ពលរដ្ឋនៅស្រុកកងមាស និងស្រុកស្រីសន្ធរ ត្អូញត្អែររឿងកាណូតដទទឹង ផ្អាកដំណើរការជាង២០ថ្ងៃដែលបង្កការលំបាកក្នុងការធ្វើដំណើរ
- កំពង់ចាម
ខេត្តកំពង់ចាម ៖ រយៈពេលជាង២០ថ្ងៃមកហើយ ដែលកាណូតដទទឹងមិនបានឆ្លងពីក្រោយភូមិស្វាយស្រណោះទី១ ឃុំរកាអា ស្រុកកងមាស មកកាន់ព្រែកពោធិ៍ ស្រុកស្រីសន្ធរ ។ ចំពោះមូលហេតុ ដែលមិនបានឆ្លងនេះ ត្រូវបានអាជ្ញាធរមូលដ្ឋានអះអាងថា កាណូតខូចម៉ាស៊ីនត្រូវប្រើពេលជួសជុលរហូតដល់មួយខែឯណោះទើបរួចរាល់ ។
បើតាមប្រជាពលរដ្ឋម្នាក់មានស្រុកកំណើតនៅភូមិស្វាយស្រណោះទី១ បានរៀបរាប់ឲ្យដឹងកាលពីល្ងាចថ្ងៃទី១០ មិថុនា ឆ្នាំ២០២៦ ថា ពីមុនការរង់ចាំឆ្លងកាណូតដទទឹងកាត់ទន្លេមេគង្គ មកកាន់ត្រោយម្ខាងទៀត នៅព្រែកពោធិ៍ស្រុកស្រីសន្ធរ គឺមិនរង់ចាំយូរនោះទេ ។
តែមួយរយៈចុងក្រោយនេះ គាត់បានជិះម៉ូតូមកកំពង់ដ ត្រូវអង្គុយរង់ចាំ មានពេលខ្លះដល់ទៅពីរបីម៉ោង មិនឃើញឆ្លងទៀតក្នុងចិត្តហាក់បីដូចជាមួម៉ៅ សុខចិត្តជិះម៉ូតូទៅឆ្លងកំពង់ដនៅកងតាណឹង ដែលមានចម្ងាយប្រមាណ៨គីឡូម៉ែត្រ ហើយការដែលកាណូតមិនបានឆ្លង គឺជាង២០ថ្ងៃហើយ ។
ប្រជាពលរដ្ឋបានបន្តទៀតថា ស្របពេលដែលកំពង់ដស្វាយស្រណោះ នៅដំណើរការឆ្លងគឺបានផ្ញើអីវ៉ាន់ពីព្រែកពោធិ៍ មកកាន់ត្រើយម្ខាងនៅស្វាយស្រណោះ គឺមានលក្ខណៈងាយស្រួល ដោយមានអ្នករង់ចាំទទួលពេលដែលត្រូវការឆ្លងម្ដងមនុស្សម្នាក់យកតម្លៃ១៥០០៛ ម៉ូតូ១គ្រឿង១០០០រៀល ។
ម្យ៉ាងវិញទៀត បើបងប្អូននៅត្រើយស្រុកកងមាស មកទិញរបស់របរសម្រាប់ធ្វើបុណ្យទានក្នុងក្រុមគ្រួសារ ពេលដែលឆ្លងកាណូតមកដល់ត្រើយម្ខាង ដោយគ្រាន់តែឡើងបន្តិច គឺដល់ផ្សារព្រែកពោធិ៍ សំបូរអីវ៉ាន់លក់មិនខ្វះនោះទេ ។ តែដល់កំពង់ដមួយនេះ មិនបានឆ្លងត្រូវជិះម៉ូតូមកឆ្លងនៅមាន់ដប់ ស្រុកស្រីសន្ធរ មកកាន់កងតាណឹង ស្រុកកងមាស ដែលមានចម្ងាយពីកំពង់ដប្រមាណ៨គីឡូម៉ែត្រ បើត្រូវផ្ញើរបស់របរវិញ ឬទិញអ្វីធ្វើបុណ្យមិនសំបូរដូចនៅព្រែកពោធិ៍ទេ(មាន់ដប់) ។
ជួនពេលខ្លះ មនុស្សមករង់ចាំពីរទៅបីនាក់ មិនឃើញមានអ្នកផ្សេងមកបន្ថែម កម្មករកាណូតប្រាប់ឱ្យម៉ៅឆ្លងម្ដងតម្លៃ២ទៅ៣ម៉ឺនរៀល គឺពួកគាត់មិនឆ្លងសុខចិត្តជិះទៅឆ្លងកន្លែងផ្សេង ហើយកម្មកររត់កាណូតមើលទៅដូចខ្វះការទំនាក់ទំនងល្អជាមួយពលរដ្ឋទៀតផង។
លោកជា ម៉ាប់ ម្ចាស់វិនិយោគកំពង់ដ(ស្វាយស្រណោះ-ព្រែកពោធិ៍)បានប្រាប់តាមទូរសព្ទឱ្យដឹង កាលពីល្ងាចថ្ងៃទី១០ មិថុនា ឆ្នាំ២០២៦ ថា ចំពោះតម្លៃមនុស្សដែលត្រូវឆ្លងក្នុងមួយជើង គឺដូចប្រជាពលរដ្ឋអាងខាងលើមែន មួយវិញទៀតនៅកណ្ដាលទន្លេមានដុះកន្ទុយកោះវែងជាងមុន ពេលត្រូវឆ្លងកាណូតម្ដងត្រូវប្រើពេលប្រហែល២៥នាទី ចំណែកទីតាំងមួយទៀត ដែលរូបលោកវិនិយោគនៅភូមិថ្មី ប្រើពេលឆ្លងប្រហែល៥នាទីប៉ុណ្ណោះគឺដល់ត្រើយម្ខាង ។ អ្នកខ្លះ គេមានម៉ូតូសុខចិត្តជិះមកឆ្លងតាមស្ពានព្រែកតាមាក់ ឆ្ពោះមកកាន់ព្រែកពោធិ៍ដោយប្រើពេលវេលាប្រហែលកន្លះម៉ោង ។ ចំពោះមូលហេតុដែលកាណូតរបស់លោកមិនបានឆ្លងដោយសារតែខូចម៉ាស៊ីន និងត្រូវដូរភ្លៅដោយប្រើពេលរហូតដល់មួយខែ ។
ម្ចាស់វិនិយោគបានត្អូញតែ្អរថា ស្របពេលវិបត្តិប្រេងពិភពលោកក្នុងមួយកានធ្លាប់តែតម្លៃ១២ម៉ឺនរៀល ឡើងដល់ជិត២០ម៉ឺនរៀលក្នុងមួយកានស្មើ៣០លីត្រ ។ បើមានមនុស្សឆ្លងពីរទៅបីនាក់យកមិនបានមួយម៉ឺនរៀល ដូច្នេះ កាណូតឆ្លងទៅឆ្លងមកតែ៣ជើង គឺអស់ប្រេងមួយកានហើយ គឺម្ចាស់ត្រូវចូលដើម រហូតមកដល់ពេលនេះ កាណូតបានដូរម៉ាស៊ីនរួចរាល់ ក្រោយពេលជួសជុលហើយនិងទៅដាក់ឲ្យដំណើរការឡើងវិញ ។
ចែករំលែកព័តមាននេះ