សហរដ្ឋអាមេរិក ៖ ខ្សែបម្រើ Ibrahim Maza ដែលមានម្តាយជាជនជាតិវៀតណាម និងឪពុកជាជនជាតិអាល់ហ្សេរី បានប្រកាសថា ក្រុមជម្រើសជាតិអាល់ហ្សេរីមានសមត្ថភាពគ្រប់គ្រាន់អាចយកឈ្នះក្រុមការពារតំណែងជើងឯកអាហ្សង់ទីន នៅក្នុងការប្រកួតបើកឆាកពូល J ពានរង្វាន់ World Cup ឆ្នាំ ២០២៦ លើទឹកដីសហរដ្ឋអាមេរិក។
ប្រភពពីសារព័ត៌មានវៀតណាម VnExpress ចេញផ្សាយកាលពីពេលថ្មីៗនេះ បានឱ្យដឹងថា នៅពេលក្រុមជម្រើសជាតិអាល់ហ្សេរីធ្វើដំណើរដល់សហរដ្ឋអាមេរិក ដើម្បីត្រៀមខ្លួនសម្រាប់ World Cup កីឡាករ Maza មិនបានបង្ហាញការភ័យខ្លាចចំពោះសម្ពាធនៅពេលខាងមុខក្នុងការប្រកួតបើកឆាកទល់នឹងអាហ្សង់ទីននោះទេ។ ខ្សែបម្រើក្លិប Bayer Leverkusen នៃលីគកំពូលអាល្លឺម៉ង់ វ័យ២០ឆ្នាំរូបនេះ បាននិយាយថា «យើងត្រូវតែធ្វើឱ្យបានល្អក្នុងព្រឹត្តិការណ៍ World Cup នេះ ហើយការប្រកួតដំបូងជាមួយអាហ្សង់ទីន នឹងមានសារៈសំខាន់ខ្លាំងណាស់។ ពួកគេតែងតែញុះធ្វើឱ្យគូប្រកួតទ្រាំមិនបាន ប៉ុន្តែយើងត្រូវតែរក្សាភាពស្ងប់ស្ងាត់ លេងដោយភាពឆ្លាតវៃ ហើយរង់ចាំមើលថា តើមានអ្វីកើតឡើង?»។
Maza បានកើតនៅប្រទេសអាល្លឺម៉ង់ និងធ្លាប់លេងឱ្យក្រុមយុវជនជម្រើសជាតិអាល្លឺម៉ង់ច្រើនកម្រិត ប៉ុន្តែបានសម្រេចចិត្តជ្រើសរើសតំណាងឱ្យប្រទេសកំណើតឪពុកគេវិញ។ នៅពេលត្រូវបានសួរអំពីក្រុមអាហ្សង់ទីនដែលមានកំពូលខ្សែប្រយុទ្ធ Lionel Messi នោះ Maza បានឆ្លើយដោយមិនបង្អង់ថា «ពួកយើងនឹងយកឈ្នះ Messi ប្រសិនបើជាព្រះឆន្ទៈរបស់ព្រះអល់ឡោះ (Allah)»។
ប្រព័ន្ធផ្សព្វផ្សាយកីឡាធំៗជាច្រើនរបស់អាហ្សង់ទីន បានចុះផ្សាយព្រមៗគ្នាអំពីការប្តេជ្ញាចិត្តខ្ពស់ពីសំណាក់កីឡាករវ័យក្មេងសញ្ជាតិអាល់ហ្សេរីរូបនេះ មុនការប្រកួតរបស់ពួកគេទល់នឹងអាហ្សង់ទីន ដែលនឹងត្រូវធ្វើឡើងនៅម៉ោង ៨ ព្រឹកថ្ងៃទី១៧ ខែមិថុនា (ម៉ោងនៅកម្ពុជា) នៅក្នុងទីក្រុង Kansas រដ្ឋ Missouri សហរដ្ឋអាមេរិក។
បន្ទាប់ពីការបង្ហាញខ្លួនលើកដំបូងឱ្យឈុតធំអាល់ហ្សេរី នៅក្នុងការប្រកួតទល់នឹងតូហ្កោ កាលពីខែតុលា ឆ្នាំ២០២៤ Maza បានក្លាយជាចំណែកដ៏សំខាន់មួយជាបណ្តើរៗ នៅក្នុងយុទ្ធសាស្ត្ររបស់លោកគ្រូបង្វឹក Vladimir Petkovic។ ទម្រង់លេងដ៏លេចធ្លោទាំងនោះ បានជួយឱ្យ Maza ពង្រឹងកៅអីរបស់ខ្លួននៅក្នុងក្រុមជម្រើសជាតិអាល់ហ្សេរី ដើម្បីឆ្ពោះទៅកាន់ការប្រកួត World Cup លើកដំបូងបង្អស់របស់ពួកគេ គិតចាប់តាំងពីឆ្នាំ២០១៤ មក៕
ចែករំលែកព័តមាននេះ