សមត្ថកិច្ចចម្រុះខេត្តស្ទឹងត្រែង ឃាត់ឡានដឹកគោ-ក្របីច្រើនករណី សង្ស័យនាំចូលខុសច្បាប់
- ស្ទឹងត្រែង
ខេត្តស្ទឹងត្រែង ៖ សមត្ថកិច្ចចម្រុះប្រចាំការត្រួតពិនិត្យតាមដងផ្លូវជាតិលេខ៧ ក្នុងភូមិសាស្ត្រសង្កាត់សាមគ្គី ក្រុងស្ទឹងត្រែង បានឃាត់រថយន្តដឹកជញ្ជូនសត្វគោ និងក្របីរាប់សិបក្បាលចំនួន៥ករណីបន្តបន្ទាប់គ្នា ក្នុងរយៈពេល២ថ្ងៃជាប់ៗគ្នា គឺថ្ងៃទី១២ និងទី១៣ ខែមិថុនា ឆ្នាំ២០២៦ ដោយសង្ស័យថា មានភាពមិនប្រក្រតី និងឯកសារច្បាប់ច្បាស់លាស់ ។ បច្ចុប្បន្ន សត្វគោ-ក្របីទាំង អស់ ត្រូវបានកម្លាំងសមត្ថកិច្ចប្រគល់ជូនទៅការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង ដើម្បីត្រួតពិនិត្យតាមនីតិវិធីជំនាញ ។
ពាក់ព័ន្ធករណីខាងលើ យោងតាមប្រភពព័ត៌មានឱ្យដឹងថា សត្វគោ និងក្របីរាប់សិបក្បាល ដែលត្រូវបានឃាត់ទុកនោះ ត្រូវគេសង្ស័យថា ជាសត្វដែលត្រូវគេដឹកជញ្ជូនឆ្លងដែនចេញពីប្រទេសជិតខាងចូលមកក្នុងទឹកដីកម្ពុជា តាមច្រកព្រំដែននៃខេត្តស្ទឹងត្រែង ។
ការឈានទៅដល់ការឃាត់រថយន្តដឹកជញ្ជូនសត្វគោឥក្របី ចំនួន៥ករណីនេះ គឺបន្ទាប់ពីសមត្ថកិច្ចពិនិត្យឃើញមានភាពមិនប្រក្រតីលើឯកសារអមដំណើរ ដូចជា លិខិតស្នាមមួយចំនួនបានហួសសុពលភាព (ហួសកំណត់ថ្ងៃខែប្រើប្រាស់)។លិខិតបញ្ជាក់ការទិញ-លក់សត្វ មិនមានលក្ខណៈត្រឹមត្រូវ និងខ្វះភាពត្រឹមត្រូវគ្រប់គ្រាន់តាមទម្រង់រដ្ឋបាល។
ពាក់ព័ន្ធនឹងករណីនេះ លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានមានប្រសាសន៍បញ្ជាក់ប្រាប់អ្នកសារព័ត៌មានថា ការដឹកជញ្ជូនសត្វពាហនៈទាំងនេះ គឺមិនមានលក្ខណៈគ្រប់ជ្រុងជ្រោយ និងមានប្រភពដើមមិនច្បាស់លាស់នោះឡើយ ។
បច្ចុប្បន្ន មន្ត្រីជំនាញបសុសត្វកំពុងធ្វើការត្រួតពិនិត្យ និងផ្ទៀងផ្ទាត់ឯកសារ ។ ប្រសិនបើរកឃើញថា មានការរំលោភបំពាន ឬល្មើសច្បាប់នោះ មន្ទីរជំនាញនឹងអនុវត្តវិធានការច្បាប់ទៅតាមច្បាប់ស្តីពីសុខភាពសត្វ និងផលិតកម្មសត្វជាធរមាន ដោយគ្មានការលើកលែងឡើយ ។
គួរបញ្ជាក់ផងដែរថា ការចរាចរណ៍សត្វគោ-ក្របី ពីប្រទេសជិតខាងជាពិសេស ប្រទេសឡាវចូលមកកម្ពុជាខេត្តស្ទឹងត្រែង មានការកម្រើកឡើងវិញក្នុងរយៈពេលប៉ុន្មានខែចុងក្រោយនេះ ។ ទោះជាយ៉ាងណា គេនៅមិនទាន់ដឹងច្បាស់នៅឡើយទេថា បន្ទាប់ពីឆ្លងកាត់ខេត្តស្ទឹងត្រែងទៅគោ-ក្របីទាំងនោះ ត្រូវបានគេដឹកជញ្ជូនបន្តទៅចែកចាយ ឬផ្គត់ផ្គង់នៅទីផ្សារក្នុងតំបន់ និងខេត្ត-ក្រុងណាមួយបន្តនោះដែរ ។
ទន្ទឹមនេះ ប្រជាពលរដ្ឋទូទាំងប្រទេសសំណូមពរដោយទទូច គឺបញ្ចប់ការចរាចរណ៍ការនាំយកអីវ៉ាន់ ទំនិញ ឬសត្វ អ្វីផ្សេងៗពីប្រទេសចោរឈ្លានពានថៃយកមកផ្គត់ផ្គង់ប្រើប្រាស់នៅក្នុងប្រទេសកម្ពុជា ៕
ចែករំលែកព័តមាននេះ