អ្នកបើកបរស្រវឹងជោកជាំ បុ.កឡានចតស្ងៀមពីក្រោយពេញទំហឹង ត្រូវឃាត់ខ្លួន
- ក្រចេះ
ខេត្តក្រចេះ ៖ បុរសម្នាក់ត្រូវបានសមត្ថកិច្ចឃាត់ខ្លួន បន្ទាប់ពីបើកបររថយន្តក្នុងស្ថានភាពស្រវឹងខ្លាំង រួចជ្រុលទៅបុករថយន្តមួយគ្រឿងទៀតដែលកំពុងចតស្ងៀមនៅចិញ្ចើមផ្លូវ យ៉ាងពេញទំហឹង ។ ហេតុការណ៍នេះ បានកើតឡើងកាលពីវេលាម៉ោង២០ និង៥០នាទីយប់ថ្ងៃទី១៥ ខែមិថុនា ឆ្នាំ២០២៦ លើកំណាត់ផ្លូវជាតិលេខ៧៣ ស្ថិតក្នុងភូមិទី១ សង្កាត់រកាកណ្ដាល ក្រុងក្រចេះ ខេត្តក្រចេះ ។
ប្រភពពីសមត្ថកិច្ចបានឱ្យដឹងថា មុនពេលកើតហេតុ រថយន្តបង្កម៉ាក Highlander ពណ៌ទឹកមាស ពាក់ស្លាកលេខ ភ្នំពេញ 2AQ 0448 បើកបរដោយឈ្មោះ មាស សាខន ភេទប្រុស អាយុ៥៦ឆ្នាំ បានធ្វើដំណើរក្នុងល្បឿនលឿនពីត្បូងទៅជើង ។ ពេលមកដល់ចំណុចកើតហេតុ អ្នកបើកបរស្ថិតក្នុងស្ថានភាពស្រវឹងខ្លាំង ដោយវាស់វែងជាតិអាល់កុលឃើញរហូតដល់ 1.267 mg/L បានជ្រុលទៅបុករថយន្តម៉ាក Ford Everest ពណ៌ខ្មៅ ពាក់ស្លាកលេខ កម្ពុជា BUNLO.99 របស់ឈ្មោះ ហុង ប៊ុនឡូ ដែលកំពុងចតស្ងៀមជាប់ចិញ្ចើមផ្លូវ (ទិសដៅស្របគ្នា) យ៉ាងពេញទំហឹង។
ក្រោយកើតហេតុ រថយន្តទាំងពីរគ្រឿងត្រូវបានសមត្ថកិច្ចយកទៅរក្សាទុកជាបណ្ដោះអាសន្ននៅបរិវេណការិយាល័យប្រឆាំងគ្រឿងញៀន ។
ដោយឡែក អ្នកបើកបររថយន្តបង្ក ត្រូវបានឃាត់ខ្លួននៅអធិការដ្ឋាននគរបាលក្រុងក្រចេះ ដើម្បីចាត់ការតាមនីតិវិធី ។ យោងតាមទិដ្ឋភាពផ្លូវច្បាប់ ផ្អែកតាមច្បាប់ស្តីពីចរាចរណ៍ផ្លូវគោក ការបើកបរដែលមានអត្រាជាតិអាល់កុលចាប់ពី 0.40 mg/L ឡើងទៅត្រូវចាត់ទុកជាបទល្មើសព្រហ្មទណ្ឌ ។
ករណីអ្នកបើកបរខាងលើ ដែលមានជាតិអាល់កុលរហូតដល់ 1.267 mg/L នេះ ត្រូវប្រឈមមុខនឹងទោសពន្ធនាគារពី ៦ថ្ងៃ ទៅ៦ខែ និងពិន័យជាប្រាក់ចូលថវិការដ្ឋពី២លាន ដល់៤លានរៀល ព្រមទាំងត្រូវទទួលខុសត្រូវសងការខូចខាតរថយន្តរបស់ភាគីរងគ្រោះទាំងស្រុងថែមទៀតផង ៕
ចែករំលែកព័តមាននេះ