ធនាគារពិភពលោក បានទម្លាក់ការព្យាករណ៍សេដ្ឋកិច្ចកម្ពុជា នៅខែមិថុនានេះ ទាបជាងការព្យាករណ៍កាលពីខែធ្នូ ឆ្នាំ២០២៥ ចំនួន០,៤ភាគរយ ប៉ុន្តែទោះជាយ៉ាងណា ស្ថាប័នម្ចាស់បំណុលសាធារណៈកម្ពុជាមួយនេះ បានអះអាងថា សកម្មភាពគោលនយោបាយដ៏រឹងមាំរបស់កម្ពុជា នៅតែជាគន្លឹះក្នុងការការពារការងារ និងជីវភាពរស់នៅ របស់ប្រទេសកម្ពុជា ក្នុងអំឡុងពេលមានវិបត្តិ ។
នៅក្នុងរបាយការណ៍ដែលចេញ នៅថ្ងៃទី០៩ ខែមិថុនា ឆ្នាំ២០២៦ ធនាគារពិភពលោកបានអះអាងថា កំណើនសេដ្ឋកិច្ចកម្ពុជា នៅឆ្នាំនេះ កម្ពុជាអាចសម្រេចបានត្រឹមតែ៣,៩ភាគរយទេ ហើយឆ្នាំ២០២៧ អាចឡើងដល់៤,៩ភាគរយ ។
ខណៈពេលដែលការកើនឡើងនៃថ្លៃប្រេងឥន្ធនៈកំពុងដាក់សម្ពាធលើអាជីវកម្ម និងជីវភាពសង្គមគ្រួសារនៅកម្ពុជា ការធ្វើរបាយការណ៍អំពីបច្ចុប្បន្នភាពសេដ្ឋកិច្ច ចុងក្រោយបំផុតរបស់ធនាគារពិភពលោកបង្ហាញថា សេដ្ឋកិច្ចកម្ពុជាវាកំពុងបង្ហាញពីភាពធន់ ដែលគាំទ្រដោយការកើនឡើងនៃការវិនិយោគបរទេស និងការនាំចេញដ៏រឹងមាំ ។
ប្រភពដដែលបានអះអាងថា សេដ្ឋកិច្ចកម្ពុជាកំពុងឆ្លងកាត់ការធ្លាក់ចុះនៃវិស័យអចលនទ្រព្យ និងការធ្លាក់ចុះនៃប្រាក់បញ្ញើបន្ទាប់ពីការវិលត្រឡប់របស់កម្មករចំណាកស្រុកជិតមួយលាននាក់ ។ អតិផរណាបានកើនឡើងដល់៥,៨ភាគរយ នៅក្នុងខែមេសា ឆ្នាំ២០២៦ ដែលប៉ះពាល់ដល់គ្រួសារដែលមានប្រាក់ចំណូលទាប។ ក្រៅពីនោះកម្ពុជា នៅប្រឈមមុខនឹងការកើនឡើងរហូតដល់១០ភាគរយ នៃតម្លៃប្រេងឥន្ធនៈ ប៉ុន្តែបានការនាំចេញ និងការវិនិយោគពីបរទេសទប់ទល់ ។
ប្រភពដដែលបានអះអាងថា ការវិនិយោគផ្ទាល់ពីបរទេស បានឈានដល់៥,១ ពាន់លានដុល្លារ នៅឆ្នាំ ២០២៥ គឺវាជួយបង្កើតការងារផ្លូវការប្រមាណ៤០០.០០០ ការងារ ខណៈពេលដែលផ្តល់ឱកាសការងារសំខាន់ៗសម្រាប់កម្មករដែលផ្លាស់ប្តូរពីវិស័យកសិកម្ម និងពលករចំណាកស្រុកដែលវិលត្រឡប់មកធ្វើការវិញ ។
ប្រភពដដែលបានបន្តថា ការនាំចេញទំនិញកម្ពុជា ក៏នៅតែរឹងមាំផងដែរដោយកើនឡើង១៧,៧ ភាគរយនៅក្នុងត្រីមាសទីមួយ នៃឆ្នាំ២០២៦ ។
នៅក្នុងស្ថានភាពបែបនេះ លោកស្រី តានៀ មេយ័រ (Tania Meyer) ប្រធានគ្រប់គ្រងធនាគារពិភពលោកប្រចាំកម្ពុជា មានប្រសាសន៍ថា សេដ្ឋកិច្ចកម្ពុជាកំពុងប្រឹងទប់ខ្លួនបាននៅចំពោះមុខសភាពការណ៍ប៉ះទង្គិចច្រើនយ៉ាងក្នុងពេលដំណាលគ្នា ប៉ុន្តែនៅតែបង្ហាញនូវភាពធន់ទ្រាំ ដែលអាចរក្សាបានតាមរយៈវិធានការគោលនយោបាយដែលមានគោលដៅច្បាស់លាស់ ដើម្បីការពារការងារ និងជីវភាពរស់នៅរបស់ប្រជាពលរដ្ឋ ៕
ចែករំលែកព័តមាននេះ