ឆែកឃ្លាំងក្លាស្សេសាច់បង្កកនៅសែនសុខ សង្ស័យនាំចូលពីថៃ ដោយរកឃើញសាច់បង្កក និងជង្គង់មាន់រាប់រយតោន
- ភ្នំពេញ
រាជធានីភ្នំពេញ ៖ ទីតាំងក្លាស្សេសាច់បង្កកដ៏ធំមួយដែលគេសង្ស័យថា នាំចូលពីប្រទេសថៃ ត្រូវបានកម្លាំងចម្រុះនិងអាជ្ញាធរមូលដ្ឋានខណ្ឌសែនសុខ ចុះឆែកឆេរដោយរកឃើញ សាច់បង្កកគ្រប់ប្រភេទ រួមទាំងជង្គង់មាន់ ស្លាបមាន់ ប្រហិតក្លាស្សេរាប់រយតោន ។
ប្រតិបត្តិការឆែកឃ្លាំងទូក្លាស្សេនេះ ធ្វើឡើងកាលពីវេលាម៉ោង១រសៀលថ្ងៃទី១០ ខែមិថុនាឆ្នាំ២០២៦ ស្ថិតនៅចំណុចទីតាំងឃ្លាំងសាច់បង្កកក្នុងភូមិសំរោងទាវ សង្កាត់ក្រាំង ក្នុងខណ្ឌសែនសុខ រាជធានីភ្នំពេញ ។
នៅក្នុងព្រឹត្តិការនេះដែរ មានការចូលរួមពីមន្ត្រីជំនាញអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប), មន្ត្រីគយ បសុពេទ្យ និងអាជ្ញាធរមូលដ្ឋានខណ្ឌសែនសុខ ព្រមទាំងមានការសម្របសម្រួល នីតិវិធីដោយតំណាងអយ្យការអមសាលាដំបូងរាជធានីភ្នំពេញផងដែរ ។
តាមព័ត៌មានបានឲ្យដឹងថា នៅវេលារសៀលនេះ សមត្ថកិច្ចចម្រុះក៏បើកប្រតិបត្តិការឆែកឆេរដោយរកឃើញរថយន្តកុងតឺន័រដឹកសាច់បង្កកចំនួន២គ្រឿងដែលទើបតែចូលថ្មីៗនៅបរិវេណមុខឃ្លាំង និងរកឃើញសាច់បង្កកគ្រប់ប្រភេទ រួមទាំងជង្គង់មាន់ ស្លាបមាន់ ប្រហិតក្លាស្សេ និងគ្រឿងក្នុងរាប់រយតោន ដែលច្រកថង់ថា នាំចូលពីប្រទេសអូស្ត្រាលី និងប្រទេសផ្សេងៗទៀត ។
ទោះបីជាយ៉ាងណា សមត្ថកិច្ចជំនាញមានការសង្ស័យថា សាច់បង្កកទាំងនោះ នាំចូលពីប្រទេសថៃ ហើយសមត្ថកិច្ចជំនាញកំពុងតែធ្វើការត្រួតពិនិត្យស្រាវជ្រាវ ។ តាមព័ត៌មានឱ្យដឹងទៀតថា ទីតាំងឃ្លាំងស្តុកក្លាសេ្សសាច់បង្កកខាងលើ ជាទីតាំងជួលសម្រាប់ក្លាសេ្សសាច់ បង្កកដ៏ធំមួយ ដែលមានម្ចាស់រកស៊ីនាំសាច់បង្កកចូលពីប្រទេសក្រៅជាច្រើនយកមកស្តុកក្លាស្សេ ហើយចែកនៅតាមទីផ្សារនានានៅក្នុងរាជធានីភ្នំពេញ និងតាមបណ្ដាខេត្ត ៕
ចែករំលែកព័តមាននេះ