អ្នករៀបចំចេញមុខបកស្រាយ ក្រោយផ្ទុះការរិះគន់ដូចព្យុះជុំវិញការរៀបចំទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤
- ភ្នំពេញ
រាជធានីភ្នំពេញ ៖ ក្រោយផ្ទុះការរិះគន់ដូចព្យុះពីអ្នកចូលរួមទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤ នៅមុខវត្តបទុមវតីជុំវិញការមិនមានមេដាយជ័យលាភី និងវត្ថុអនុស្សារីយ៍ចែកជូនដល់អត្តពលិកគណៈកម្មការរៀបចំទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤បានចេញមុខបកស្រាយតាមរយៈសេចក្ដីជូនដំណឹងមួយកាលពីព្រឹកថ្ងៃទី១៥ ខែមិថុនា ។
សេចក្ដីជូនដំណឹងមានខ្លឹមសារថា គណៈកម្មការរៀបចំទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤ឆ្នាំ២០២៦សូមជម្រាបជូនដំណឹងដល់អត្តពលិកជាតិ និងអន្តរជាតិទាំងអស់ ដែលបានចូលរួមក្នុងទិវារត់ប្រណាំងឱ្យបានជ្រាបថា ការដែលគណៈកម្មការរៀបចំទិវារត់ប្រណាំងម៉ារ៉ាតុង មិនទាន់បានចែកជូនមេដាយ គឺដោយសារភាពយឺតយ៉ាវ និងបញ្ហាដឹកជញ្ជូនដែលបានពន្យារពេលខុសពីការគ្រោងទុក ធ្វើឱ្យមានការរអាក់រអួលមិនអាចផ្ដល់មេដាយជូនទាន់ពេលវេលា។
ចំពោះមូលហេតុនៃការយឺតយ៉ាវនេះបណ្ដាលមកពីការកកស្ទះទំនិញដោយសារការត្រួតពិនិត្យតឹងរឹងតាមច្រកព្រំដែនខុសពីប្រក្រតីដែលបណ្ដាលឱ្យយឺតយ៉ាវខុសពីការគ្រោងទុករយៈពេលជាងមួយខែ។ ដូច្នេះគណៈកម្មការរៀបចំព្រឹត្តិការណ៍ទិវារត់ប្រណាំងសង្ឃឹមថា នឹងទទួលបានការយោគយល់ខ្ពស់ពីអត្តពលិកជាតិនិងអន្តរជាតិចំពោះកំហុសដោយអចេតនានេះ។ គណៈកម្មការរៀបចំព្រឹត្តិការណ៍រត់ប្រណាំងទទួលរាល់មតិយោបល់ទាំងអស់ និងខិតខំកែលម្អឱ្យបានរលូននាពេលក្រោយទៀត ។ គណៈកម្មការរៀបចំព្រឹត្តិការណ៍ទិវារត់ប្រណាំងសន្យានឹងផ្ដល់ជូនមេដាយជ័យលាភី និងអនុស្សារីយ៍ក្នុងពេលដ៏ឆាប់ខាងមុខ នៅពេលដែលមេដាយមកដល់ តាមការជូនដំណឹងរបស់គណៈកម្មការរៀបចំទិវារត់ប្រណាំង។
ជាទូទៅ ការរិះគន់ផ្តោតលើបញ្ហាមួយចំនួននៅក្នុងព្រឹត្តិការណ៍ដែលមានអ្នកចូលរួមជិត ៦០០០ នាក់នេះ។ ទោះជាយ៉ាងណាក៏ដោយ បើតាមព័ត៌មានបឋមបង្ហាញថា ព្រឹត្តិការណ៍នេះបញ្ចប់ទៅដោយជោគជ័យ ទោះបីជាមានការលំបាកខ្លះៗដូចជាការគ្រប់គ្រងចរាចរណ៍ ឬការរៀបចំផ្លូវរត់មិនបានល្អធ្វើឱ្យមានការកកស្ទះដោយសារចំនួនអ្នកចូលរួមច្រើនលើសពីការរំពឹងទុក
កង្វះខាតការចែកចាយទឹក ឬគ្រឿងឧបភោគបរិភោគជូនអ្នករត់តាមគោលដៅជាដើម។
សូមជម្រាបថា ព្រឹត្តិការណ៍នេះរៀបចំឡើងនៅសួនច្បារវត្តបទុមវតី ដើម្បីអបអរព្រះរាជពិធីបុណ្យចម្រើនព្រះជន្មសម្ដេចម៉ែគម្រប់៩០ព្រះវស្សាឈានចូល៩១ព្រះវស្សា ៕
ចែករំលែកព័តមាននេះ