ទីក្រុងប៉េកាំង៖ ប្រទេសចិនបង្ហាញការមិនពេញចិត្តបន្តិចណាសោះចំពោះមន្ទីរបញ្ចកោណ (ក្រសួងការពារជាតិអាមេរិក) ដែលទើបតែចាត់វិធានការប្រឆាំងនឹងក្រុមហ៊ុនបច្ចេកវិទ្យារបស់ខ្លួន (ចិន)។ ការបង្ហាញអារម្មណ៍អាក់អន់ស្រពន់ចិត្តនេះកើតមានឡើងបន្ទាប់ពីអាមេរិកដាក់បញ្ចូលទៅក្នុងបញ្ជីខ្មៅនូវក្រុមហ៊ុនមួយចំនួនដែលត្រូវចាត់ទុកថាជាអ្នកជួយទំនុកបម្រុងវិស័យយោធារបស់ចិន។ នេះបើយោងតាមសេចក្ដីប្រកាសរបស់ក្រសួងពាណិជ្ជកម្មចិន។ មិនត្រឹមតែក្រសួងពាណិជ្ជកម្មទេ ចិនថ្ងៃនេះហាក់ដូចជាព្រួតគ្នាបញ្ចេញប្រតិកម្មយ៉ាងខ្លាំងក្លា។ ក្រសួងការបរទេសចិនក៏សម្ដែងការខ្វាយខ្វល់ពាក់ព័ន្ធនឹងការធ្វើបច្ចុប្បន្នភាពបញ្ជីរបស់ក្រសួងការពារជាតិអាមេរិកផងដែរ។
ប្រភពខ្លះថានៅក្នុងបញ្ជីនោះក៏មានឈ្មោះក្រុមហ៊ុនកំពូលៗរបស់ចិនដូចជាអាលីបាបា (Alibaba), ប៉ៃទូ (Baidu), BYD និង NIO ដែរ។ ក្រោយមក អាមេរិកដាក់បញ្ចូលនៅក្នុងបញ្ជីខ្មៅនូវក្រុមហ៊ុនផលិតបន្ទះសូឡាធំជាងគេនៅលើពិភពលោកគឺ Trina Solar និង JA Solar Technology។ បញ្ជីនោះបូកបញ្ចូលនូវក្រុមហ៊ុនបច្ចេកវិទ្យាកំពូលៗរបស់ប្រទេសចិន។ ទង្វើនេះឆ្លុះបញ្ចាំងឱ្យឃើញថាអាមេរិកខ្វាយខ្វល់អំពីសន្តិសុខជាតិរបស់ខ្លួននៅពេលប្រទេសទាំង២កំពុងប្រកួតប្រជែងគ្នាខាងភូមិសាស្ត្រនយោបាយយ៉ាងស្វិតស្វាញដើម្បីដណ្ដើមទីតាំងឈរជើង។
ក្រសួងពាណិជ្ជកម្មចិនថ្លែងថាចិនអាក់អន់ចិត្តយ៉ាងខ្លាំង ហើយក៏ប្រឆាំងជំទាស់យ៉ាងដាច់អហង្ការផងដែរទៅនឹងចំណាត់ការនេះ។ ប្រទេសចិនសូមជំរុញឱ្យអាមេរិកទីមួយបញ្ឈប់ជាបន្ទាន់នូវការចាត់វិធានការដ៏ឆ្គាំឆ្គង ទីពីរដក់ចេញវិញនូវវិធានការដែលខ្លួនទើបតែបានដាក់ចេញ និងទីបីវិលត្រឡប់ទៅរកមាគ៌ាត្រឹមត្រូវឡើងវិញដើម្បីរក្សាទំនាក់ទំនងចិន-អាមេរិកដែលប្រកបដោយការស្ថាបនាជាយុទ្ធសាស្ត្រ និងស្ថិរភាព។ ប្រសិនបើអាមេរិកនៅតែប្រព្រឹត្តដាក់ក្រុមហ៊ុនរបស់ចិនដោយមិនស្មើភាពទេ ចិនព្រមានថាខ្លួននឹងចាត់វិធានការវាយបកវិញយ៉ាងម៉ឺងម៉ាត់ និងខ្លាំងក្លាបំផុត។
ការធ្វើបច្ចុប្បន្នភាពបញ្ជីរបស់មន្ទីរបញ្ចកោណកើតមានឡើងមួយខែបន្ទាប់ពីលោកដូណាល់ត្រាំ និងលោកស៊ីជីនពីងជួបគ្នានៅទីក្រុងប៉េកាំង និងរក្សាទុកដដែលនូវយុទ្ធសន្តិភាពនៃសង្គ្រាមពាណិជ្ជកម្ម។ ក្រសួងពាណិជ្ជកម្មចិនថ្លែងថាវិធានការរបស់មន្ទីរបញ្ចកោណហាក់មិនយកចិត្តទុកដាក់ទៅលើការព្រមព្រៀងជាសហមតិកុងសង់ស៊ីស (consensus) ដែលថ្នាក់ដឹកនាំទាំង២បានឯកភាពគ្នារួចហើយ។ យោងតាមច្បាប់របស់អាមេរិក ក្រសួងការពារជាតិមិនត្រូវបានអនុញ្ញាតឱ្យចុះកុងត្រាលទ្ធកម្មដេញថ្លៃដោយផ្ទាល់ជាមួយក្រុមហ៊ុនទាំងឡាយណាដែលស្ថិតនៅក្នុងបញ្ជីខ្មៅទេ ហើយក៏មិនអាចទិញផលិតផល ឬសេវាកម្មតាមរយៈភាគីទីបីដែលជាអន្តរការីនោះឡើយដោយចាប់អនុវត្តពីឆ្នាំ២០២៧តទៅ៕ ប្រភព៖ Channel News Asia
ចែករំលែកព័តមាននេះ