ប្រទេសកាណាដា ៖ ខ្សែប្រយុទ្ធឆ្នើម Cristiano Ronaldo រួមចំណែកជួយក្រុមជម្រើសជាតិព័រទុយហ្គាល់បន្តឡើងទៅកាន់វគ្គ ១៦ ក្រុមចុងក្រោយ ព្រឹត្តិការណ៍ World Cup ឆ្នាំ២០២៦ ក្រោយយកឈ្នះក្រូអាស៊ីទាំងលំបាក លទ្ធផល ២-១ នៅព្រឹកថ្ងៃទី៣ ខែកក្កដា ឆ្នាំ២០២៦ (ម៉ោងនៅកម្ពុជា)។ ជ័យជម្នះនេះ បានកើតឡើងក្រោយពេលដំណឹងនៃការចូលនិវត្តន៍របស់ប្រធានក្រុមព័រទុយហ្គាល់វ័យ៤១ឆ្នាំរូបនេះ ផ្ទុះឡើងលើសារព័ត៌មានធំៗជុំវិញពិភពលោក។
នៅក្នុងជំនួបវគ្គ ៣២ ក្រុម ដែលធ្វើឡើងនៅទឹកដីប្រទេសកាណាដានោះ ក្រូអាស៊ីបានបើកការនាំមុខមុននៅនាទី ៥៣ នៃវគ្គទី២ មុនពេលព័រទុយហ្គាល់តាមស្មើមកវិញ ដោយការទាត់បាល់ពិន័យ១១ម៉ែត្រពី Ronaldo នៅនាទី ៦៨។ ចាប់ពីនាទីនោះមក ការប្រកួតកាន់តែស្វិតស្វាញខ្លាំងឡើង មុនពេលខ្សែប្រយុទ្ធ Gonçalo Ramos សម្រេចគ្រាប់បាល់ជ័យជម្នះនៅវិនាទីគ្រោះថ្នាក់ ៩០+៤។
ព័រទុយហ្គាល់ នឹងត្រូវប៉ះអេស្ប៉ាញ នៅវគ្គ ១៦ ក្រុម ដែលនឹងធ្វើនៅម៉ោង ២ ឈានចូលព្រឹកថ្ងៃទី៧ ខែកក្កដា ខាងមុខនេះ។ ដ្បិតក្រុមរហស្សនាម គោជល់ ធ្វើបានយ៉ាងល្អយកឈ្នះអូទ្រីស ដោយលទ្ធផល ៣-០ កាលពីវគ្គ ៣២ ក្រុម។
មុនជំនួបព័រទុយហ្គាល់-ក្រួអាស៊ី ដំណឹងមួយបានផ្ទុះឡើងកក្រើកបណ្តាសារព័ត៌មានធំៗ បន្ទាប់ពី អ្នកស្រី Katia Aveiro បងស្រីបង្កើតរបស់កីឡាករ Cristiano Ronaldo បានផ្ដល់បទសម្ភាសន៍មួយនៅខាងក្រៅកីឡដ្ឋានក្នុងទីក្រុងតូរ៉ុនតូ (Toronto) មុនការប្រកួតចាប់ផ្តើមនោះ បានថ្លែងថា World Cup ឆ្នាំ ២០២៦ ទំនងជានឹងក្លាយជាការប្រកួតចុងក្រោយបង្អស់របស់ប្អូនប្រុសអ្នកស្រីជាមួយក្រុមជម្រើសជាតិព័រទុយហ្គាល់។
អ្នកស្រីបាននិយាយថា «ផ្អែកលើព័ត៌មានដែលខ្ញុំមាន វាហាក់ដូចជាដល់ពេលដែលត្រូវនិយាយពាក្យលាហើយ។ មិនមែននៅថ្ងៃនេះទេ ប៉ុន្តែខ្ញុំជឿថា នេះនឹងក្លាយជាការលាគ្នាពីក្រុមជម្រើសជាតិ។ ខ្ញុំនិយាយបែបនេះដោយផ្អែកលើប្រភពដែលអាចទុកចិត្តបាន។ នេះនឹងក្លាយជាការបង្ហាញខ្លួនចុងក្រោយរបស់ Cristiano ដែលជាការប្រកួត World Cup ចុងក្រោយរបស់គេ»៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ