ប្រទេសម៉ិកស៊ិក ៖ ការចាញ់ក្នុងលទ្ធផល ១-៥ ក្រោមថ្វីជើងក្រុមជម្រើសជាតិស៊ុយអែត បណ្តាលឱ្យគ្រូបង្វឹកក្រុមជម្រើសជាតិទុយនីស៊ី លោក Sabri Lamouchi ត្រូវបណ្តេញចេញពីតំណែងភ្លាមៗ បន្ទាប់ពីការប្រកួតបើកឆាករបស់ពួកគេនៅក្នុងពូល F ព្រឹត្តិការណ៍ World Cup ឆ្នាំ២០២៦។
តាមរយៈបរាជ័យកាលពីថ្ងៃទី១៤ ខែមិថុនា ឆ្នាំ២០២៦ កន្លងទៅ សហព័ន្ធបាល់ទាត់ទុយនីស៊ីបានកោះប្រជុំបន្ទាន់មួយ ហើយជាលទ្ធផលបានសម្រេចចិត្តបញ្ចប់តួនាទីលោក Sabri Lamouchi និងតែងតាំងជំនួយការគ្រូបង្វឹក លោក Wahbi Khazri គឺជាគ្រូបង្វឹកបណ្តោះអាសន្ន រហូតដល់បញ្ចប់ព្រឹត្តិការណ៍ World Cup ឆ្នាំ២០២៦ តែម្តង។
ការបរាជ័យក្រោមថ្វីជើងស៊ុយអែត បានកត់សម្គាល់ពី៤ប្រកួតចុងក្រោយរបស់ទុយនីស៊ី ដោយគ្មានការជ័យជម្នះទាល់តែសោះ (ចាញ់ ៣ និងស្មើ ១) ក្រោមការដឹកនាំរបស់លោក Lamouchi ។ ក្រុមមកពីទ្វីបអាហ្វ្រិកមួយនេះ បានស្មើកាណាដា ហើយចាញ់អូទ្រីស និងប៊ែលហ្សិក នៅក្នុងការប្រកួតមិត្តភាព មុនពេលចាញ់ស៊ុយអែតធ្ងន់កនៅប្រកួតបើកឆាក World Cup ឆ្នាំ ២០២៦ របស់ពួកគេ។ សរុបមក ទុយនីស៊ីបានរងបរាជ័យចំនួន៣លើក របូតគ្រាប់រហូតដល់ ១១គ្រាប់ និងរកបានតែ១គ្រាប់ប៉ុណ្ណោះ។
លោក Lamouchi ទើបតែចូលកាន់តំណែងកាលពីខែមករា ឆ្នាំ២០២៦ ប៉ុណ្ណោះ ដោយបានដឹកនាំក្រុមចំនួន ៥ ប្រកួត និងឈ្នះតែ ១ លើកគត់ក្នុងប្រកួតមិត្តភាពជាមួយហៃទី។ ការសម្រេចចិត្តបណ្តេញគ្រូបង្វឹកជនជាតិបារាំងវ័យ៥៤ឆ្នាំរូបនេះចេញពីតំណែង ក៏ជាការផ្លាស់ប្តូរគ្រូបង្វឹកលើកទី៤ផងដែរសម្រាប់ទុយនីស៊ី ចាប់តាំងពីខែមករា ឆ្នាំ២០២៤។
បន្ទាប់ពីចាញ់ស៊ុយអែតហើយ លោក Wahbi Khazri គ្រូបង្វឹកបណ្តោះអាសន្ននឹងដឹកនាំទុយនីស៊ីប្រកួតជាមួយជប៉ុន នៅម៉ោង១១ព្រឹកថ្ងៃទី២១ ខែមិថុនា (ម៉ោងនៅកម្ពុជា) និង ហូឡង់ នៅម៉ោង៦ព្រឹកថ្ងៃទី២៥ ខែមិថុនា។ ដ្បតិបច្ចុប្បន្ន ពួកគេស្ថិតនៅបាតតារាង និងដោយជំពាក់គ្រាប់បាល់ ៤ ។
គួរបញ្ជាក់ថា នេះមិនមែនជាលើកទីមួយទេ ដែលទុយនីស៊ីបណ្តេញគ្រូបង្វឹកចេញពីតំណែង អំឡុងពេលយុទ្ធនាការ World Cup។ ជាក់ស្តែង កាលពីឆ្នាំ១៩៩៨ គ្រូបង្វឹកលោក Henryk Kasperczak ត្រូវបានបណ្តេញចេញពីតំណែង បន្ទាប់ពីដឹកនាំក្រុមចាញ់ ២ ប្រកួតក្រោមថ្វីជើងអង់គ្លេស និងកូឡុំប៊ី៕
ចែករំលែកព័តមាននេះ