ខេត្តស្ទឹងត្រែង ៖ ក្នុងឆមាសទី១ ឆ្នាំ២០២៦នេះ រដ្ឋបាលខេត្តស្ទឹងត្រែង បាននិងកំពុងសហការយ៉ាងសកម្មជាមួយគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ (គ.ស.អ.ស.ក) ដើម្បីជម្រុញការផ្សព្វផ្សាយ និងចុះឈ្មោះបងប្អូនប្រជាពលរដ្ឋ ដែលជាអ្នកប្រកបរបរក្នុងប្រព័ន្ធសេដ្ឋកិច្ចក្រៅប្រព័ន្ធ ឱ្យចូលមកក្នុងប្រព័ន្ធឌីជីថល ជាផ្លូវការ សំដៅធានាឱ្យយុទ្ធនាការជាតិមួយនេះ សម្រេចបានជោគជ័យតាមផែនការ ។
នៅក្នុងកិច្ចប្រជុំ កាលពីរសៀលថ្ងៃទី១២ ខែមិថុនា ឆ្នាំ២០២៦ នៅសាលាខេត្តស្ទឹងត្រែង លោក ព្រំ វណ្ណៈ អភិបាលរងខេត្តស្ទឹងត្រែង បានមានប្រសាសន៍ថា ដើម្បីធានាឱ្យការចុះឈ្មោះនេះប្រព្រឹត្តទៅដោយប្រសិទ្ធភាព និងត្រឹមត្រូវអាជ្ញាធរខេត្តបានចុះផ្សព្វផ្សាយ ដោ
យផ្ទាល់ដល់មូលដ្ឋានភូមិ ឃុំ សង្កាត់ និងស្រុកនានា អំពីការចុះឈ្មោះតាមថ្នាលឌីជីថល។ ជាលទ្ធផល បច្ចុប្បន្ន រដ្ឋបាលខេត្តសម្រេចបានការចុះបញ្ជីសហគ្រាសតាមប្រព័ន្ធ LACMS បានចំនួន ៤៥ សហគ្រាស រួចរាល់ ខណៈសហគ្រាសចំនួន ១០១ ផ្សេងទៀត កំពុងស្ថិតក្នុងដំណើរការជម្រុញឱ្យចុះឈ្មោះជាបន្តបន្ទាប់ ។
យុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធនេះ ត្រូវបានរៀបចំឡើងក្នុងគោលបំណង និងគោលដៅសំខាន់ៗរួមមាន៖ការគ្រប់គ្រងប្រមូលផ្តុំទិន្នន័យអ្នកប្រកបរបរក្រៅប្រព័ន្ធ (ដូចជា អាជីវករលក់ដូរតូចតាច អ្នករត់ម៉ូតូឌុប កង់បី កម្មករសំណង់ និងអ្នកស្វ័យនិយោជន៍ផ្សេងទៀត) មកក្នុងប្រព័ន្ធទិន្នន័យជាតិរួមមួយ។ ជួយឱ្យរាជរដ្ឋាភិបាល មានមូលដ្ឋានទិន្នន័យពិតប្រាកដ ក្នុងការរៀបចំផែនការអភិវឌ្ឍន៍ និងផ្តល់ជំនួយឧបត្ថម្ភគាំទ្រនានា បានចំក្រុមគោលដៅ និងទាន់ពេលវេលា ។
អត្ថប្រយោជន៍ដ៏ធំធេងសម្រាប់អ្នកចុះបញ្ជីការស្ម័គ្រចិត្តចូលរួមចុះឈ្មោះក្នុងប្រព័ន្ធឌីជីថលនេះ នឹងនាំមកនូវអត្ថប្រយោជន៍ជាច្រើនដល់បងប្អូនប្រកបរបរសេដ្ឋ៊កិច្ចក្រៅប្រព័ន្ធ រួមមាន ៖ ទទួលបានការគាំពារសង្គម ឱកាសទទួលបានប័ណ្ណមូលនិធិសមធម៌សុខាភិបាល (ប័ណ្ណ ម.ស.ស) សម្រាប់ការពិនិត្យ និងព្យាបាលជំងឺដោយឥតគិតថ្លៃនៅមន្ទីរពេទ្យរដ្ឋ។ ទទួលបានសិទ្ធិអាទិភាពក្នុងការចូលរៀនវគ្គបណ្តុះបណ្តាលវិជ្ជាជីវៈ និងបច្ចេកទេស ដើម្បីពង្រឹងសមត្ថភាពរបររកស៊ី។ ងាយស្រួលក្នុងការទទួលបានប្រភពទុន ឬកម្ចីខ្នាតតូចដែលមានអត្រាការប្រាក់ទាបពីស្ថាប័នហិរញ្ញវត្ថុរដ្ឋ ដើម្បីពង្រីកអាជីវកម្ម ។
នៅក្នុងឱកាសនោះផងដែរ លោក ម៉ាត់ សារី អនុរដ្ឋលេខាធិការ និងជាប្រធានលេខាធិការដ្ឋាន នៃគ.ស.អ.ស.ក បានថ្លែងអំណរគុណ និងវាយតម្លៃខ្ពស់ចំពោះរដ្ឋបាលខេត្តស្ទឹងត្រែង ដែលបានខិតខំផ្សព្វផ្សាយកម្មវិធីនេះបានយ៉ាងឆាប់រហ័ស ។ លោកក៏បាន
ជម្រុញ និងលើកទឹកចិត្តដល់អាជ្ញាធរពាក់ព័ន្ធគ្រប់លំដាប់ថ្នាក់ ត្រូវបន្តពង្រឹងការផ្សព្វផ្សាយបន្ថែមទៀត ដើម្បីឱ្យព័ត៌មានដ៏មានសារៈសំខាន់នេះ បានទៅដល់ដៃប្រជាពលរដ្ឋកាន់តែទូលំទូលាយ និងធានាថាមិនមានបងប្អូនណាម្នាក់បាត់បង់ឱកាស និងអត្ថប្រយោជន៍ពីគម្រោងផែនការជាតិមួយនេះឡើយ ៕
ចែករំលែកព័តមាននេះ