ទីក្រុងវ៉ាស៊ីនតោន៖ អគ្គលេខាធិការអង្គការសហប្រជាជាតិ លោកហ្គូតេរ៉េស ប្រកាសថាលោកមានចិត្តភ្ញាក់ផ្អើលយ៉ាងខ្លាំងនឹងការកើតមានឡើងជាថ្មីនូវអំពើហិង្សានៅតំបន់មជ្ឈិមបូព៌ា។ លោកសូមអំពាវនាវឱ្យអ៊ីស្រាអែលបើកច្រកចេញចូលនៅតំបន់ហ្កាហ្សាឡើងវិញ។ លោកបង្ហោះសារនៅលើបណ្ដាញអ៊ិចថារាល់ការវាយប្រហារទាំងអស់ត្រូវតែបញ្ឈប់ជាបន្ទាន់។ បទឈប់បាញ់នៅប្រទេសលីបង់, អ៊ីរ៉ង់ និងតំបន់ហ្កាហ្សាត្រូវតែបន្តអនុវត្តឱ្យបានពេញលេញ។
អ៊ីស្រាអែលបានវាយប្រហារគោលដៅជាច្រើននៅប្រទេសអ៊ីរ៉ង់កាលពីថ្ងៃចន្ទ។ នោះជាករណីដំបូងចាប់តាំងពីមានបទឈប់បាញ់កាលពីខែមេសា។ មូលហេតុដែលអ៊ីស្រាអែលវាយប្រហារដោយសារអ៊ីរ៉ង់បាញ់មីស៊ីលជាច្រើនគ្រាប់ដាក់អ៊ីស្រាអែលក្រោមហេតុផលថាអ៊ីស្រាអែលនៅតែបន្តវាយប្រហារចូលរដ្ឋធានីបេរូតនៃប្រទេសលីបង់។ ទាំងអ៊ីស្រាអែល និងអ៊ីរ៉ង់អំពាវនាវឱ្យបិទបញ្ចប់ការវាយប្រហារគ្នាទៅវិញទៅមកបន្ទាប់ពីលោកដូណាល់ត្រាំប្រាប់ពួកគេឱ្យបញ្ឈប់ការបាញ់ប្រហារ។ ប៉ុន្តែប្រទេសទាំង២នៅតែប្រកាសថានឹងបន្តការវាយប្រហារជាថ្មីប្រសិនបើភាគីម្ខាងទៀតរំលោភបទឈប់បាញ់។
នោះជាការប្រឈមមុខដាក់គ្នាដោយផ្ទាល់ដ៏ខ្លាំងក្លាបំផុតរវាងប្រទេសទាំង២ចាប់តាំងពីខែមេសា ហើយវាបង្កការរំខានយ៉ាងខ្លាំងសម្រាប់កិច្ចខិតខំប្រឹងប្រែងរបស់រដ្ឋាភិបាលទីក្រុងវ៉ាស៊ីនតោនដើម្បីចរចាឱ្យមានកិច្ចព្រមព្រៀងជាមួយអ៊ីរ៉ង់។ លោកហ្គូតេរ៉េសក៏បានអំពាវនាវឱ្យអ៊ីស្រាអែលបើកច្រកចេញចូលដែលខ្លួនបានបិទនៅតំបន់ហ្កាហ្សា។ លោកថាធ្វើដូច្នេះដើម្បីអនុញ្ញាតឱ្យជំនួយមនុស្សធម៌អាចដឹកចូលតំបន់ហ្កាហ្សា។ លោកថាលោកក៏ខ្វាយខ្វល់យ៉ាងខ្លាំងផងដែរដែលអ៊ីស្រាអែលសម្រេចចិត្តបិទច្រកចេញចូលតំបន់ហ្កាហ្សា។ អគ្គលេខាធិការ UN រូបនេះបញ្ជាក់ជាថ្មីថាត្រូវតែបើកច្រកចេញចូលជាបន្ទាន់ដើម្បីធានាការដឹកជំនួយមនុស្សធម៌នៅទូទាំងតំបន់ហ្កាហ្សា។
បទឈប់បាញ់រវាងអ៊ីស្រាអែល និងក្រុមហាម៉ាស់ដែលសម្របសម្រួលដោយអាមេរិកនៅជាធរមាននៅឡើយទេចាប់តាំងពីខែតុលា ឆ្នាំ២០២៥។ ក្នុងនោះ មានចំណុចមួយនិយាយអំពីការធានាការដឹកជញ្ជូនជំនួយមនុស្សធម៌។ អ៊ីស្រាអែល និងក្រុមហាម៉ាស់តែងតែចោទប្រកាន់គ្នាទៅវិញទៅមកថាជាអ្នករំលោភបទឈប់បាញ់។ ចាប់តាំងពីមានបទឈប់បាញ់មក អ៊ីស្រាអែលវាយប្រហារស្លាប់ជនជាតិប៉ាឡេស្ទីន៩៥០នាក់។ នេះបើយោងតាមរបាយការណ៍របស់អាជ្ញាធរសុខាភិបាលប៉ាឡេស្ទីន៕ ប្រភព៖ Reuters
ចែករំលែកព័តមាននេះ