ឃាត់ខ្លួនអ្នកដើរលក់ឆ្នោតជាតិវៀតណាម០៦នាក់ និងដកហូតសន្លឹកឆ្នោតមួយចំនួននៅក្រុងស្វាយរៀង
- ស្វាយរៀង
ខេត្តស្វាយរៀង ៖ សមត្ថកិច្ចចាប់ឃាត់ខ្លួនជនជាតិវៀតណាមចំនួន០៦នាក់ (ស្រី០៤នាក់) ដែលដើរលក់ឆ្នោតជាតិវៀតណាមនៅក្នុងក្រុងស្វាយរៀងយ៉ាងអនាធិបតេយ្យ បង្កឱ្យប្រជាពលរដ្ឋព្រួយបារម្ភដោយសមាជិកគ្រួសារពួកគាត់មានអ្នកញៀនល្បែងឆ្នោតនេះ ។ ប្រជាពលរដ្ឋអបអរសាទរ ក្រោយមានការបង្ក្រាប និងចាប់ឃាត់ខ្លួនជនជាតិវៀតណាមដើរលក់ឆ្នោតជាតិវៀតណាម និងសូមឲ្យសមត្ថកិច្ចគួរមានវិធានការចាប់ឃាត់ខ្លួនបណ្តេញចេញទៅប្រទេសដើមវិញ ហើយថ្ងៃក្រោយចូលមកដោយខុសច្បាប់ត្រូវបង្ក្រាបទើបរាងចាល ។
មន្ត្រីនគរបាលក្រុងស្វាយរៀងបានឲ្យដឹងថា ដោយអនុវត្តតាមបទបញ្ជាដ៏ម៉ឹងម៉ាត់របស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត ស្តីពីការត្រួតពិនិត្យរដ្ឋបាលតាមទីតាំង់ស្នាក់នៅ និងប្រមូលផ្តុំជនបរទេស នៅព្រឹកថ្ងៃទី១២ ខែមិថុនា ឆ្នាំ២០២៦ ។
លោកវរសេនីយ៍ឯក សោម សុភ័ណ្ឌ អធិការនគរបាលក្រុងស្វាយរៀងបានដឹកនាំកម្លាំងជំនាញ និងកម្លាំងប៉ុស្តិ៍នគរបាលរដ្ឋបាល បានឃាត់ខ្លួនជនជាតិវៀតណាម០៦នាក់ (ស្រី០៤នាក់) ដែលបានធ្វើសកម្មភាពដើរលក់ឆ្នោតវៀតណាមក្នុងមូលដ្ឋានក្រុងស្វាយរៀង និងបានដកហូតឆ្នោតវៀតណាមជាច្រើនសន្លឹកទៀតផង។
បច្ចុប្បន្ន ជនជាតិវៀតណាមទាំង០៦នាក់ បានធ្វើកិច្ចសន្យាអប់រំ និងឱ្យវិលត្រឡប់ទៅប្រទេសដើមវិញ ។ មហាជនលើកឡើងថា សង្ឃឹមថា ក្នុងខេត្តស្វាយរៀងគ្មានជនជាតិវៀតណាមដើរលក់ឆ្នោតជាតិវៀតណាមបន្តទៀតទេ ។
ចែករំលែកព័តមាននេះ