អន្តរជាតិ ៖ ក្រុមតំណាងអាស៊ីកំពុងធ្វើបង្ហាញភាពខ្លាំងនៅក្នុងព្រឹត្តិការណ៍ FIFA World Cup ឆ្នាំ ២០២៦ តាមរយៈការមិនទាន់ចាញ់ នៅក្នុងការប្រកួតបើកឆាករបស់ពួកគេ គិតត្រឹមថ្ងៃទី១៥ ខែមិថុនា ឆ្នាំ២០២៦ (ម៉ោងនៅកម្ពុជា)។
បន្ទាប់ពីក្រុមជម្រើសជាតិកូរ៉េខាងត្បូង អូស្ត្រាលី (សមាជិកសហព័ន្ធបាល់ទាត់ទ្វីបអាស៊ី) និងកាតា ជប៉ុន គឺជាក្រុមតំណាងអាស៊ីបន្ទាប់ដែលដណ្តើមបានពិន្ទុនៅក្នុងការប្រកួតបើកឆាក World Cup 2026 របស់ពួកគេ World Cup ឆ្នាំ ២០២៦។
ក្រុមរហស្សនាមសាមូរ៉ៃខៀវ ក្រោមការដឹកនាំរបស់លោក Hajime Moriyasu បានបន្តបង្ហាញពីភាពខ្លាំងរបស់ខ្លួន ដោយវាយបកតាមស្មើលទ្ធផល ២-២ ជាមួយហូឡង់ និងលេងក្នុងកម្រិតខ្ពស់មួយទល់នឹងក្រុមខ្លាំងពីអឺរ៉ុបមួយនេះ បើទោះបីជាជប៉ុនអវត្តមានកីឡាករឆ្នើមៗមួយចំនួនដោយសាររបួសយ៉ាងណាក៏ដោយ។
ការប្រកួតបើកឆាកពូល F កាលពីវេលាទៀបភ្លឺចូលថ្ងៃទី១៥ ខែមិថុនា ឆ្នាំ២០២៦ (ម៉ោងនៅកម្ពុជា) នៅឯកីឡដ្ឋាន AT&T សហរដ្ឋអាមេរិក ក្រុមមច្ចុរាជពណ៌ទឹកក្រូចហូឡង់មកជាមួយទំនុកចិត្តខ្ពស់ ស្ដែងឱ្យឃើញតាមរយៈប្រពៃណីនៃការចាប់ផ្ដើមដ៏ខ្លាំងក្លារបស់ពួកគេនៅក្នុងព្រឹត្តិការណ៍ធំៗ។ ក្រុមរបស់លោក Ronald Koeman បានបង្កើតសម្ពាធយ៉ាងខ្លាំងលើគូប្រកួត រហូតសម្រេចបានគ្រាប់បាល់នាំមុខនៅនាទី ៥០ ដោយប្រធានក្រុម Virgil van Dijk ។
ជប៉ុនក្រោយត្រូវគូប្រកួតនាំមុខមុនដូច្នេះ ក៏បានព្យាយាមបើកការសម្រុកតបតវិញ រហូតសម្រេចគ្រាប់តាមស្មើ នៅ៦នាទីក្រោយ ដោយកីឡាករ Keito Nakamura។ លទ្ធផលនេះ មិនអាចឱ្យជប៉ុនធូរស្រាលចិត្តឡើយ ប៉ុន្តែបន្ថែមកម្តៅសម្រាប់ហូឡង់បន្តបង្កើនសម្ពាធបន្ថែមទៀត រហូតដល់រកបានគ្រាប់នាំមុខសាជាថ្មី ដោយកីឡាករ Crysencio Summerville នៅនាទី ៦៤។
ហូឡង់ស្ទើរតែជាម្ចាស់៣ពិន្ទុនៃការប្រកួតនេះទៅហើយ ប៉ុន្តែប្រែជាជប៉ុនមិនបោះបង់ការតស៊ូរបស់ខ្លួន ដោយក្នុងពេលជាមួយគ្នាពួកគេព្យាយាមទប់ទល់នឹងវាយបកវិញ ហើយមុនឈានចូលដល់ម៉ោងបន្ថែម ឱកាសមាសក៏បានកើតឡើង ដោយកីឡាករ Koki Ogawa បានតែតបាល់បញ្ចូលទីពីការទាត់ជ្រុងរបស់ Junya Ito ដោយបាល់នោះបានប្លាតទៅចំក្បាលមិត្តរួមក្រុម Daichi Kamada ហើយហោះចូលសំណាញ់ទី ដែលជួយរក្សាបានលទ្ធផលស្មើ ២-២ ដ៏មានតម្លៃមួយសម្រាប់ក្រុមតំណាងទ្វីបអាស៊ីមួយនេះ។
លទ្ធផលការប្រកួតបើកឆាក World Cup របស់ក្រុមតំណាងទ្វីបអាស៊ី ៖
-កូរ៉េខាងត្បូង ២-១ សាធារណរដ្ឋឆែក (ពូល A) កាលពីថ្ងៃទី១២ មិថុនា
-កាតា ១-១ ស្វីស (ពូល B) កាលពីថ្ងៃទី១៤ មិថុនា
-អូស្ត្រាលី ២-០ តួកគីយ៉េ (ពូល D) កាលពីថ្ងៃទី១៤ មិថុនា
-ហូឡង់ ២-២ ជប៉ុន (ពូល F) ថ្ងៃទី១៥ មិថុនា ៕
ចែករំលែកព័តមាននេះ