីឡាករថ្នាល គ្រូបង្វឹក គ្រូជំនួយ និងអនុរក្សនិងការផ្តល់ប្រាក់រង្វាន់ជ័យលាភីក្នុងការប្រកួតកីឡាជាលក្ខណៈអន្តរជាតិផ្លូវការនៅក្នុង និង
ក្រៅប្រទេស មានគុណភាព តម្លាភាព ប្រសិទ្ធភាពនិងបង្កើនគុណផលកីឡា។
កីឡាករជម្រើសជាតិ កីឡាករថ្នាល គ្រូបង្វឹកគ្រូជំនួយ និងអនុរក្ស ដែលមានកម្រិតបច្ចេកទេសខ្ពស់ មានវិន័យល្អ សីលធម៌វិន័យល្អ និងមានឆន្ទៈមោះមុត ហើយត្រូវបានជ្រើសរើសដោយគណៈកម្មការបច្ចេកទេសរបស់ក្រសួងអប់រំ យុវជន និងកីឡា ដែលមានសមាសភាពមកពីមជ្ឈមណ្ឌលជាតិហ្វឹកហ្វឺនកីឡា គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិក្រោយពីបានឆ្លងកាត់ការប្រកួតជ្រើសរើសជើងឯកប្រចាំឆ្នាំ ការប្រកួតកីឡាជាតិ ឬការប្រកួតកីឡាលីក (League) តាមប្រភេទកីឡារួចមក ។
កីឡាករជម្រើសជាតិ កីឡាករថ្នាល គ្រូបង្វឹកនិងគ្រូជំនួយ ដែលបានទទួលជ័យលាភីពីការប្រកួតជាលក្ខណៈអន្តរជាតិផ្លូវការនៅក្នុង និងក្រៅប្រទេសគ្រប់កម្រិត ដែលទទួលបានការអនុញ្ញាត និងត្រូវបានចាត់តាំងស្របតាមនិយាមបច្ចេកទេសដោយក្រសួងអប់រំ យុវជន និងកីឡា តាមរយៈអង្គភាពជំនាញតាមឋានានុក្រម។
គួររំលឹកថា ការប្រកួតកីឡាវូវីណាម និងកីឡាឃីកបុកសីងជ្រើសរើសជើងឯកអាស៊ីដែលកម្ពុជាទទួលធ្វើជាម្ចាស់ផ្ទះ គឺស្របទៅតាមការអនុញ្ញាតដ៏ខ្ពង់ខ្ពស់របស់សម្ដេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា ក្នុងការលើកកម្ពស់វិស័យកីឡានៅក្នុងព្រះរាជាណាចក្រកម្ពុជាទៅកាន់ឆាកអន្តរជាតិ ៕
ចែករំលែកព័តមាននេះ