យោងតាមការធ្វើចំណាត់ប្រភេទប្រាក់ចំណូលប្រចាំឆ្នាំរបស់បណ្តាអត្តពលិកក្នុងលោកពីទស្សនាវដ្តីForbesដែលចេញផ្សាយក្នុងខែសីហានេះឲ្យដឹងថា កីឡាការិនីរូបស្រស់របស់រុស្ស៊ីម៉ារីយ៉ា សារ៉ាប៉ូវ៉ានៅតែស្ថិតនៅលំដាប់លើគេក្នុងចំណោមអត្តពលិកជាស្ត្រីដែលរកចំណូលប្រចាំឆ្នាំបានច្រើនជាងគេទាំង១០នាក់ក្នុងពិភពលោក។
នាងសារ៉ាប៉ូវ៉ាថ្វីដ្បិតតាំងពីឆ្នាំ២០០៨មក មិនធ្លាប់បានយកឈ្នះពានជើងឯកក្របខណ្ឌធំកីឡាតឺន្នីសមួយណាក៏ដោយ ក៏ប៉ុន្តែប្រាក់ចំណូលរបស់នាងមិនបានថយចុះទេ ។ នេះគឺជាឆ្នាំទី៧ជាប់ៗគ្នាហើយដែលនាងស្ថិតនៅលំដាប់លើគេក្នុងបញ្ជីចំណាត់ថ្នាក់ទស្សនាវដ្តីForbes។
គិតរយៈពេល១២ខែកន្លងមកបញ្ចប់ត្រឹមថ្ងៃទី១ខែកក្កដាឆ្នាំ២០១១នេះ នាងសារ៉ាប៉ូវ៉ារកបានចំណូលសរុប២៥លានដុល្លារអាមេរិកគឺស្មើ២ដងនៃប្រាក់ចំណូលរបស់នាងការ៉ូលីន វ៉ូនីអាកគីដែលស្ថិតនៅលំដាប់ទី២។ ចំណូលជាសំខាន់របស់នាងសារ៉ាប៉ូវ៉ាភាគច្រើនបានមកពីដៃគូផ្សាយពាណិជ្ជកម្មនៃក្រុមហ៊ុនឯកជននានាក្នុងនោះមានដូចជា ក្រុមហ៊ុនសំលៀកបំពាក់កីឡាNike ក្រុមហ៊ុនHead ក្រុមហ៊ុនទឹកបរិសុទ្ធEvian ក្រុមហ៊ុនសាប៊ូកក់សក់Clear Shampooក្រុមហ៊ុនទូរស័ព្ទដៃសូនីអេរិកសាន់និងក្រុមហ៊ុនគ្រឿងសំអាងTiffany and Tag Heuerជាដើម។ នៅលើគេហទំព័រFacebookវិញ នាងសារ៉ាប៉ូវ៉ាមានប្រិយមិត្តជាអ្នកគាំទ្រប្រមាណ៥លាននិង២សែននាក់។
ចំណែកកីឡាការិនីដែលរកបានចំណូលច្រើនជាងគេលំដាប់ទីបានទៅលើនាងដានីកា ភែតទ្រីក។ នាងភែតទ្រីកកីឡាការិនីប្រណាំងរថយន្តប្រភេទណាស្ការបស់អាមេរិករកចំណូលបាន១២លានដុល្លារអាមេរិកគឺនាំមុខលើនាងវេនីស វីលៀមកីឡាការិនីតឺន្នីសអាមេរិកដដែលដែលរកចំណូលបាន១១,៥លានដុល្លារ។
នាងគីម ឃ្លីស្ទ័រតារាតឺន្នីសរបស់ដាណឺម៉ាកស្ថិតនៅលំដាប់ទី៥ក្នុងទឹកប្រាក់ចំណូល១១លានដុល្លារគឺនាំមុខនាងស៊េរីណា វីលៀមដែលរកចំណូលបាន១០,៥លានដុល្លារ។ ស្ថិតនៅលំដាប់ទី៧គឺជាតារាស្គីសម្តែងលើទីលានរបស់កូរ៉េខាងត្បូងនាងគីម យូណា។ នាងយូណាដែលបច្ចុប្បន្នកំពុងតែក្លាយជាជនលេចធ្លោនៅក្នុងប្រទេសរបស់ខ្លួនរកចំណូលបានប្រចាំឆ្នាំប្រមាណ១០លានដុល្លារពោលគឺច្រើនជាងកំពូលកីឡាការិនីតឺន្នីសរបស់ចិនលីណា។
គ្រាន់តែក្នុងរយៈពេល១២ខែកន្លងមកនេះ នាងលីណារកចំណូលបាន៨លានដុល្លារ។ ចំណូលរបស់នាងបានកើនឡើងបន្ទាប់ពីនាងលីណាបានចុះកុងត្រាធ្វើជាដៃគូពាណិជ្ជកម្មជាមួយក្រុមហ៊ុនមួយចំនួនដូចជា ក្រុមហ៊ុនផលិតរថយន្តMercedes-BenzនិងDaimler។ ក្រៅពីនេះទៀតក៏មានក្រុមហ៊ុនNike ក្រុមហ៊ុនផលិតការ៉េមHaagen-Dazsព្រមទាំងក្រុមហ៊ុនផលិតសោឈ្មោះRolex ។
ឯនាងអាណា អ៊ីវ៉ាណូវិចកីឡាការិនីតឺន្នីសរូបស្រស់និងសិចស៊ីរបស់សែប៊ីស្ថិតនៅលំដាប់ទី៩ក្នុងចំណូល៦លានដុល្លារខណៈនាងផូឡា គ្រីមម័រតារាវាយកូនហ្គោលរបស់អាមេរិកស្ថិតនៅលំដាប់ទី១០ក្នុងចំណូលប្រចាំឆ្នាំ៥,៥លានដុល្លារអាមេរិក ៕
ចែករំលែកព័តមាននេះ