រាជធានីភ្នំពេញ ៖ នៅម៉ោង២រសៀលថ្ងៃទី៤ សីហា ២០១១ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាសមាជិកគណៈកម្មាធិការកណ្តាលគណបក្សប្រជាជន រួមជាមួយគណៈអធិបតីជាច្រើនរូបទៀតដូចជាអភិបាលខណ្ឌសែនសុខ សមាជិកក្រុមការងារជួយខណ្ឌសែនសុខ បានចុះចែក
រាជធានីភ្នំពេញ ៖ នៅម៉ោង២រសៀលថ្ងៃទី៤ សីហា ២០១១ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាសមាជិកគណៈកម្មាធិការកណ្តាលគណបក្សប្រជាជន រួមជាមួយគណៈអធិបតីជាច្រើនរូបទៀតដូចជាអភិបាលខណ្ឌសែនសុខ សមាជិកក្រុមការងារជួយខណ្ឌសែនសុខ បានចុះចែកអំណោយដល់គ្រួសារអ្នកផ្ទុកមេរោគអេដស៍ និងកើតជំងឺអេដស៍ សរុបចំនួន២០៧គ្រួសារ ស្មើនឹង២៥៧នាក់មកពីសង្កាត់ចំនួន៦ នៅក្នុងខណ្ឌសែនសុខ ។
ក្នុងឱកាសនោះលោកឃួង ស្រេង ប្រធានគណបក្សប្រជាជនកម្ពុជាខណ្ឌសែនសុខ បានថ្លែងអំណរគុណយ៉ាងជ្រាលជ្រៅចំពោះវត្តមានរបស់លោកប្រធានគណៈអធិបតី ភ្ញៀវកិត្តិយស និងសមាជិក សមាជិកាទាំងអស់ដែលបានចូលរួមក្នុងឱកាសនោះ។ ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ក្នុងការបង្រួបបង្រួមជាតិកសាងសន្តិភាព និងអភិវឌ្ឍន៍ប្រទេសជាតិលើគ្រប់វិស័យ ជាពិសេសសម្តេចតែងយកចិត្តទុកដាក់ទៅលើទុក្ខលំបាករបស់ប្រជាពលរដ្ឋជួយជ្រោមជ្រែងឧបត្ថម្ភ និងកាត់បន្ថយភាពក្រីក្ររបស់ប្រជាពលរដ្ឋក្នុងប្រទេស ។ ជាមួយគ្នានេះដែរ លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តែងយកចិត្តទុកដាក់ទៅលើអ្នកផ្ទុកមេរោគអេដស៍ និងអ្នកជំងឺអេដស៍និងបានអំពាវនាវឱ្យអាជ្ញាធរគ្រប់លំដាប់ថ្នាក់ជួយឧបត្ថម្ភទាំងស្មារតី និងសម្ភារ ជាពិសេសមិនត្រូវរើសអើងដល់អ្នកទាំងនោះឡើយ។
ដើម្បីឆ្លើយតបនឹងអនុសាសន៍ដ៏ខ្ពង់ខ្ពស់របស់ប្រមុខរដ្ឋាភិបាល ក្រុមការងាររបស់គណបក្សប្រជាជនកម្ពុជាខណ្ឌសែនសុខ រួមជាមួយគណៈកម្មាធិការខណ្ឌសែនសុខ បានរៀបចំពិធីចែកអំណោយនេះឡើង ដើម្បីលើកទឹកចិត្តដល់អ្នកផ្ទុក និងអ្នកកើតជំងឺអេដស៍ ដែលម្នាក់ៗទទួលបានថវិកា២ម៉ឺនរៀល អាវយឺតមួយ ជាអំណោយដ៏ខ្ពង់ខ្ពស់ របស់លោកម៉ម ប៊ុនហេង និងអង្ករ១០គីឡូក្រាម ជាអំណោយរបស់គណៈកម្មាធិការគណបក្សប្រជាជនកម្ពុជាខណ្ឌសែនសុខ។
ជាចុងក្រោយ ក្នុងនាមជាគណៈកម្មាធិការគណបក្សប្រជាជនខណ្ឌសែនសុខ លោកសូមថ្លែងអំណរគុណដល់លោកម៉ម ប៊ុនហេង ដែលបានឆ្លៀតឱកាសចូលរួមជាអធិបតីក្នុងអង្គពិធីនេះ និងសំណូមពរឱ្យអ្នកផ្ទុក និងអ្នកកើតជំងឺអេដស៍ទាំងអស់កុំបាក់ទឹកចិត្ត ត្រូវខិតខំថែរក្សាសុខភាព ដើម្បីឱ្យរស់រានមានជីវិតបានយូរ៕
ចែករំលែកព័តមាននេះ