ទីក្រុងកៀវ៖ ថ្ងៃនេះ យោធាអ៊ុយក្រែនវាយប្រហារទីតាំងស្តុកទុកប្រេងរបស់រុស្ស៊ីនៅលើទឹកដីរុស្ស៊ី និងនៅលើទឹកដីអ៊ុយក្រែនដែលគ្រប់គ្រងដោយកងទ័ពរុស្ស៊ី។ នេះបើយោងតាមការអះអាងដូចៗគ្នាពីខាងអាជ្ញាធររុស្ស៊ី និងអ៊ុយក្រែន ហើយវាក៏ជាផ្នែកមួយនៃយុទ្ធនាការវាយប្រហារទៅលើរុស្ស៊ីដើម្បីឱ្យរុស្ស៊ីខាតបង់ផ្នែកសេដ្ឋកិច្ច។ ក្រសួងការពារជាតិរុស្ស៊ីថ្លែងថាយោធារបស់ខ្លួនបាញ់ទម្លាក់ដ្រូនរបស់អ៊ុយក្រែន៣១០គ្រឿងកាលពីយប់រំលងអធ្រាត្រឆ្លងចូលព្រឹកនេះ។
ក្នុងនោះដ្រូនខ្លះហោះទៅវាយប្រហារទីក្រុងម៉ូស្គូ តំបន់ខាងលិច និងនិរតី តំបន់គ្រីមៀ សមុទ្រខ្មៅ និងសមុទ្រអាហ្សូស (Azov)។ រុស្ស៊ីក៏បានវាយប្រហារទៅលើអ៊ុយក្រែនវិញផងដែរដោយប្រើប្រាស់ដ្រូន១៥៥គ្រឿង។ ក្នុងនោះដ្រូន១២៤គ្រឿងត្រូវយោធាអ៊ុយក្រែនបាញ់ទម្លាក់។ នេះបើយោងតាមកងទ័ពអាកាសអ៊ុយក្រែន។ អគ្គសេនាធិការដ្ឋានកងទ័ពអ៊ុយក្រែនប្រកាសថាកងទ័ពរបស់ខ្លួនវាយប្រហារតំបន់ក្រាស់ណូដា ក្រៃ (Krasnodar Krai) កាលពីយប់មិញ។ មូលដ្ឋានស្តុកទុកប្រេងរុស្ស៊ីគ្រូសូហ្វវ៉ាយ៉ា (Grushovaya) ក៏រងការវាយប្រហារ។
នេះជាទីតាំងសម្រាប់ស្តុកទុកប្រេងឆៅរបស់រុស្ស៊ីត្រៀមដើម្បីដឹកជញ្ជូនទៅទីកន្លែងផ្សេងដ៏ធំជាងគេបំផុតមួយស្ថិតនៅប្រទេសរុស្ស៊ីភាគខាងត្បូង។ អាជ្ញាធររុស្ស៊ីប្រចាំតំបន់នោះអះអាងថាដ្រូនរបស់អ៊ុយក្រែនមួយគ្រឿងបានវាយប្រហារធ្វើឱ្យឆេះទីតាំងស្តុកទុកប្រេងនោះ។ ប៉ុន្តែគ្មានមនុស្សស្លាប់ ឬរងរបួសឡើយ។ រុស្ស៊ីមិនបានបញ្ជាក់ឱ្យច្បាស់ថាទំហំនៃការខូចខាតមានកម្រិតណាទេ។ ពួកគេគ្រាន់តែនិយាយដោយខ្លីថាក្រុមអ្នកជួយសង្គ្រោះ១៣០នាក់ចូលរួមនៅក្នុងការពន្លត់ភ្លើងឆេះ។
ក្រឡេកទៅមើលតំបន់វ៉ុលហ្គោក្រាតវិញម្ដង ទីតាំងផលិត និងចែកចាយប្រេងរបស់រុស្ស៊ីក៏រងការវាយប្រហារផងដែរ ហើយបានបង្កជាភ្លើងឆេះយ៉ាងសន្ធោសន្ធៅ។ អភិបាបលតំបន់នេះគឺលោកអានដ្រេ បូឆារ៉ូហ្វ (Andrei Bocharov) មិនបានបញ្ជាក់ថាតើទីតាំងនោះផលិតអ្វីទេ។ ប៉ុន្តែលោកអះអាងថាគ្មាននរណាម្នាក់រងរបួសនៅក្នុងការវាយប្រហារនោះឡើយ។ អ៊ុយក្រែនក៏បានវាយប្រហារទីតាំងប្រេងនៅសេមីកូឡូដេសកាយ៉ា (Semykolodezkaya) នៃតំបន់គ្រីមៀ និងបង្កជាភ្លើងឆេះ។ ទីនេះត្រូវរុស្ស៊ីប្រើប្រាស់សម្រាប់ស្តុកទុកប្រេងបម្រុង ផ្គត់ផ្គង់យោធារុស្ស៊ីនៅសមរភូមិមុខ៕ ប្រភព៖ AP
ចែករំលែកព័តមាននេះ