ស្ទាក់ចាប់ឡានដឹកឈើអារខុសច្បាប់របស់មេឈ្មួញម្នាក់
- ព្រះវិហារ
ខេត្តព្រះវិហារ ៖ កម្លាំងជំនាញនៃខណ្ឌរដ្ឋបាលព្រៃឈើព្រះវិហារ បានបើកប្រតិបត្តិការស្ទាក់ចាប់រថយន្តដឹកឈើអារខុសច្បាប់មួយគ្រឿង នៅក្នុងភូមិសាស្ត្រស្រុកជ័យសែន កាលពីយប់មិញ។ ភ្លាមៗ បន្ទាប់ពីការបង្ក្រាប មានប្រភពបង្ហើបថា មេឈ្មួញដែលជាម្ចាស់ឈើកំពុងស្វះស្វែងធ្វើកិច្ចអន្តរាគមន៍ ដើម្បីដោះលែងរថយន្តល្មើសច្បាប់នោះត្រឡប់ទៅវិញ ។
តាមរបាយការណ៍បឋមបានឲ្យដឹងថា ប្រតិបត្តិការនេះ ធ្វើឡើងកាលពីវេលាម៉ោង៩ និង៣០នាទីយប់ថ្ងៃទី១២ ខែមិថុនា ឆ្នាំ២០២៦ ដោយកម្លាំងផ្នែករដ្ឋបាលព្រៃឈើជ័យសែន ។ នៅក្នុងកិច្ចបង្ក្រាបនោះ សមត្ថកិច្ចបានឃាត់រថយន្តម៉ាក Tundra ពណ៌ស មួយគ្រឿង ពាក់ស្លាកលេខ ភ្នំពេញ 2AB-5900 ដែលផ្ទុកឈើអារប្រភេទ «ដួងចែម» ។
ប្រភពពីកន្លែងកើតហេតុបានបង្ហើបថា រថយន្តដឹកឈើខាងលើ ជារបស់មេឈ្មួញដុះស្លែដ៏ល្បីឈ្មោះម្នាក់ ហៅ «តេង» រស់នៅខេត្តកំពង់ធំ ដែលត្រូវបានគេដឹងថា ជាមន្ត្រីពាក់អាវខៀវ-កងកម្លាំងម្នាក់ផងដែរ ។ ក្រោយការឃាត់ខ្លួន វត្ថុតាងទាំងអស់ត្រូវបានកម្លាំងជំនាញបញ្ជូនទៅរក្សាទុកជាបណ្តោះអាសន្ន នៅស្នាក់ការសង្កាត់រដ្ឋបាលព្រៃឈើជ័យសែន ដើម្បីចាត់ការតាមនីតិវិធី។
ទោះជាយ៉ាងណា ស្របពេលដែលវត្ថុតាងកំពុងស្ថិតក្រោមការគ្រប់គ្រងរបស់សមត្ថកិច្ច បែរជាមានព័ត៌មានលេចឮមកថា មេឈ្មួញរូបនេះ កំពុងប្រើប្រាស់ឥទ្ធិពល និងទំនាក់ទំនង ដើម្បីរត់ការសុំដោះលែងរថយន្ត និងបទល្មើសខាងលើ ដែលករណីនេះកំពុងធ្វើឲ្យមានការតាមដានយ៉ាងយកចិត្តទុកដាក់ពីមហាជន ។
ជុំវិញករណីនេះ ក្រុមអ្នកស្រឡាញ់បរិស្ថាន និងធនធានធម្មជាតិ បានសម្តែងការព្រួយបារម្ភចំពោះសកម្មភាពដឹកជញ្ជូនឈើខុសច្បាប់ ដែលនៅតែបន្តកើតមានយ៉ាងអនាធិបតេយ្យ ចេញពីខេត្តព្រះវិហារ ឆ្ពោះទៅខេត្តកំពង់ធំ តាមរយៈមេឈ្មួញរូបនេះ។
ជាមួយគ្នានោះ ពួកគេបានអំពាវនាវដល់ថ្នាក់ដឹកនាំស្ថាប័នថ្នាក់ជាតិ មេត្តាបើកការស៊ើបអង្កេត និងដាក់វិធានការច្បាប់ឲ្យ
បានតឹងរឹងបំផុតទៅលើមន្ត្រីមូលដ្ឋាន ចៀសវាងមានការយោគយល់ ឬដោះលែងវត្ថុតាងបទល្មើសដោយខុសច្បាប់ ដែលនាំឲ្យប៉ះពាល់ដល់ជំនឿចិត្តលើការការពារព្រៃឈើរបស់រាជរដ្ឋាភិបាល ៕
ចែករំលែកព័តមាននេះ