រាជធានីភ្នំពេញ ៖ នារសៀលថ្ងៃទី១០ ខែមិថុនា ឆ្នាំ២០១៦ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ ឲ្យដឹងថា “ខ្ញុំសូមជម្រាបជូនបងប្អូនអ្នកសារព័ត៌មាន លើករណីបុគ្គលសង្ស័យ ចំនួន៤នាក់ ដែលសមត្ថកិច្ចបានឃាត់ខ្លួន តំណាងអយ្យការបានសម្រេចចោទប្រកា ន់តាមរយៈដីកាបញ្ជូនរឿងឱ្យស៊ើបសួរ ពីបទ.ឃាតកម្មគិតទុកជា មុន បទ.ចាប់ ឃុំឃាំង និងបង្ខាំងដោយខុសច្បាប់ និងបទប្រើប្រាស់ឯកសារសាធារណៈក្លែង តាមមាត្រា ២០០ មាត្រា ២៥៣ និងមាត្រា ៦៣០ នៃក្រមព្រហ្មទណ្ឌ ចំណែកឯបក្ខពួកដែលរត់ គេចខ្លួនត្រូវបានចោទប្រកាន់ពីបទ ផ្តើមគំនិតក្នុងបទឃាតកម្មគិតទុកជាមុន បទចាប់ ឃុំឃាំង និងបង្ខាំងដោយខុសច្បាប់ ដែលត្រូវផ្តន្ទាទោសតាមមាត្រា ២៨ មាត្រា ២០០ និងមាត្រា ២៥៣ នៃក្រមព្រហ្មទណ្ឌ” ។
ជនសង្ស័យទាំង៤ នាក់មាន ៖
១.ឈ្មោះ YU WEIMING ភេទប្រុស អាយុ២៧ឆ្នាំ ជនជាតិចិន មុខរបរ អ្នកគ្រងក្រុមហ៊ុនសន្តិសុខ និងជាជំនួយការថៅកែឈ្មោះ LIN WEIDA មានទីលំនៅបុរីហាយតិចលុច្សសារី ផ្ទះលេខ១៦ ផ្លូវលុច្សសារីហាយតិច ភូមិឫស្សីស្រស់ សង្កាត់និរោធ ខណ្ឌច្បារ អំពៅ រាជធានីភ្នំពេញ។
២.ឈ្មោះ WANG YEN LONG ភេទប្រុស អាយុ៣១ឆ្នាំ ជនជាតិចិន មុខរបរ កងការពារថៅកែឈ្មោះ LIN WEIDA មានទីលំ នៅបុរីហាយតិចលុច្សសារី ផ្ទះលេខ១៦ ផ្លូវលុច្សសារីហាយតិច ភូមិឫស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ។
៣.ឈ្មោះ យុន គឹមហ៊ន ភេទប្រុស អាយុ៤១ឆ្នាំ ជនជាតិខ្មែរ មុខរបរ អ្នកបើកបររថយន្ត មានទីលំនៅផ្ទះមិនចាំលេខ ផ្លូវបេតុង ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
៤.ឈ្មោះ ខុន ស្រីដា ភេទប្រុស អាយុ៤៧ឆ្នាំ ជនជាតិខ្មែរ មុខរបរ បុគ្គលិកអនាម័យ មានទីលំនៅផ្ទះជួល ផ្លូវបេតុង ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
យោងតាមការចោទប្រកាន់ដូចមានបទល្មើសខាងលើ មាត្រា ២០០ មាត្រា ២៥៣ មាត្រា ៦៣០ និងមាត្រា ២៨ នៃក្រមព្រហ្ម ទណ្ឌ ជនជាប់ចោទប្រឈមជាប់ពន្ធនាគារពី១ឆ្នាំ ទៅ៣ឆ្នាំ ពី៣ឆ្នាំ ទៅ ៥ឆ្នាំ ពី៥ឆ្នាំ ទៅ១០ឆ្នាំ និងគុកអស់មួយជីវិត ។
សូមជម្រាបថា កាលថ្ងៃទី០១ ខែមិថុនា ឆ្នាំ២០២៦ ដោយមានការចង្អុលបង្ហាញពីលោកឧត្តមសេនីយ៍ឯក ជួន ណារិន្ទ អគ្គស្នងការរង ស្នងការនគរបាលរាជធានីភ្នំពេញ កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយអធិការដ្ឋាននគរបាលខណ្ឌច្បារអំពៅ និងអធិការដ្ឋាននគរបាលខណ្ឌជ្រោយចង្វារ ក្រោមការដឹកនាំពីលោកឧត្តមសេនីយ៍ត្រី ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ លោកឧត្តមសេនីយ៍ទោ លី ប៊ុនអេង ស្នងការរងទទួលការិយាល័យនគរបាលព្រហ្មទណ្ឌកម្រិតស្រាល និងលោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល បានធ្វើការឃាត់ខ្លួនជនសង្ស័យចំនួន០៤នាក់ ពាក់ពន្ធករណីចាប់មនុស្សបង្ខាំងដោយខុសច្បាប់ និងសម្លាប់ជនរងគ្រោះ២នាក់ ម្នាក់ជាភេទទី៣ និងម្នាក់អ្នកបើកបររថយន្ត ដាក់សាកសពចូលក្នុងលូ ចាក់បេតុងពីលើ ប្រព្រឹត្តិនៅចំណុចផ្ទះសំណាក់១៦៨D ផ្លូវបេតុង ភូមិកោះក្របី សង្កាត់ព្រែកថ្មី ខណ្ឌច្បារអំពៅ កាលពីថ្ងៃទី២៣ ខែឧសភា ឆ្នាំ២០២៦ វេលាម៉ោង២៣ និង៣០នាទីយប់ ។
ជនរងគ្រោះនោះមាន ៖ ម្នាក់ឈ្មោះ តាំង ស៊ីម៉េង ភេទប្រុស (ក្លែងភេទជាស្រី) អាយុ៣៥ឆ្នាំ ជនជាតិខ្មែរ មុខរបរ បុគ្គលិកក្រុមហ៊ុន មានទីលំនៅស្នាក់នៅភូមិ៦ សង្កាត់អូរឫស្សីទី២ ខណ្ឌ៧មករា រាជធានីភ្នំពេញ។ និងម្នាក់ឈ្មោះ អែម គីមស្រ៊ុន ភេទប្រុស អាយុ៣៨ឆ្នាំ មុខរបរ បើកបររថយន្តតាក់ស៊ី មានទីលំនៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
ក្រោយចាប់ខ្លួនជនសង្ស័យ បានសារភាពនៅចំពោះមុខសមត្ថិច្ច រាល់សកម្មភាព ដែលពួកគេបានប្រព្រឹត្ត ទើបសមត្ថកិច្ចបន្តការ ស្រាវជ្រាវ និងរកឃើញទីតាំងកន្លែងកប់សាកសពជនរងគ្រោះទាំងពីរនាក់ ក្នុងរណ្តៅលូ មានចាក់បេតុងពីលើ នៅចំណុចផ្ទះគ្មានលេខ ផ្លូវបេតុង ភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ ក្នុងនោះសមត្ថកិច្ចក៏បានចាប់យកវត្ថុតាងមាន ៖
-ដំបង ចំនួន០១
-ពូថៅ ចំនួន០១
-ខ្សែភ្លើងមួយចំនួន និងទូរស័ព្ទម៉ាកអាយហ្វូន ០១គ្រឿង។
ចម្លើយសារភាពរបស់ជនសង្ស័យទាំង០៤ នាក់បានបញ្ជាក់ទៀតថា ពួកគេគឺជាជនដៃអ្នកចាប់បង្ខាំង និងសម្លាប់ជនរងគ្រោះ ដាក់ចូលលូ ចាក់បេតុងពីលើ ពិតមែន ប៉ុន្តែពួកគេធ្វើតាមបញ្ជាពីមេខ្លោង ដែលមេខ្លោងនោះ បានរត់គេចខ្លួនទៅក្រៅប្រទេសបាត់ហើយ ។
ក្រោយពីតំណាងអយ្យការបើកការស៊ើបសួរ និងចោទប្រកាន់ជាផ្លូវការ សំណុំរឿងត្រូវបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន រង់ចាំបើកសវនាការផ្តន្ទាទោសទៅតាមច្បាប់ជាធរមាន ៕
ចែករំលែកព័តមាននេះ