សង្គ្រាមអ៊ុយក្រែន ៖ អ៊ុយក្រែនអះអាងថា កងទ័ពរុស្ស៊ីបានវាយប្រហារលើទីក្រុងស្លូវីយ៉ាន់ស្ក៍ កាលពីថ្ងៃទី៩ មិថុនា ដោយទម្លាក់គ្រាប់បែកបញ្ជា ធុនFAB-1500 លើកណ្ដាលក្រុងនោះ នាវេលាម៉ោង៥ព្រឹកម៉ោងក្នុងស្រុក ។ យោងតាមអាជ្ញាធរតំបន់ថា ការវាយប្រហារនោះ បានកម្ទេចប្លុកកីឡាសម្រាប់កុមារមួយ និងអគារការិយាល័យមួយ និងបណ្ដាលឲ្យខូចខាតផ្ទះយ៉ាងតិច៣៩ខ្នង និងរថយន្ត១៥គ្រឿង ។
ការវាយប្រហារនោះ បង្ហាញពីការដាក់សម្ពាធជាប់របស់រុស្ស៊ីលើបណ្ដាតំបន់ក្រុង ដែលស្ថិតនៅក្បែរខ្សែបន្ទាន់រណសិរ្ស ។ នៅភាគឦសានអ៊ុយក្រែន បណ្ដាដ្រូនបានវាយប្រហារច្រើនលើកតំបន់ឧស្សាហកម្មមួយនៃទីក្រុងស៊ូមីអ៊ុយក្រែន បណ្ដាលឲ្យមានភ្លើងឆាបឆេះខ្លាំង ។ ការវាយប្រហារទាំងនេះ កើតមានពេលរុស្ស៊ីកំពុងតែដាក់សម្ពាធ លើផ្នែកដ៏ធំនៃខ្សែរណសិរ្ស ប្រវែងប្រមាណជា១០០០គីឡូម៉ែត្រ ពីក្រុងខាគៀវទៅក្រុងឃ័រសុន ។ អាជ្ញាធរអ៊ុយក្រែនរៀបរាប់ពីការប៉ះទង្គិចគ្នាជាង១០០លើក រយៈពេល២៤ម៉ោងចុងក្រោយនេះ ជាមួយការប្រយុទ្ធខ្លាំងជាពិសេសនៅតំបន់ដូណេតស្ក៍ ។
ទន្ទឹមនឹងនេះ រុស្ស៊ីបន្តវាយប្រហារដោយដ្រូន និងមីស៊ីលប្រឆាំងបណ្ដាទីក្រុង និងហេដ្ឋារចនាសម្ព័ន្ធថាមពលអ៊ុយក្រែន។ ចំណែកអ៊ុយក្រែនវិញបន្តវាយប្រហារបណ្ដាទីតាំងក្នុងដែនដីរុស្ស៊ី និងក្នុងដែនដីរុស្ស៊ីកាន់កាប់ ។ អ៊ុយក្រែនបានវាយប្រហារខ្លាំងក្លាលើបណ្ដាទីតាំងប្រេងនៅរុស្ស៊ី និងនៅតំបន់គ្រីមេ ។ សេនាធិការដ្ឋានកងទ័ពអ៊ុយក្រែនគូសបញ្ជាក់ថា កងទ័ពខ្លួន បានវាយប្រហារនាពេលយប់លើ់តំបន់ក្រាស្នូដារុស្ស៊ី សំដៅលើទីតាំងប្រេងកាត GROUCHOVAIA ជិតក្រុងណូវ៉ូរ៉ូសស្លីស្ក៍។ នោះជាទីតាំងប្រេង និងផលិតផលប្រេងដ៏ធំស្ថិតនៅភាគខាងត្បូងរុស្ស៊ី ។ អាជ្ញាធរតំបន់រុស្ស៊ីអះអាងថា ដ្រូនអ៊ុយក្រែន១គ្រឿងបង្កឲ្យមានភ្លើងឆេះក្នុងទីតាំងនោះដោយបញ្ជាក់ថា ពុំមានជនរងគ្រោះឡើយ។
អ៊ុយក្រែនក៏អះអាងដែរពីការវាយប្រហារកាលពីយប់ថ្ងៃទី៧ មិថុនា ប្រឆាំងមូលដ្ឋានប្រេងកាតធំមួយនៅឧបទ្វីបគ្រីមេ បណ្ដាលឲ្យមានភ្លើងឆាបឆេះ។ មូលដ្ឋានោះជាកន្លែងស្តុកប្រេងសម្រាប់បម្រើកងទ័ពរុស្ស៊ី ៕
ចែករំលែកព័តមាននេះ