ទីក្រុងប៉ារីស៖ លោកដូណាល់ត្រាំបានចូលរួមជាមួយថ្នាក់ដឹកនាំប្រទេសដទៃនៅក្នុងកិច្ចប្រជុំកំពូលជីម្ភៃដែលរៀបចំនៅប្រទេសបារាំង។ លោកបានថ្លែងកោតសរសើរសមិទ្ធផលដែលអាមេរិកទើបតែសម្រេចបាននៅកិច្ចព្រមព្រៀងដំណាក់កាលដំបូងជាមួយអ៊ីរ៉ង់ដើម្បីបិទបញ្ចប់ការផ្ទុះអាវុធ។ បន្ទាប់ពីរួចដៃពីសង្គ្រាមនៅអ៊ីរ៉ង់ ត្រាំបង្ហើបឱ្យដឹងថាលោកនឹងស្វះស្វែងរកការបញ្ចប់សង្គ្រាមនៅអ៊ុយក្រែន និងលីបង់ជាបន្តទៀត។
លោកត្រាំធ្វើដំណើរទៅចូលរួមកិច្ចប្រជុំជីប្រាំពីរលើកនេះចំពេលដែលមេដឹកនាំនៅក្នុងពិភពលោកចេះតែបារម្ភអំពីអាមេរិក។ ពួកគេភាគច្រើនធូរស្បើយចិត្តខ្លះនៅពេលដឹងថាមានកិច្ចព្រមព្រៀងរវាងអ៊ីរ៉ង់ និងអាមេរិកដែលអាចនឹងឈានដល់ការបិទបញ្ចប់សង្គ្រាម។ ប៉ុន្តែទន្ទឹមនឹងនោះ ពួកគេក៏មានអារម្មណ៍មិនស្រណុកចិត្តប៉ុន្មានដែរនៅពេលលោកត្រាំគំរាមដំឡើងពន្ធសម្រាប់ប្រទេសបារាំង និងព្រមានឱ្យប្រយ័ត្នចំពោះគ្រោះថ្នាក់នៃជនអន្តោប្រវេសន៍។
ថ្លែងនៅចំពោះអ្នកសារព័ត៌មានដោយមានលោកម៉ាក្រុងឈរក្បែរនោះដែរ លោកត្រាំថាអនុស្សារណៈយោគយល់គ្នារវាងអ៊ីរ៉ង់ និងអាមេរិកដើម្បីបញ្ចប់សង្គ្រាមបានចុះហត្ថលេខារួចរាល់ហើយរវាងប្រទេសទាំង២។ ប៉ុន្តែលោកមិនទាន់ហ៊ានសន្មតថាសេចក្ដីលម្អិតនៃកិច្ចព្រមព្រៀងនោះនឹងផ្សព្វផ្សាយជាសាធារណៈនៅពេលណាទេ។ នៅពេលមានសញ្ញាថាសង្គ្រាមអ៊ីរ៉ង់គង់តែបិទបញ្ចប់ទៅវិញឆាប់ៗនេះ លោកត្រាំបង្ហើបឱ្យដឹងថាលោកនឹងផ្ដោតការយកចិត្តទុកដាក់ទៅលើការស្វែងរកសន្តិភាពនៅអ៊ុយក្រែនវិញម្ដង។ លោកក៏កំពុងខិតខំរកវិធីបញ្ចប់សង្គ្រាមនៅប្រទេសលីបង់ផងដែរ។
លោកថ្លែងថាកាលពីម្សិលមិញ លោកបានសន្ទនាគ្នាតាមទូរស័ព្ទនៅក្នុងបរិយាកាសដ៏ល្អបំផុតជាមួយលោកហ្សេឡិនស្គី និងលោកពូទីន។ លោកយល់ថាអាចនឹងមានរឿងល្អៗត្រូវនិយាយគ្នា។ លោកពិតជាចង់ធ្វើរឿងនេះណាស់។ លោកយល់ថាមេដឹកនាំទាំង២ក៏បើកទូលាយនៅក្នុងបញ្ហានេះផងដែរ។ ភាពធូរស្បើយពីសង្គ្រាមនៅមជ្ឈិមបូព៌ា និងនៅអឺរ៉ុបខាងកើតនោះអាចធូរស្បើយបានត្រឹមតែមួយគន្លាក់ប៉ុណ្ណោះសម្រាប់ថ្នាក់ដឹកនាំក្រុមប្រទេសជីប្រាំពីរ។ ពួកគេនឹងស្វះស្វែងរកការស្រុះស្រួលមូលមតិគ្នាដើម្បីដោះស្រាយបញ្ហាអតុល្យភាពសេដ្ឋកិច្ចជាសាកល, ដើម្បីស្វះស្វែងរករ៉ែកម្រពីទីកន្លែងដទៃក្រៅពីប្រទេសចិន និងដើម្បីគិតគូរអំពីបញ្ញាសិប្បនិម្មិត (អេអាយ)៕ ប្រភព៖ Reuters
ចែករំលែកព័តមាននេះ