ទីក្រុងហ្សឺណែវ ៖ នៅថ្ងៃទី៩ ខែមិថុនា ឆ្នាំ២០២៦ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចូលរួមធ្វើបទអន្តរាគមន៍ក្នុងកិច្ចប្រជុំថ្នាក់រដ្ឋមន្ត្រីនៃរដ្ឋសមាជិកអង្គការ ILO ក្នុងតំបន់អាស៊ីប៉ាស៊ីហ្វិក (ASPAG Ministerial Meeting) ក្រោមប្រធានបទ «ពេលវេលានៃការជ្រើសរើស៖ ការទាញយកផលប្រយោជន៍ពីបញ្ញាសិប្បនិម្មិតសម្រាប់ការងារសមរម្យ» ក្នុងទីក្រុងហ្សឺណែវ ប្រទេសស្វ៊ីស ។
ក្នុងឱកាសនេះ ឯកឧត្តមរដ្ឋមន្ត្រីបានថ្លែងថា AI ដែលផ្តល់ទាំងឱកាសដែលមិនធ្លាប់មានពីមុនមក និងទាំងបញ្ហាប្រឈមផ្នែកគោលនយោបាយ មានសក្តានុពលក្នុងការបង្កើនផលិតភាព ជំរុញនវានុវត្តន៍ និងបង្កើតវិធីសាស្ត្រថ្មីសម្រាប់កំណើនសេដ្ឋកិច្ច ។
ឯកឧត្តម បានមានប្រសាសន៍ថា យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលផ្តោតលើការអភិវឌ្ឍមូលធនមនុស្ស ការធ្វើបរិវត្តកម្មឌីជីថល និងភាពធន់នៃសេដ្ឋកិច្ច គឺជាស្នូលនៃរបៀបវារៈអភិវឌ្ឍន៍ជាតិដ៏មានសារៈសំខាន់។ ដោយផ្អែកលើចក្ខុវិស័យនេះ កម្ពុជាជឿជាក់យ៉ាងមុតមាំថា ការវិនិយោគលើមនុស្ស គឺជាការឆ្លើយតបប្រកបដោយចីរភាពបំផុតចំពោះការផ្លាស់ប្តូរបច្ចេកវិទ្យា។ តាមរយៈកំណែទម្រង់ជាបន្តបន្ទាប់ក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) រួមទាំងកម្មវិធី TVET ១,៥ លានសម្រាប់យុវជនមកពីគ្រួសារក្រីក្រ និងងាយរងហានិភ័យ, កម្មវិធីមុខរបរ និងការងារសមរម្យសម្រាប់យុវជននៅកម្ពុជា (DEY) និងគំនិតផ្តួចផ្តើមកាតាលីករសកល ស្ដីពីការងារសមរម្យ និងការគាំពារសង្គមសម្រាប់អន្តរកាលយុត្តិធម៌ កម្ពុជាកំពុងផ្តល់ជូនកម្លាំងពលកម្មនូវជំនាញ ភាពបត់បែន និងឱកាសសិក្សាពេញមួយជីវិត ដែលចាំបាច់សម្រាប់ភាពជោគជ័យក្នុងពិភពការងារដែលកំពុងវិវត្តយ៉ាងឆាប់រហ័ស ។
ជាមួយគ្នានេះ ការរីកចម្រើនផ្នែកបច្ចេកវិទ្យាត្រូវផ្អែកលើគុណតម្លៃរបស់មនុស្ស។ អភិបាលកិច្ចលើ AI គួរតែត្រូវបានដឹកនាំដោយគោលការណ៍តម្លាភាព គណនេយ្យភាព យុត្តិធម៌ និងការគោរពគោលការណ៍ និងសិទ្ធិជាមូលដ្ឋាននៅកន្លែងការងារ។ សម្រាប់តំបន់អាស៊ីប៉ាស៊ីហ្វិក បញ្ហាប្រឈមនៅចំពោះមុខគឺមិនមែនមានតែការត្រៀមខ្លួនផ្នែកបច្ចេកវិទ្យាប៉ុណ្ណោះទេ ប៉ុន្តែក៏មានការត្រៀមខ្លួនផ្នែកគោលនយោបាយផងដែរ។ ខណៈដែលប្រទេសនីមួយៗកំពុងធ្វើដំណើរទៅមុខក្នុងល្បឿនខុសៗគ្នា និងមានចំណុចចាប់ផ្តើមខុសគ្នា កិច្ចសហប្រតិបត្តិការក្នុងតំបន់គឺពិតជាមានសារៈសំខាន់ជាខ្លាំង ។
ឯកឧត្តម បានអំពាវនាវឱ្យពង្រឹងកិច្ចសហការលើជំនាញឌីជីថល ការស្រាវជ្រាវព័ត៌មានទីផ្សារការងារ ការផ្ទេរបច្ចេកវិទ្យា និងការចែករំលែកចំណេះដឹង ដើម្បីធានាថា គ្មានប្រទេសណាមួយ និងគ្មានកម្មករនិយោជិតណាម្នាក់ត្រូវបានទុកចោលនោះទេ។ នៅពេលដែល AI បន្តផ្លាស់ប្តូរពិភពការងារ, រដ្ឋាភិបាល និយោជក និងកម្មករនិយោជិតត្រូវតែធ្វើការរួមគ្នាតាមរយៈកិច្ចសន្ទនាសង្គមប្រកបដោយប្រសិទ្ធភាព ដើម្បីដោះស្រាយបញ្ហាប្រឈម កាត់បន្ថយហានិភ័យ និងបង្កើតឱកាសសម្រាប់មនុស្សគ្រប់រូប។ កម្ពុជាបានបញ្ជាក់ជាថ្មីនូវការប្តេជ្ញាចិត្តឥតងាករេចំពោះរបៀបវារៈការងារសមរម្យរបស់អង្គការ ILO គោលការណ៍ត្រីភាគីនិយម និងកិច្ចសន្ទនាសង្គម៕
ចែករំលែកព័តមាននេះ