រាជធានីភ្នំពេញ ៖ សម្តេចតេជោ ហ៊ុន សែន ប្រមុខរដ្ឋស្តីទី បានប្រកាសចាត់វិធានការលើក្រុមឈ្មួញដែលបាននាំសាច់បង្កកពីប្រទេសថៃ និងស្វែងរកមន្ត្រីដែលគប់គិត បើកឱ្យនាំចូលសាច់បង្កកចូលកម្ពុជា។
ការប្រកាសចាត់វិធានការនេះ បន្ទាប់ពីសម្តេចចេញបទបញ្ជា ឱ្យសមត្ថកិច្ចស្វែងរកមុខអ្នកនាំទំនិញពីថៃកាលពីពេលថ្មីៗនេះរហូតដល់ថ្ងៃទី១០ មិថុនា សមត្ថកិច្ច និងមន្ត្រីជំនាញ បានចុះឆែករកឃើញទីតាំងជាបន្តបន្ទាប់ នៅក្នុងរាជធានីភ្នំពេញមានស្តុកទុកសាច់បង្កករាប់រយតោន ។
ការលើកឡើងរបស់សម្តេចតេជោ ក្នុងឱកាសសំណេះសំណាលជាមួយមន្ត្រីក្រុមប្រឹក្សាថ្នាក់ដឹកនាំមន្ទីរ អង្គភាពនានានៅខេត្តបន្ទាយមានជ័យ នាព្រឹកថ្ងៃទី១១ ខែមិថុនា ឆ្នាំ២០២៦ ។
សម្តេចតេជោ ហ៊ុន សែន ប្រកាសចាត់វិធានការមិនត្រឹមអ្នកនាំចូលនោះទេ គឺសម្តេចនឹងចាត់វិធានការចំពោះមន្ត្រី ដែលបានគប់គិតជាមួយឈ្មួញ ដែលនាំសាច់បង្កកទាំងនេះចូលមកកម្ពុជា ។ សម្តេចតេជោថែមទាំងបញ្ជាក់ទៀតថា សម្តេចនឹងហៅឈ្មួញមកសួរដោយផ្ទាល់ រកមុខមន្ត្រីដែលពាក់ព័ន្ធការនាំសាច់បង្កកទាំងនេះចូលមកកម្ពុជា ។
សម្តេចតេជោ ថែមទាំងបញ្ជាក់ទៀតថា សម្តេចនឹងតាមរកមុខរាល់ឈ្មួញ ដែលនាំទំនិញពីប្រទេសថៃ ។ សម្តេចតេជោ បានចាត់ទុកវិធានការនេះជាការឆ្លើយតបនឹងវិធានការរបស់ថៃ ដែលបានធ្វើសកម្មភាពដាក់សម្ពាធសេដ្ឋកិច្ចកម្ពុជា តាមរយៈការប្រកាសកាត់ផ្តាច់ថាមពលអគ្គិសនី បិទការនាំប្រេងមកកម្ពុជា តាំងពីពេលមានបញ្ហាព្រំដែនដំបូងៗ ។
សម្តេចតេជោ ក៏បានបញ្ជាក់ថា រយៈពេលមួយឆ្នាំហើយ ដែលថៃបានបិទព្រំដែនជាមួយកម្ពុជា តែមិនបានបង្កបញ្ហាណាមួយមកលើកម្ពុជាពាក់ព័ន្ធបញ្ហាទំនិញនោះទេ ។ តែផ្ទុយទៅវិញថៃ បានបាត់បង់ថវិកាប្រមាណ១០ពាន់លានដុល្លារ តាមរយៈការលក់ទំនិញមកកម្ពុជា ៕
ចែករំលែកព័តមាននេះ