សាខាកាកបាទក្រហមកម្ពុជាខេត្តស្ទឹងត្រែង នាំយកអំណោយមនុស្សធម៌ជួយសម្រាលទុក្ខលំបាកគ្រួសាររងគ្រោះដោយខ្យល់កន្ត្រាក់ ១៣គ្រួសារ នៅស្រុកសៀមប៉ាង
- ស្ទឹងត្រែង
ខេត្តស្ទឹងត្រែង៖ នាថ្ងៃពុធ ទី១០ ខែមិថុនា ឆ្នាំ២០២៦ នេះ សាខាកាកបាទក្រហមកម្ពុជា ខេត្តស្ទឹងត្រែង បានចុះសួរសុខទុក្ខ និងនាំយកអំណោយមនុស្សធម៌ទៅចែកជូនប្រជាពលរដ្ឋដែលរងគ្រោះដោយសារគ្រោះធម្មជាតិខ្យល់កន្ត្រាក់ ចំនួន ១៣គ្រួសារ ស្ថិតនៅក្នុងស្រុកសៀមប៉ាង។
សកម្មភាពមនុស្សធម៌នេះ ដឹកនាំដោយ លោក ហ៊ាង ប៉ូលី អនុប្រធានគណៈកម្មាធិការសាខា និង លោក សាយ ព្រលឹង នាយកសាខា រួមដំណើរដោយក្រុមប្រតិបត្តិសាខា លោកអភិបាលស្រុកសៀមប៉ាង និងអាជ្ញាធរមូលដ្ឋាន។
គ្រួសាររងគ្រោះទាំង ១៣គ្រួសារ ដែលទទួលបានការគិតគូររួមមាន៖ឃុំសេកុង ចំនួន ១២គ្រួសារ ភូមិសៀមប៉ាង០១គ្រួសារ, ភូមិលន់ ០១ គ្រួសារ និងភូមិដនឡូន ១០គ្រួសារ។ឃុំថ្មកែវ ចំនួន០១គ្រួសារ ភូមិឡាកាយ។
នាឱកាសនោះ លោក ហ៊ាង ប៉ូលី បានពាំនាំនូវ ប្រសាសន៍ផ្តាំផ្ញើសួរសុខទុក្ខ និងក្តីអាណិតស្រឡាញ់ដ៏ជ្រាលជ្រៅពីសំណាក់ អភិបាលនៃគណៈអភិបាលខេត្តស្ទឹងត្រែង និងជាប្រធានគណៈកម្មាធិការសាខា។ ជានិច្ចកាល លោកប្រធានតែងតែគិតគូរជាប្រចាំពីសុខ
ទុក្ខ និងការលំបាករបស់បងប្អូនប្រជាពលរដ្ឋក្រីក្រ និងរងគ្រោះថ្នាក់ផ្សេងៗ ដោយឈរលើគោលការណ៍មនុស្សធម៌ សង្គ្រោះទាន់ពេលវេលា មិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយណាមួយឡើយ។
ទន្ទឹមនឹងការចែកអំណោយ លោកអនុប្រធានគណៈកម្មាធិការសាខា ក៏បានអំពាវនាវ និងក្រើនរំលឹកដល់បងប្អូនប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិ និងគ្រោះមហន្តរាយផ្សេងៗដែលអាចកើតឡើងជាយថាហេតុ ក្នុងរដូវវស្សានេះ។
អំណោយមនុស្សធម៌ដែលបានផ្តល់ជូនដើម្បីជួយសម្រាលការលំបាកចំពោះមុខ ក្នុងមួយគ្រួសារទទួលបាន៖អង្ករ ២៥ គីឡូក្រាម .មី ១ កេស និង ត្រីខ ១ យួរឃីត ១ កញ្ចប់ (មុង, ភួយ, សារុង, ក្រមា)តង់ ១ ផ្ទាំង រួមទាំងថវិកាឧបត្ថម្ភមួយចំនួនទៀត។
ការឆ្លើយតបដ៏ឆាប់រហ័សនេះ បានស្តែងឱ្យឃើញពីវប្បធម៌ចែករំលែក និងការយកចិត្តទុកដាក់ខ្ពស់របស់ថ្នាក់ដឹកនាំខេត្ត ក៏ដូចជាកាកបាទក្រហមកម្ពុជា ដែលតែងតែនៅក្បែរនិងជាទីពឹងរបស់ប្រជាពលរដ្ឋនៅគ្រប់កាលៈទេសៈ៕
ចែករំលែកព័តមាននេះ